Read Vaiphei THUGENTU 6 Bible Online

THUGENTU 6 - Vaiphei bible

THUGENTU 6

¹Khawvel ah thil phalo tak ka mu, mihingte lak ah um mun pen chu zia hi ahi:

²Mi Pathian in hausakna, nei leh lam leh ja’umna a piak ah, a lungthim in a thangai taphot tasam lo ah nei ngal; a hiziak ah, ziate chu a nopsakpi theina ding Pathian in a piak lo, midang in a nopsakpi ma mate hi ahi. Zia hile bangmalo mai mai leh thil phalo tak chu ahi.

³Min cha za khat nei hen la, kum tam tak dam maleh, a hin sung chun thil phate chu nopchên diak lo hen la, ama vui dingle um talo leh, lamjul ah thi sâng in a phat zawkna a um diak puai.

⁴Ama chu bangmalo in a hung piang ah, thim lak ah chun a lut ah; a min chu thimna’n a khûmang ta’n;

⁵zia mai chule hilo in, nisale a mu pua’n, bangmale a hepuai; ahi’n, a dangte haw sâng in a chawldam zawi.

⁶Kum sang khat a le’ni sâng ah tam zaw dam hen la, thilpha a chên diak lo chun a leng un kibang sap ah mun khat ah tung khawm chiat ding hilo a hiu em?

⁷Mihing sepgimna zosia hi a gawl â ding bep ahi’n; himaleh, a khop diak puai.

⁸Mipil in mingolte sâng ah bang hamphat zawkna a nei chuam diak uh em? Mihingte âng ah umdan thiam, migenthei chunle bang a nei diak awm?

⁹Duthusam mai mai sâng in mit ah mu ngei chu a pha zaw’n; zia hile bangmalo mai mai leh lunggimna bep ahi.

¹⁰Thil hung um taphot chu a min phuaksa ngen ahi hen; mihingte hile bang gual hung hiding a hiu em ti hiatsa ngen a hiu; chuleh, amau sâng ah chungnung zaw chu a nial thei diak puau.

¹¹Thu gendaw a tam po leh a thawn a tam in, a khoi zaw chunle phatchuamna a nei diak em?

¹²Mihing dam sung nikhua lîm gual ah bei ziang, bangmalo leh chomcha sung ah hin, mihing â ding ah pha pen chu bang a hem ti kua a hem he ngai? Khawvel ah hin a nung ah thil hung tung ding kua a hem hil thei ding?