Read Vaiphei THUPILTE 26 Bible Online

THUPILTE 26 - Vaiphei bible

THUPILTE 26

¹Nipi lai ah vûk kia leh, bu-ât lai ah gawzuk a kilawm lo gual in, mingol choihoi chu a kilawm puai.

²Vachong leng lai gual leh pialpîm leng vêl gual in, a ziak umlo ah mi sapsiat chu a guitung ngai puai.

³Vokna khauhual chu sakol â ding ahi’n, kamkaina thik chu sabiltung â ding ahi gual ma’n, jepna mol chu mingol tungtûn â ding ahi.

⁴Mingol chu a thugen ngol huai dungzui in dawnhu kin, a kibang bep hi kha’n lau.

⁵Mingol chu a ngol dan gual tak in dawnhu in, achutiloleh, mi khatto ka hitam kiti kha’n a.

⁶Mingol thuvaithak chun ama keng kitan a, ama siatna ding tui dawn tawh bang bep ahi.

⁷Mingolte kam ah thupil kigen chu, kengbaite keng matna bei gual bep ahi.

⁸Mingol jana piak chu vaisuangse ah suangchang kânden gual ahi.

⁹Mingolte kam ah thuching kigen chu, zukham khut ling in a sut tawhbang bep ahi.

¹⁰Mingol leh zungolvei goi chu, thal kap thiam in mi a kâp liam tawhbang ahi.

¹¹Ui in a luak a nêk kit gual in, mingol inle a bawlkhial sa a bawl kit sek hi.

¹²Mi ama bep pil kisa la mu kha ngai em? Zia gual mi sâng ah chun mingol chu kineppi a um zawi.

¹³Mithada chun, “Lampi’n sakeibaknei a um in, kotzingte inle sakeibaknei a um hi,” a ti sek ui.

¹⁴Kopza ah kotkhak a kipei vêl gual hin, mithadâ chule a jalkhun chung in a kihei vêl vêl sek hi.

¹⁵Mithada chun ankuang in a khut a diaden sek in, a kam ah siam kit ding nasan le a lunglel sek hi.

¹⁶Thu dik tak ah dawnhu thei mi pasagi sâng inle, mithadâ chu ama ngai in pil a kisa zaw sek hi.

¹⁷Midang kinakna kâl ah va kigol lut ziang mi chu, uicha chia lai a bil ah man gual ahi.

¹⁸A Invêngte zuau ah bawl ah, “Ka tawtna ahi,” tipa chu,

¹⁹mibanglo khat in meiselte, thalte leh thitheina khat ah mi a kâp tawhbang ahi.

²⁰Thingkhua a tum phat leh mei a thi gual in, kihoguk umlo’na chun kinaknale a bei sek hi.

²¹Meiâm chu meihol hâl âmtu leh, thing chu meiâm sêmkuangtu ahi gual ma in: mi hânsia chu mi kinaksaktu ahi.

²²Kihogukna thu kigen chu an tui tak gual ahi’n; sunggil lam thûk tak in a lut suk sek hi.

²³Lungthim dawha phalo nei zing kawm ah, kam thiam tak ah thu gen zol thiam chu, lei bêl dangka tui ah kiluan val sit set gual bep ahi.

²⁴Mêlma chu kam thiam sua in a kisêl a, a lunggil ah chun vang thil phalo ngen a gel hi;

²⁵la mêlma’n thu pha gual tak a gen inle taksang kin, a lungthim chu thil ki’dak um ngen pasagi sêt ah dim ahi ngal in;

²⁶a huatna chu sêlgu ham ham maleh, a gitlona chu khawtang het ah tâklat in, hung um ding ahi ngal a.

²⁷Mi kiaklutna ding ah kawkhûk cho tapo chu ama ke’lut intin, suang lîk khum gaw tapo chung in suang chu hung kilîk in a.

²⁸Lei zuauthei chun ama hi’liamte ma chu a muda sek in, pakchakna lêm kam chun thil a bawlsia sek hi.