Read Vaiphei ISAI 14 Bible Online

ISAI 14 - Vaiphei bible

ISAI 14

¹Himaleh, LALPA chun Jakob hun lainat kit intin, Israel chu hun têl kit ta’n a; chuleh, a gam uh tungding kit in a. Chuleh, gam dang mite tawh kizop ta’n tiu in, Jakob Inkuan lak ah hung pang ta’n au.

²Chuleh, namtin a mun un hun pui khawm kit intiu in; tichun, Israel Inkuante chun LALPA gam ah chun, namtin ah mite chu suak numei leh suak pawsal in nei ta’n au; amau sal ah a la mante kha sal in man zaw ta’n tin uh, amau a la tawdente kha hun tawden ta’n au.

³LALPA‘n la natna leh lunggimna kipat leh, gim tak ah na sepsak la hi’na kipat chawldamna a hun piak phat leh,

⁴zia gual hin Babulon lengpa chu êngho ta’n la: bangtidan ah mi tawden talo! bangtidan ah mi êngho talo!

⁵LALPA‘n mi nunsiate moltum chu a hibot piak a; vaihawmte lal tiangkhut,

⁶lungna tak ah mite chawlnga lo ah a jepna lal tiang leh, gentheina tawp thuak ah namtin chung ah, lungdam tik nei lo ah vaihawmna tiang chu a hi’bong tai.

⁷Khawvel pumpi chu chawldam in a muang ta’n; lim ah La sa’n a kikojak tau hi.

⁸Châk thing in la kiak niam a limpi in, Lebanon ah sidar thingte’n le, “Nang la kiak niam tâk ziakin, kei uh ei phûk ding kuama a hung ta puau hi,” ti’n a gen un.

⁹Nuai lam ah Sheol chule, nang hung chu a la dawn dingin a kichokphûl in; mithisate chu nang dawn dingin a chokphûl in, lei ah vaihawmte thagau a hiu; namtin lengte chu a lal chutphau ah kipat in, a kai ding sau sau ui.

¹⁰A leng un zia gual hin la kiang ah hun gen in au: “Nang le keihaw gual ah jawngkhal in la hung um tai maw! Kei uh gual in la hung tai maw!”

¹¹La lopina zosia tawh la thil githei git zosia husa tawh, Sheol ah pai lut ahi tai; thante chu la puanpha hi’ntin, than hon chu la puansil hita’n a.

¹²Aw jingsol, phalvak chapa, bangtidan ah van ah kipat hung ketha ziang la hem! Nang, namtin kiakniamsakpa, bangtidan ah lei tual chan ah, phûk pâi ah hung um ziang la hi tam!

¹³La lungthim in: “Van ah kal to ing ka tin, Pathian aksite chung lam ah ka lal chutpha koisâng ka tin; Zaphon tângsîp ah mipite kikhopna tâng ah hang chu’ng ka tin;

¹⁴sûmpite chung lam ah kal to in, Chungnung penpa gual ah um dingin kisiam ing ka,” ti’n la gêl a.

¹⁵Himaleh, Sheol ah paithâk in la um ta’n, lei kawkhûk thûk ah chun la tung tai.

¹⁶Nang hun mu zosia’n hun gâl et intin uh, zia gual hin hun gêl in au: “Zia mipa hi hilo maw lei chung choklîng ah, lenggam zosia kithinsak ah,

¹⁷khawvel pumpi gamkeu suak sak ah, a khawpite hi’chim sik sek ah, a suangkul tângte a In lam ua, kile’kit sak ngailo kha?” ti in.

¹⁸Namtin lal zosia lopi tak in, amau thân chiat un a lum tau a;

¹⁹maleh, nang vang la thân ah kipat, gamla tak ah pai mang la hi’n; thilmuat ki’dak um tak gual in, chemjam ah satlupte luang tawh, puan ah tuam khawm ah um in, Mithi khua tuanglai chan ah lut in, mithiluang kitawden gual bep la hi tai.

²⁰La mite that gam ah la gam la hi’siat tâk ziakin, a lak un kivui lo ding la hi. Thil phalo bawlte suan leh pâkte chu, a min uh le genkhâk in um ta ki’hen!

²¹A pateu gitlona ziakin a chapateu, thalupna ding hun guanggal in, lei hun lua ding leh, khawvel pumpi khawpite siam ah lua dim kit dingin, hung thodok kit kha’n au.

²²Sepai honte LALPA chun, amau do dingin kipan ing ka tin, Babulon min leh a hetzingna, a suan leh pâk zosia chu su’mang sik sek ding ka hi, a tii.

²³Buibawng chênna gam leh tui kidîlna mun suaksak ing ka tin; siatna munphi’n phiatnâm ding ka hi, sepai honte LALPA‘n a tii.

²⁴Sepai honte LALPA a kihâksial a: Bawl ka guat gual in hung um intin, ka guanggal dungzui in hung guitung ngei ding ahi.

²⁵Ka gam sung ah chun Assuriate chu hi’chimit ing ka tin; ka mualte chung ah chun palchek ding ka hi; ziaphat chuleh, a ngawngkol uh lâk thâk hita’n tin, a liangko ua kipat a puakgik uh lâk thâk hita’n a.

²⁶Zia hi lei chung pumpi hung tung ding ah, kiguanggal chu ahi; namtin chung in zia gual ah chun, ka khut thadok ding ka hi tai.

²⁷Sepai honte LALPA guanggal ahi ngal a, kua’n thulsak thei ding a hem? A khut a thâkdaw tâk ngal leh, kua a hem jukkitsak thei ding?

²⁸Lengpa Ahaz a thi kum in, zia thu hi a hung tung a:

²⁹Nang uh Philistin mi zosiate haw, nang uh jepna mol a bong tai ti’n lim ziang kiu in; gûlsuan ah kipat in gûlsia hung piang intin, ama ah kipat hung gadok kit chu, gûl meikuang lengthei hung hi nalai ding ahi ngal a, ti he tau in.

³⁰Migenthei cha masa chun an ne vâ intin, mi tasamte chu thamuang tak in lum hiat hiat ta’n au; maleh, la suante chu kial in thi’sak ing ka tin; la lak ua a suakcha sunte chu hun that nalai ding ka hi.

³¹Aw, kul kotkhak, patau in; aw khawpi, kap in; aw Philistia gam ah chêng zosiate haw, lau in tuitha zo tau in! mallam ah kipat in meikhu a hung pawt in, a lak un mi kilep mang khat chale a um puau hi.

³²Nam palai ah hungte chu kua’n bangti’n a dawnhu ta diam? “LALPA‘n Zion a tungding ah, a mipite lak ah tasamte chun, ama ah chun bitna mu ta’n au”.