Read Vaiphei THUGENTU 5 Bible Online

THUGENTU 5 - Vaiphei bible

THUGENTU 5

¹Pathian In ah la chia phat leh, la keng vêngpha’n; mingolte kithoina thilpiak sâng in, ngaitha ding ah kisa zosa um hi a pha zawi; amau chun a thil hi’khial uh a ngaitua ngai puau a.

²Pathian âng ah thu tut dingin, la kam le kinaw ki’hen la, la lungthim le kinaw diak ki’hen; Pathian chu van ah um ahi’n, nangma lei ah um la hi; ziaziakchun, la thu gendaw chu tawm hen.

³Thil ngaitua tam tak luat ziakin mang a hung um in; thu tam tak gendawna kipat in mingol chu het a hisek hi.

⁴Pathian kiang ah thu la tiam phat leh, pitin ding chu uai âi kin; mingol ah chun kipakna a nei puai. La thutiam kha mualsua in.

⁵Thu la tiam ah, la mualsua lo sâng in, la tiam lo chu a pha zawi.

⁶La kam chu thil hun hi’khialsak dingin phal kin la, palai âng inle ka genkhial ahi, ti diak kin; bang dingin em la paukam ziak in Pathian chu lungna’n, la khut sepgimna chu a noimang ziang ding?

⁷Mang a tampo leh bangmalo mai mai leh thu mantheilo a tam bep hi; Pathian lau zaw’n.

⁸Migentheite nuaisia ah a um uh leh, gam sung ah vaihawmna leh dikna suksiat ah a um inle maksa kin; dinmun sangzawte chunle amau chung ah sangzaw, a mitmei a vên ding uh um jel ahi.

⁹Chuleh, bangkim ngaitua khawm in, lou gam â ding ah lûlna um chu zia hi ahi: lengpa le louma suak ah kinga tho ahi.

¹⁰Dangka sum ngainate chu dangka’n lungkim diak pua’n tin uh; hausakna leh lawkna ngainatu chu lungkim diak pua’n a. Zia hile bangmalo mai mai ahi.

¹¹Thil nei a hung pun dungzui in, a ne dingle a hung pung ah; a neitu â dingin a mit ah et mai lo chu bang a hem a phatchuamna um?

¹²Nasem gim chun ne tam in ne tawm leh, a i-mut a tui ah; ahi’n, mi hausa thil nei tam chun a i-mut theilo khawlaw hi.

¹³Khawvel a thil phalo tak mai ka mu chu: Min hausatna a nei, a nat khawlaw hi ahi’n;

¹⁴zia hausakna haw chu thil phalo in a peimang sek ah; cha leh nau nei maleu, a khut un bangma a nutsia piak ngai puau hi.

¹⁵A nu sung ua kipat ngawnchang ah a hung pawt daw gualmau in, a ngawnchang ma’n kile’kit intiu in; a sepgimnau, a khut ua a puak mang thei ding uh hileh kilawm maleh, bangmacha somdok thei diak pua’n au.

¹⁶Zia hile thil phalo tak khat chu ahi: a hung dan gual gual un chia kit ding a hiu; hui in a taw mang ding bep ah sepgimna hi bang a hem phachuam?

¹⁷Zia mai chule hilo in, a damsung siau nasa tak ah lung awilo’na tawh, natna tawh, lungnatna tawh thim lak in an a neu a.

¹⁸Zia hi ahi thilpha hiding ah ka mu chu: Min khawvel ah a sepgimna man ga pha tak, Pathian in damsung nikhua chomcha a piak sung ah a lâk khawm chu a nêk ah, a dawn ah, a nopchên thei chun, zia chu a chantum ahi mai hi.

¹⁹Zia gual ma chun, mitin Pathian in hausakna leh sum leh pâi a piak ah, a nopsakpi ding ah a piak chu a nopsakpi thei nâk ahi chun, zia chu a sepgimna ga, Pathian thilpiak chu ahi mai hi.

²⁰Pathian in a lunggil ua kipakna a piak ziakin, a damsung niteu chom dan tak chule lunggêlna man nei him him pua’n au.