Read Vaiphei THUGENTU 1 Bible Online

THUGENTU 1 - Vaiphei bible

THUGENTU 1

¹Jerusalem khua lal, David chapa Thugentu thugente chu:

²Thugentu chun, Thil zosia hi bangmalo ngen ahi’n; thil zosia hi bangmalo ngen ahi! a ti’n.

³Min khawvel ah a sepgimna kipat, bang phatchuamna a mu him him em?

⁴Khang khat a bei ah, khang khat a hung um kit ngen a; lei hi vang a danglam puai.

⁵Nisa a hung suak ah, a tum kit sek a; a suakna ding lam del in a kinaw hi.

⁶Simlam zuan in hui a nung ah, mallam tiang in a hung nungdok kit sek ah; a vêl vêl in hui a nung in, a hung kipatna ma a tung kit sek hi.

⁷Luicha tui zosia tuisuagiat lam in a luang un; ahi’n, tuisuagiat chu a dim diak puai; luicha tui haw chu a hung kipatnau lam zuan in, a chia kit sek ui.

⁸Thil zosia hi buaina ngen ah dim ahi; kuama’n gen sêng pua’n a; mit in a thilmu a chim pua’n, bil inle a thil het a khop diak puai.

⁹Thil umsate hi a hung um kit dingte ngen a hiu in; thil kibawl haw hile bawl kit dingte ngen a hiu; khawvel ah hin thil thak him him a um puai.

¹⁰“En tia, zia hi thil thak ei ve,” ti ding him him a um em? Zia haw chu eihaw masang pek a, a la umsa ngen a hiu.

¹¹Malai mite hetzingna a um ta pua’n, a hung um nalai dingte chule, a nung ua hung um kit dingte chun, hetzingna um diak pua’n a.

¹²Keima, Thugentu hi Jerusalem ah, Israelte chung ah leng ka la hi’lai in;

¹³khawvel ah thil kibawl zosia hi, pilna mang in mudaw leh, hetdaw gua’n ka lungthim chu ka la pia ta’n; Pathian in mihing chate buaipi ding ah a piak hi, chawl a um na lawm lawm e!

¹⁴Khawvel ah thil kibawl zosia hi ka mu ta’n; ahi, en in, a leng in bangmalo mai mai leh, huizang mat gua tawhbang bep a hizawi.

¹⁵A kawisa chu hi’zan thei a hita pua’n; a poimaw chule gensen ding ahi puai.

¹⁶Ka lungthim in hiti hin ka ngaitua ah, “Jerusalem ah ka masang ah a la um zosiate sâng in nasa tak in ka pilzaw’n; pilna leh hiatthiamna le ka ngaituana hin a nei nasa zaw ma ma hi,” ka ti’n.

¹⁷Chuleh, ka lungthim chu pilna he ding leh, ngolna leh mawlna le hechian dingin ka pia’n. Zia hile huizang mat gua tawhbang bep tho ahi ti ka he tai.

¹⁸Pilna a sân po leh lunggimna a tam a; hetna a pun po leh buaipi dingle a pung mai hi.