Read Vaiphei THUPILTE 30 Bible Online

THUPILTE 30 - Vaiphei bible

THUPILTE 30

¹Jakeh chapa Agur thugente. Thuching chu: “Aw Pathian, ka ning a têl hen, aw Pathian, ka chim tai. Bangti’n mi ka pha thei diam?” ti’n mipa chu a kiko a.

²A dik tak in, mihing dingin ka mawl talua’n, mihing hetna le ka nei puai.

³Pilna ka zil kha pua’n, mithiangthopa hetna chule ka nei nai puai.

⁴Kua a hem van ah kaldok ah hung kumtha kit chu? Kua a hem a khutpêk sung ah hui kichoi thei chu? Kua a hem puan ah tui chûn thei? Kua a hem lei chung kawlkil zosia phu det? Ama chu kua a hia, a chapa min le bang a hem? Nang in la he ma ma hi!

⁵Pathian thu zosia chu a dik hi; ama bêl ah kisel zosiate â dingin, ama chu lum leh phaw ahi.

⁶A thugente chu belap kin, achutiloleh, hun suasal intin, la zuautheina hung kilang kha’n a.

⁷Thil pani ka hun ni hi; ka thi ma’n ei lawtin ngei ngei in aw:

⁸Ka mantheilona leh, zuautheina him him ei lâk mang piak inla; chatgana a hem leh neinunna, a khoi zawk zawk hile ei pe kin; ka mamaw jat an chun ei vak zaw’n;

⁹achutiloleh, tai in niang ta law leng hun hemil ing ka tin: “LALPA chu kua a hem?” hun ti kha’ng ka. Chaga talua leng la gûkchak khawlaw kha’ng ka tin, ka Pathian min hi’thanghuai kha’ng ka.

¹⁰Suak chu a pu kiang in lawtsia kin; chutilochun, suak chun hânsia hun law intin, maw chansak in um kha’n la.

¹¹A pateu hânsialaw ah, a nuteu maljawlna pelo mile a um ui.

¹²Amau mit mu ah thiam kisa, a hiziak ah a buak kainau sawp thiang lo le a um ui.

¹³Mi mittêt sâng chî le a um un, a mitteu chu a sângha’ nau e!

¹⁴A hateu chu chemjam gual leh, chemcha gual mi le a um ui; lei chung ah migentheite leh, mihingte lak ah tasamte nêk gam gua le a um ui.

¹⁵Vot in chanu pani a nei in: “Ei pia’n, ei pia’n,” ti’n a kiko un. Thil pathum khopna châng helo leh, thil pali, “Hun ta hen,” ti ngai mawng mawng lo a um ui:

¹⁶Sheol sul, chîng, tui khop ngai lo lei gawchâk leh, “Hun ta hen,” ti ngai lo meikuang!

¹⁷A pa simmaw leh a nu thu ngainêpte mit chu, phâigam va-âk in kheldok intin, musanete’n a sa le ne’n au.

¹⁸Thil pathum mak ka sak tâk luat leh, thil pali ka het thei lo a um hi:

¹⁹Vanlaijawl ah muvânlâi lênna lampi, suangpi chung ah gul kitholna nung, tuisuagiat ah long chiana nung leh, pawsal in nungak a ngai dante hi.

²⁰Numei ângkawmnu tatdan chu: a nêkna mûk a thiak nâm ah, “Bangma ka bawl khial dang em,” a ti jel sek hi.

²¹Thil pathum ziakin lei chung a kithing sek in, thil pali ahi a thok zawlote chu:

²²Suak chu leng a hung chan ah, mingol in bu leh sa a nêkva a,

²³mi mitdo um numei in pawsal a hun nei a; chuleh, suak nungak in a pi go a hun lua hi ahi.

²⁴Lei chung ah hin thil neucha pali a um in; himaleh, a pil ma mau hi.

²⁵Niksate hi hat lo tak a hiu ah; ahi’nla, nipi lai leh a nêk ding uh a kilâk khawm sek ui;

²⁶kawlzu haw hi hat lo tak ahi’nau ah, ahi ziakin, suangpi lak ah te kua a kisiam thei ui;

²⁷khaubepite hin lal a nei puau a, himaleh, a hon in a ta thei ui.

²⁸Inngâkpi hi khut ah mat thei ahi’n, himaleh, lengte In ah a um sek hi.

²⁹Kalsuan dan ah kituak pathum a um un, a khawhei dan ah ja um pali a um ui:

³⁰Sakeibaknei hi gamsa lak in a hat pen in, kuama âng ah jam ngai lo ahi;

³¹akchal kisual thiam, kêlchal leh lengpa a mipite âng ah chiate hi a hiu.

³²Nangma kichawisang ah ngolhuai tak ah um ah, thil phalo suangtua la hi chun, la mûk hum mai in.

³³Bawngnawi kichoknâng in bawngnawi khal a siam gual leh, nakkui I sawt sawt leh thisan I sawtdaw gual hin, I lung I natsak sak leh kinakna hung pawt mai sek ahi.