Read Vaiphei THUPILTE 19 Bible Online

THUPILTE 19 - Vaiphei bible

THUPILTE 19

¹Mingol zuauthei tak sâng in, migenthei lungthim dik tak chu a pha zawi.

²Hetna bei ah thil khat doina mai chu a pha pua hen; kalsuan kin-gang talua chule chotkhialna ahi.

³Min ama ngolna ziak ah siatna a tuak phat leh, LALPA chung in a phunchiak sek hi.

⁴Nei leh lam in gual leh pâi tam tak a siam in, chaga chun gual leh pâi a nei puai.

⁵Hiatpitu zuauthei chu gawt lo in um pua’n tin, zuau gente chule suakcha pua’n au.

⁶Mi tam tak in mi huangphal doisakna a hawl sek un, mitin hi mihuangphalte â dingin gual pha a hisek ui.

⁷Michaga chu a chanaute natiang inle a munop lo uh chun, a gual leh pâite vang chun, bang gual bep in a taisan zaw ta ding awm? Ko zui maleh, limsak pua’n au.

⁸Pilna nei chun ama thagau a hepi in, hetthiamna nei chu khang to ding ahi.

⁹Hiatpitu diklo chu gawt lo in um pua’n tin, zuau gente chule bangmalo hung hi’n au.

¹⁰Mingol â dingin kinoptel ah hinkhua mat chu a kilawm pua hen, suak in lengpa chate chung ah vai a hawm chule, a kilawm lo zaw diak hi.

¹¹Lunggêl thei mi chu a lungna vak pua hen, mi phatlona kihiatmawsak chu a lopinau ahi.

¹²Lengpa siatsona chu sakeibaknei kitum gual ahi’n, a doisakna ahileh vang hampa chung ah dâi kia gual ahi.

¹³Cha ngol chu a pa â ding ah siatna ahi’n; ji hânsia chu gawtui va chet chut gual ahi.

¹⁴In leh go thilte chu pate ah kipat lua a hisek in, ji chingthei chu vang LALPA piak ahi.

¹⁵Thâtdana chun i-mut thûtna a tun in, mi thabei chun kial thuak ngei in a.

¹⁶Thupiak zawmtu chu hing intin, a khan khua ding gel lo mi chu thi ding ahi.

¹⁷Migenthei somdawl chun LALPA thunglâksak ahi’n; ama’n dit kit sik sek in a.

¹⁸Kinepna a um lai in la chate chu thunun inla, siatna tuak ding bep in ngaitua kin.

¹⁹Mi lungchom chun gawtna mu’n tin; hukdok male chin hukdaw kit ngen ngai in a.

²⁰Tu’nung ah mipil la hung hitheina dingin, mi thuhilna ngaitha’n la, zilgaina le pom in.

²¹Mihing lunggil in guanggalna tam tak a um in; ahi’n la, LALPA doilam bep chu guitung in a.

²²Mihing ah doi um pen chu diktatna ahi’n, chatgana chu lepchiana sâng in a pha zawi.

²³LALPA launa chu hinna dik tak ahi’n; zia neite chu bit tak ah chawldam in, siatna le tuak pua’n au.

²⁴Mithada chun ankuang in a khut a dia den sek in, a kam hawm le a sawk pha ngai puai.

²⁵Mi simmaw hât chu sawi in, chutileh, mimawl inle chitna hun zilbe in a; thil hethei mi chu hil lechin, hetna neibe in a.

²⁶A pa hutum ah naw ah, a nu nawdok, chate chu zâchâkna paw lut leh minsiatna paw lut thei bep a hiu.

²⁷Ka cha, thil diklo bawl ding ah, tîlna thu ngaithâk chu haisan in.

²⁸Hiatpitu mat tâk lo chun thutanna dik chu a ngainêp in; mi nunsiate kam chun khawlona a val lut sek ui.

²⁹Maw chansakna chu mi simmaw hatte â ding ahi gual ma’n, vokna mol chu mingol tungtûn â ding ahi.