Read Vaiphei THUGENTU 4 Bible Online

THUGENTU 4 - Vaiphei bible

THUGENTU 4

¹Chuleh, khawvel ah kinuaisiana zosia hi ka vak mu ta’n. En tiam in, nuaisia ah umte mitthi leh a thamuan ding neilo dan uh khi! A mau nuaisia tute chun thilhitheina a nei dan uh leh, amau thamuan ding a umlo dan teu hi ka ngaitua a.

²Ziaziakchun, mihing dam nalaite sâng in, mithi, a la thisate hi a vangpha zaw a hiu ti ka ngaitua ta’n;

³ziate sâng ah chunle, khawvel ah nisa mêlle a la mulo ah, khawvel ah thil phalo hawle a la mu man lo ah, piang nai lo hi gam chêng in a phazaw ma ma hi, ka ti ta ahi.

⁴Sepgimna leh thiamnêl tak ah nasep thilbawl zosia hile, midangte îtsikna ziak bep ahi ti ka mu tai. Zia hile bangmalo mai mai leh lunggimna mai mai ahi.

⁵Mingol in a khut kiltua in amau taksa a kinêk sek ui.

⁶Gim tak ah khut dim ni nei ah hui mat guat sâng in, chawldam tak ah khut dim khat bep nei chu a pha zawi;

⁷Chuleh, khawvel ah thil zosia hi bangmalo mai ahi dan ka mu ta’n;

⁸mi pakhat chapa le nei lo, suapile nei diak lo, a sep gimna’n lah tawpni nei diak lo a um in; a hausakna chule a mit taina khop ahi diak puai, “Ka hinkhua nopna ding zosia chân hial ah, kua â ding ah sêm gimle ka hem?” a kitiu a. Zia hile bangmalo mai leh a thawn ah buaina mai mai ahi.

⁹Mi pani chu pakhat sangin a phazaw’n, a sepgimnau ah kipat chun kipakman pha tak mu ding ahi ngal un.

¹⁰A pûk uh leh le pakhat zawk in a lawipa chu kaitho ding ahi’n; a chang ah um chu a vangsiat um na e! A kipûk phat leh a kaitho ding kuama a um tâk lo ding ziakin.

¹¹Chuleh, mi pani chu a lup khawm uh leh a kinek lum un; ahi’n, mi pakhat mai chu bangti’n hem a kihi’lum thei ding?

¹²Ama chang ah pang chu midang pakhat ziang inle a zo thei hen, mi pani pang khawm in vang midang khat chu nuam takin a zo thei ui. Khauhual nungzui nei chu a tan ziang puai.

¹³Leng têksia lungthim hâihot ta, kuama thugen le hethei talo sâng ah chun, genthei maleh, tanglak pil tak chu a pha zawi.

¹⁴A lenggam sung ah migenthei pen hiziang leh le, suangkul ah kipat in vaihawm dingin a hung pawt thei tho hi.

¹⁵Khawvel ah mihing zosia khawsak dan ka ngaitua leh, tanglak pil, leng thasâng ah hung pangpa gual mai ahi, ti leh,

¹⁶a mipi puihuaite â ding chunle a tawpna chu a um diak puai. A nung ua hung um dingte chunle a chung un kipakna a nei diak puau hi. A dik tak in, zia hile bangmalo mai mai leh huizang mat gua tawhbang mai ahi.