Read Vaiphei THUPILTE 9 Bible Online

THUPILTE 9 - Vaiphei bible

THUPILTE 9

¹Pilna chun a In ding a sa hen, bankhuam pasagi a phut hi.

²A gante a that ah, a uain hel in, a dawkân ah nêk ding a siamtup a.

³A suak nungakte a sawldok a, khawpi mun sânna pen te ah kipat chun tâng a sam in:

⁴“Mimawl tapote chu zia lam hin hung un!” ti in. Hetna beite kiang inle,

⁵“Hung unla, ka vaithum hi hung neu inla, ka uain heltuaksa hile hung dawn un.

⁶Naupan huai takte chu paitha’n, hetna kichian tak nei in khawsau in,” ti in.

⁷Musit chîng zilgaitu chun, dâi châkvaina a tuak in, mi nunsia gaitu chun khut a thok khawlaw sek hi.

⁸Musittu zilgaite chun mudâna a law un, mipil zilgaite chun ngainatna a law ui.

⁹Mipil chu hil lechin, pil zaw sêm sêm intin; midik chu hil lechin, a hetna pung in a.

¹⁰LALPA launa hi pilna bul ahi’n, Thiangtho Pa hetna chu hetthiamna ahi.

¹¹Keima ziakin la damlai nite chu hipun hi’ntin, la damsung kumte chu belap in um ding ahi.

¹²La pil chun nang â ding ah pil la hi’n; la musit chun nangma bep in thuak in la.

¹³Numei ngol chu navek a um in, a mawl in, bangma a hepuai.

¹⁴A kotkhak bul in a kitung ah, a khua sung mun sâng pen in a kitung sek a,

¹⁵a tupnau zuan a kiang hun haw kha taphot chu, a la ko sek ah: “Mimawl leh hetna neilote haw, zia lam hi hun zuan un!” a ti sek a.

¹⁶Chuleh, hetna beite kiang in, “Mimawl tapote haw, zia lam hi hun zuan un!” a ti sek a.

¹⁷“Tui kigu chu a thum hen, a gûk ah vaithum nêk chu a tui diak hi,” a ti hen.

¹⁸Himaleh, zia tak ah chun mithite bep a um ui ti a hepuau in, a mi chialte chu, Sheol thûk tak ah um a hiu ti le a hepuau hi.