Read Vaiphei ISAI 1 Bible Online

ISAI 1 - Vaiphei bible

ISAI 1

¹Amoz chapa Isai in Judai gam ah lengte: Uzziah, Jotham, Ahaz leh Hezekiah a lal lai un, Judah leh Jerusalem chung thu ah kilâkna a la mu lawk a.

²Aw vante, hiau inla, aw lei chung, ngai in; LALPA‘n thu a gen ta ngâl a: Chate ka hing ah, ka dontei ta’n, ahi’n, ei do in a hung pang tau hi.

³Bawngchal in a neipa a hia’n, sabiltung in a enkolpa anpiakna a hia’i; maleh, Israelte’n a hepuau in, ka mite’n a hechian puau hi.

⁴Katei, nam gilo, mi bawlsiat chîngte, phat nuam lo suan leh pâkte leh, thil sia bep bawl nuam chate haw, LALPA nusia ah, Israel Mithiangtho musit ah, gamla tak ah jam mangte haw!

⁵Jep be hawl nalai la hem? Bang ding ah huhel nalai maw? Luchang a pum in a na hen, lungchang le a pum in a chau tai.

⁶Kengpêk ah kipat lujang tiang in, a natlona mawng mawng a um ta pua’n, thidup leh meimasia, thisan kang thei lo in a na’n, kuama’n mêkdok lo, tuam lo leh sathau nangawnle, a nu’ nuam puau hi.

⁷La gam uh nutsia’n a um ta’n, la khawpiteu mei in a kâng tum tai; la mit muu in la lou gateu chu, gam dang mite’n a ne zo tau hi; gam dang mite’n a nuaisia tâk ziak un, a hawm ah nutsia in a um zo tai.

⁸Zion chanu chu grep huan ah bûk lui gual leh, changmai lei honna dailîm gual leh, khawpi mi sal ah mat gam gual ah nutsia in a um tai.

⁹Sepai honte LALPA‘n tawmcha khat ei la hawil lo vâng leh, Sodom gual in a la um tai tiu in, Gomorrah gual a la hita ding I hiu.

¹⁰Nanghaw Sodom khua vaihawmte haw, LALPA kamsuak hi a la ngai tiam un! Gomorrah khua mipite haw, ka Pathian hilna thu hi a la ngai tiam un!

¹¹LALPA‘n zia gual hin a gen hi: La kithoinau zozaipi hi, kei â dingin bang phachuam a hem? Hâlmang kithoina ding ah kêlchal leh, gancha kivâkthau ka hau hi; bawgchalte, belamte leh, kêlchate thisan hi ka lop ta puai.

¹²Ka ma-âng ah la hung kilâk phat uh leh, ka In huang sung chuanchil ding bep ah, bang ding ah hung sek la hiu em?

¹³La kithoina thil latteu a thawn ahi; la gimtui uh haw le ka chimchâk hi. La thathak leh sabbath niteu leh, gûkkhel kawm ah khawmpi thupi tak ah la bawlteu hi, ka thokda lam tak ahi.

¹⁴La tha thak kûtteu leh, la kupiteu matdan zosiau, ka hinna’n a huat lam tak ahi tai; kei â ding ah jakda um leh ningtel um tak ahi tai.

¹⁵La khut ua lei hun bat phat ua leh, nang uh mu lo dingin, ka mit sêlmang ing ka; tam veipi pauchap maleu chin, ngaitha pua’ng ka; la khut uh thisan in a dim ta ngâl a.

¹⁶Kisil unla, kisil thiang un; ka mit mu ah kipat la thil phalo bawl uh lamang un; thil phalo bawl hâi unla,

¹⁷thilpha bawl zil un; vaihawmna dik hawl unla, tawden ah umte hukdok unla, nauchagate hûk unla, meithâite genpi un.

¹⁸LALPA‘n, “Tu’hin hung unla, ngaitua khawm hitiu, la gitlonateu chu puan sandup gual in um maleh, vûk gual in vâm in a; santhîp ziang ta maleh, samul vâm gual hung hi’n a.

¹⁹Thu la mat ua la nop phot uh leh, gam phatna hi hun ne’n la tin uh,

²⁰ahi’n, thu mang lo ah la huhel uh chun, chemjam in hun vai tan in a; LALPA kam in a la gen ta’ngâl a,” ti in.

²¹Bangtidan ah khawpi ginum chu, nawchizuak hung suak ziang thei a dia aw! dik tak ah vaihawm sek leh, diktatna dim ahi siat tawh, tu’hin la tualthat a hita mai a!

²²La dangka thîkteu a tui-êk zo ta’n, la uain uh tui tawh a kihel zo tai.

²³La lal chapateu chu a huhel zo tau a, guchate lawipha a suak zo tau hi. Mitin in golgûkna a ngainau ah, a thawn ah thil mu a del ui. Nauchaga a ngaisak puau a, meithâite buaina le a ngaisak ta puau hi.

²⁴Ziaziakchun, Hat Chungnung, sepai honte LALPA, Israelte lak ah Mi Hat chun: E hei! Ka mêlmate chung ah hin, ka lungnatna buntha’ng ka tin, ka gâlte chung in phuba la mai ing ka!

²⁵La chung ah ka khut lâm ing ka tin, nangma ah ki’dak bek chu, changaltui ah diakua gual in, sawp thiang ding ka hi.

²⁶Tichun, a lim ah gual khan, la vaihawmteu tungding kit ing ka tin, a lim ah kipat gual khan, la lemguattuteu kha le, tungding kit ing ka. Ziazaw chuleh, nang chu dikna khawpi leh, khawpi ginum, ti hung hita’n la.

²⁷Vaihawmna dik ziakin Zion chu hukdaw in um intin, chuleh, a sung ah chun a gitlonau haisan ah lungheite chu, dikna hukdaw in um in au.

²⁸Ahi’n, migilote leh thil hikhial te chu, hisiat khawm in um ta’n tin uh; chuleh, LALPA ngaisaklote chu, sukchimit in um in au.

²⁹La limpi ma ma gangpi thingte ziak ah chun mualpho ta’n la; huan ding ah la têlnau munte chule, la mualphonau hung hizaw ta’n a.

³⁰Gangpi thingdua zosia vuai ta leh, huan keu gawchâk tawhbang bep, hung hiding la hi’ngâl a.

³¹Mihat chule meikuangchaw ding ah kibawl, thingthem tawhbang bep hung hi’ntin, a thilbawl uh le meisi gual bep hung hita’n a; amau leh a thilbawl uh kâng tum khawm intin, a phelmit ding kuama um pua’n a.