Read Vaiphei THUPILTE 27 Bible Online

THUPILTE 27 - Vaiphei bible

THUPILTE 27

¹Jing ah thil hung tung dingte chu kisaktheipi kin; zia ni chun bang hun puak ding a hem ti la he paw’ngal a.

²Nangma la kipakchak sâng in, midang in hun pakcha zawu hen, nangma kam hilo ah, mêlhetlote kam in hun pâkcha zawu hen.

³Suang leh piaunêl chule a gik ma ma in, himaleh, mingol in mi a hi’buaina chu, zia te ni sâng ah chun a gik zaw nalai hi.

⁴Lungnatna chu a huaisia’n, siatchang le a so in; himaleh, kua a hem mitthipna thuak zo ding?

⁵Hepina kisêlgu sâng in, a langchang ah zilgaina chu a pha zawi.

⁶Gual ginumte doisakna’n ei sukliamnau chu na maleh, mêlma’n a lêm ah ei chawpna sâng in a pha zawi.

⁷Mi an vâ lai â dingin khuaizu le luaksuak um ahi; mi gilkial â dingin vang thilkha le a thum hi.

⁸A In ah um man lo mi chu vacha a bu lenmangsan tawhbang ahi.

⁹Sathau gim tui leh gim tui hâl in lungthim a hilim sek in; ahi’n, buaina’n lungthim a kai chim sek hi.

¹⁰Nangma leh la nu leh la pa gualphate kha tha’suak kin; haksatna la tuak pet in la chanaute In ah tai lut kin. Chanau mun gamla tak ah um sâng in, In kiang naicha Insak Inthang ah lawipha um chu a pha zawi.

¹¹Ka cha, pil inla, ka lungthim sukipak in; chutileh, ei kophil taphot dawnhu thei ta’ng ka.

¹²Mipil in lau um hung tung ding a mulawk in a la kisêl mangsan sek; mingol vang a chia jel ah a tuak kha, a thok khawlaw sek hi.

¹³Mêlhet lo â ding ah hiatpitu pangpa sil leh chên chu kilâk ah, gamdang mi â ding ah mawpawtu chu anchâk in mang in.

¹⁴Jingkal ma tak ah tho ah, aw ngai tak ah Invêngte maljawltu chu, hânsia law khum gual ah ngai hi’n a.

¹⁵Gawchîn leh numei hânsia chu a kibang bep ui;

¹⁶zia gual numei vau thip thei chu hui vau thip thei gual leh, a khut ah sathau chawi thei gual ahi.

¹⁷Thîk in thîk dangma a tât-hiam gual in, mihing khat in midang khat hetna a tât-hiam thei hi.

¹⁸Kuale theichang kung vêng bit pei chun a ga ne têi intin; a hotupa limbawl pei tapo chun jana mu têi in a.

¹⁹Tui in I lim dik tak a hun latsak gual in, mihing lungthimle a mi hinna ma ma chun a hi’lang sek hi.

²⁰Sheol leh Abaddon in hun leh hai a neilo gual un, mihing mit inle hun leh hai a hepuai.

²¹Dangka thik chu bêl ah awmtui ah sukthian ahi’n, sana chu meipi ah hâl thian a hi sek; mihingle pâkchâtna a lawte ah hin patep a hisek hi.

²²Mingol chu sum ah suktum in buhum tawh, subuang khawm ziang lechinle, a ngolna chu subei thei diak pua’n la.

²³La belam honte umdan chu hetchian guan la, la bawng honte chule vengpha’n;

²⁴hausakna chun kumtuang a dai pua’n, lal lukhuk inle a khang a khang a dai diak paw’ngal a.

²⁵Hampadua a pul zaw phat leh a hung selthak kit sek in, tâng ah hampaduate chule chom khawm in a um sek a;

²⁶belamte chun la sil leh chên ding hun tua intin, kêlchate chu lou man ding hi’ntin;

²⁷la nêkkhop ding kêlcha nawitui hung um intin, nangma Inkuante nêk ding leh, la nasem nungakte vâkna ding hung hi’n a.