Read Vaiphei THUPILTE 31 Bible Online

THUPILTE 31 - Vaiphei bible

THUPILTE 31

¹Lengpa Lemuel paukam, a nu’n thuching a la hilte chu:

²Ahipuai, ka chapa! ahi paw e, ka sûl ah piang ka chapa, ka thutiamna chapa!

³La hatna chu numei kiang in pekin la, lengte haw a la hise sekte lampi chu zui kin.

⁴Aw Lemuel, lengte’n zu dawn ngai a hipua’n, vaihawmtute’n le zukha hat tak dawn ngai ahi puai;

⁵a la dawn khâk pal ua chun, dan hemil intiu in; migentheite chung ah vaihawm khial kha’n au.

⁶A thi ding kuante chu zukha pia unla, mi lunggimte chu uain pia tau in;

⁷dawn uh hen la, a gentheinau hemil uh hen; tichun, a gentheinateu chu gêldok kit ta kiu hen.

⁸Amau â ding kigen theilote chu gen piak inla, panpitu neilote chu humbit in.

⁹Amau â dingin thu gen inla, dik tak in vaihawm inla; migentheite leh tasamte chu khawtua in.

¹⁰Ji pha chu kua a hem mu zo ding? Suang mantam san chi sâng inle a lûl zawi.

¹¹A pawsal in a lunggil tak in a muang zo in, lawkna tasam ngai pua’n a.

¹²A damsung zosia’n a siatna ding hilo, a pha lam ngen a bawl piak sek hi.

¹³Samul leh patbua a hawl ah, thanuam tak in a khut in na a sêm sek hi.

¹⁴Sumkawlveite long gual in, gamla tak ah kipat in nêk ding a paw khawm sek hi.

¹⁵Khua a vak masang in a thodok a, a Insung mite nêk ding leh, a suak numeite sep dingle a pesek hi.

¹⁶Lou ding ngaitua in, a chawdok ah; a khut ngei in grep huan a siam hi.

¹⁷Hatna’n a tâi a gâk ah, a khutbânte a hihat sek hi.

¹⁸A kiveina chu a lawk hi ti a hia’i. A thaumei chu jan inle a mit ngai puai.

¹⁹A khut in muikhut a tu zing in, a khut in patphel a tha’suak ngai puai.

²⁰Migentheite panpi’na’n a bân a jak ah, mi tasamte panpi’na’n a khut a tha sek hi.

²¹A Insung mite â dingin vûk kiak ding chule a huphul pua’n, a Insung mi zosia chu puan sandup in a thuam sek a.

²²Ama kithuamna ding puan a kiga in; a sil leh chênte chu, puan malngat leh puan sandup ahi.

²³A pawsal chu gam upate tawh, khawpi kul kotkhak bul ah a chut khawm lai unle, hetkhen thei ngal ahi.

²⁴Puan nêm kicheina a siam in, a zuak sek ah; sumkawlveite le kawnggâk a lâk sawnsak sek hi.

²⁵Hatna leh za umna chu a kicheina ahi’n; hun hung tung jel dingte chule a lau puai.

²⁶Pilna’n a kam a ka’n, nunnem tak ah hilna chu a kamsuak ahi.

²⁷A Insung khawsak dan chu a en fel a, mawk um ah thâtbeina an a ne ngai puai.

²⁸A chate a hung kipan un, “Mi vangphanu,” a tiu ah; a pawsalle a hung kipan a, a pâkcha’;

²⁹“Numei khawsak danthiam tam tak a um ui, himaleh, nang hi la pha chung chuang pen hi,” a tia.

³⁰Ngaikâina hi kithepna mai ahi’n, mêl hoina hile bangma ahi puai; himaleh, LALPA ki’chate chu pâkchat ding ahi.

³¹Zia gual numei chu a khutsuak kipakman chu piau inla, ama nasep dawte ma ma chun, khawpi kul kotkhak bul ah chun pakcha tau hen.