Read Vaiphei THUPILTE 6 Bible Online

THUPILTE 6 - Vaiphei bible

THUPILTE 6

¹Ka cha, la Invêngte â ding ah la kipautiam ah, midang khat kiang ah la kigen awk chun,

²la kamsuak in a hun mat la hi tai.

³Ziaphat chuleh, ka cha, la Invêngte khut ah um la hi tai ti kihia’n la, zia hi bawl in kisûtdok in; chia kin-gang inla la Invêngpa kiang ah, kingainiam tak in valût in.

⁴La mit chu i-mutsak kin la, la mitvun le i-mut vuangsak kin;

⁵sa manpa thâng ah sapeng a taidaw gual leh, vacha manpa khut ah kipat, vacha a lendaw gual in kisûtdok in.

⁶Nang mithadapa, niksa kiang ah chia inla, a hi’dante sût inla pil ta’n.

⁷Amau chun hausa, lamkai leh vaihawm neilo in,

⁸nipi lai in an a lakhawm un, pawltâk hun leh a nêk ding uh a paw khawm sek ui.

⁹Aw thadapa, bangchan a hem la lup ding? Bangtik leh hung thodok ding la hem?

¹⁰Lum tadi ing ka tin, chomkhat i-mu kit tadi in, khut ângkua in kichawl nalai ing ka, la ti chun,

¹¹chatgana chu gucha gual in hung tung intin; tâksapna chu hiam leh thal chawi gâldo mi gual in hung in a.

¹²Mi gi’nalo leh phalo chu dangnal tak in a vak tawl tawl in,

¹³a mit ah mi ho in, a keng in thu a gen ah, a khutzung in mi a hil sek ah;

¹⁴a lungthim lu’lulna’n thil phalo a suangtua zing in; kituaklona chu a tuzing sek hi;

¹⁵zia gual mite chung ah chun, haksatna a hung tung phut sek a; siamphat kit gual lo khop ah siatna phutlo in tung in a.

¹⁶LALPA huat lam thil paguk a um in, a ki’dak lam tak thil pasagi a um hi:

¹⁷Mittêt chapote, lei zuauthei te leh mawna neilote thisan sua’na khutte;

¹⁸thil phalo suangtua sek lungthimte, siat bawl ding ah kãl jangte;

¹⁹zuau thei ah hiatpitu ah pangte, Inkuan sung ah kituaklona chî tute hi.

²⁰Ka cha, la pa thupiak zawm inla, la nu hun hilna le kihetmawsak kin.

²¹La lunggil in vop zing inla, la ngawng in awk in.

²²La vâkvelna’n hun pui intin; la i-mut kâl in hun vêng zing intin; la thawdok phat leh hun holimpi in a.

²³Thupiak chu thaumei ahi’n, thuhilna chu vâk ahi; thununna ah sukdikna chu hinna lampi ahi;

²⁴midang ji ah kipat leh, numei jawntatnu kamthiamna kipat hun vêng in a.

²⁵La lung in a mêl hoina chu tha lâ kin la, a mittêt hawina’n hun hîp in, hun man ki’hen;

²⁶nawchizuaknu chu vaithum tâng khat bep ah muthei ahi hen, jawntatnu chun pawsal hinna lûl tak chu, bangmalo a suaksak sek hi.

²⁷Min a puan kâng kha lo in bangti’n meiâm chûn thei ding a hem?

²⁸Ahiloleh, keng kâng kha lo in, mi meiâm chung in bangti’n chia thei ding a hem?

²⁹Zia gual chun, kuale a Invêngpa ji tawh lum khawm ah, khoikha tapo chu, gawt lo in suakcha pua’n a;

³⁰Min a kialnêm ah a nêk ding a gûk chun, kuama’n a simmaw ngai puau hi.

³¹Ahi’n, a mudawu chun vang, a le’ sagi’n din kit intin, a In ah a neithil zosia le lak piak in au.

³²Himaleh, numei jawntatpi tapo chu, hetthiamna neilo ahi’n; ama hinna kisuksiat bep ahi.

³³Beliam leh mualphona chang intin, a jachâkna chule theknâm thei a hita puai.

³⁴Mitthipna chun pawsal siatsona a chokphûl in, phuba a lâk phat leh daidawp pua’n a.

³⁵Kitatna sum chu pom pua’n tin, thilpiak bang jat ah tam pegu ma lechin le, a lungdam diak pua’n a.