Read Vaiphei THUPILTE 20 Bible Online

THUPILTE 20 - Vaiphei bible

THUPILTE 20

¹Zu hin mi a suchavai ah, zukha hin mi a kinaksak hi; kuale zia haw bawl taphot chu mipil ahi puai.

²Lengpa lungnatna chu sakeibaknei kitum gual ahi’n; kuale a chok lungna taphot chun a hinna chân in a.

³Kinakna kipat kikoikâng thei chu, mi ja um ahi’n; ahi’n la, mingol tapo chu a va kigol lut pai sek ui.

⁴Mithadâ chun a hun lai in lou a kai pei pua’n; pawltâk phat leh bu lâk khawm ding a nei ngai puai.

⁵Mihing lunggil ah ngaituana umte chu, tui thûk tak gual ahi’n; mipil in vang tui gual in a thâldok sek ui.

⁶Mi tam takte chu diktat hi’n kigen chiat maleu, mi muan um tak chu kua hem mu zo ding?

⁷Midik, dem kâi lo ah um, ama dungsûn a chate chu mi vangpha a hiu!

⁸A thutanna lalchutpha kichu lengpa chun, mi phalo zosia chu a jap mang sek hi.

⁹“Ka lungthim ka hi’thiang ta’n, ka gitlona kipat in ka thiang tai,” ti’thei ding kua a hem?

¹⁰Bûkna diklo leh te’na diklo chu, a pani un LALPA huat lam tak ahi gêl ui.

¹¹Naupangte natiang inle a thilbawl dan un, a lungthim uh dik leh thiantho dan a hi’lang sek ui.

¹²Hetna nakhang leh mu’na mitte hi LALPA ‘n a siam gêl ahi.

¹³I-mutdu talua kin, chaga khan la; la mit te’n la, tichun, nêk ding kiningting mu’n la.

¹⁴Thil chawtu chun: “A pha puai, a pha puai,” a ti sek a; a chia mang phat le lah, a kisaktheipi sek hi.

¹⁵Sana le a um in, suang mantam le tam tak a um hi; amabo hetna gendawna mûk chu, tuikep suang lûl tak tawh bang ahi.

¹⁶Mêl het lo â ding ah kipautiamte chu a sil leh chên uh la’n la, gamdang mi â ding ah mawpaw ding ah kipete chu ama ngei hên in.

¹⁷Bumna vaithum chu a tui in; ahi’n, chomkhat zaw leh a kam ah suangchang thaikha gual ahi.

¹⁸Thuhilna ngaisakte thil guanggalna chu a lamzang in; pil tak ah puihuaina chu zui in gâl do bep in.

¹⁹Holim dû mi chun thugûk a îm thei pua’n; ziaziakchun, mi kam tam chu kivoppi kin.

²⁰La nu a hem, la pa a hem hânsia la law khum chun, sîn leh têt kibang khop ah thim lak in, la thaumei kimût mit piak ding ahi.

²¹Kin leh mol ah go kikhol khawm haw hi, a tawp lam leh a lamzang ngai puai.

²²“Thil phalo chu keima’n thuk kit na’ng ka,” ti kin; LALPA ngâk lechin, ama’n hun panpi in a.

²³Bûkna suang diklo chu LALPA ki’dak lam tak ahi hen, te’na diklo chu pha a sa puai.

²⁴Mihing kalsuan zosia hi LALPA guat ahi’n; a leh, mihing in bang ti’n a chotna ding hethei ding a hem?

²⁵“A thiangtho hi,” ti pai ziang chu thâng ahi hen, kin leh mol ah kipautiam ziang hi a vainung leh, kisikna ahi kît sek hi.

²⁶Leng chingthei chun migilote chu, busi thît gual in a thît thiang in; gawtna kângtalai keng chu a chung un a lîk hi.

²⁷Mihing lungthim chu LALPA thaumei ahi’n, a lungthim gil pen chule a sal suak sek hi.

²⁸Thutakna leh ginumna’n lengpa chu a vêng bit sek in, a lalchutpha chu diktatna dopsan in a um hi.

²⁹Khanglaite lopina chu a thahâtnau hi ahi’n, têksete lopina chu vang a samkâng uh hi ahi.

³⁰Beliam hial ah vokna chun hi’khialna a sil thiang hen; vokna chun sunggil lam tiang in a sil thiang sek hi.