Read Vaiphei THUPILTE 4 Bible Online

THUPILTE 4 - Vaiphei bible

THUPILTE 4

¹Naupangte haw, Pa thuhilna hi ngai unla, hetthiamna nei dingin ngaithau in;

²dan pha ka hun mop la hiu, ziaziakchun, ka hilna hemil kiu in.

³Ka pa â ding ah chapa tuaidawng khat ka hi ah, ka nu doisak ka la hi’lai ah khan,

⁴ei ziltil in, ka kiang ah: “La lunggil in ka thute hi vop det zing inla; ka thupiakte hi zawm inla, damna’n nei in,” ei ti’n.

⁵Pilna nei inla, hetthiamna nei in; ka kam ah thu pawtte hi hemil him him kin la, kiheimangsan kin.

⁶Jamsan kin, ama’n hun humbit zing ding ahi; hepi in, tichun, ama’n hun vêng zing ding ahi.

⁷Pilna chu a poimaw pen ah, tichun, pilna chu nei in, thildang zosia sâng in, hetthiamna chu nei in.

⁸Pilna chu domsâng lechin, ama’n hun domsâng ding ahi; la kolchak zing chun, ama’nle hun jabawl ding ahi.

⁹Ama’n la lu dialkop hoi tak hun kopsak intin; lopina lal lukhuk hun khuksak ding ahi.

¹⁰Ka cha, ka thugen ngai inla pom in, tichun, la damsung kumte hung tam in a.

¹¹Pilna lampi ka hun hil ta’n, dikna lampi’nle ka hun pui ta ngal in.

¹²La chia lai in la kalsuan zang intin, la chia lai inle kisui pua’n la.

¹³Zilgaina chu tudet inla, tha’suak ta kin; chingtup in, la hinna ahi ngal a.

¹⁴Miphalote lampi’n vâk lut kin la, thil phalo bawlte lampi chule zui kin.

¹⁵Pêl inla, vâk lut kin; zia lampi chu kiheisan inla, chia theng ziang in.

¹⁶Thil phalo a bawl masiau a ipmu thei ngai puau in; kua a hem khat bêk a kipalpâi sak lo uh chun, a ipmu thei ngai puau hi.

¹⁷Nunsiatna an ne’n, thagum sua’na uain a dawn sek ngal un.

¹⁸Midikte lampi chu vang jingkal khawvak, sûn a hung hi masia a vâk phat deu deu gual ahi.

¹⁹Mi nunsiate lampi chu, khûk thim tak gual ahi’n; a bang pen ah kisui a hiu le a hethei ngai puau hi.

²⁰Ka cha, ka thugen haw hi pha tak cha’n ngai inla, ka thugente ah hin la bil daw in.

²¹Ka thugente hi la mit mu ah kipat in kigêl mangsak kin la; la lunggil tak in vop in.

²²A mudokte â dingin hinna ahi’n; a taksa zosia â dingin hisêlna ahi ngal a.

²³Bang dang cheng sâng in la lungthim chu vêngpha’n, zia chu hinna tuinâk kipatna ahi ngal a.

²⁴Dawha pau mang kin la, la mûk chunle zuau thu pawt ki’hen.

²⁵La mit in la chiana ding zang tak in en inla, la ma lam zang tak in en zing in.

²⁶La keng chotna ding lampi siam zang inla, tichun, la umdan zosia hi’det in um in a.

²⁷Changlam a hem, veilam a hem in pêt mang kin, thil phalo lam chu jamsan in.