Read Vaiphei ISAI 17 Bible Online

ISAI 17 - Vaiphei bible

ISAI 17

¹Damaska chungchâng thusuak chu: “Ngai un, Damaska chu khawpi hita pua’n tin, In chim them nên kisia bung hung hi bep ta’n a.

²A khawpiteu chule kumkhua nutsia hung hita’n au; gan honte tatna mun hung hi’ntin, kuama a naw lau ding umlo ah, thamuang tak ah a kualna mun uh hung hita’n a.

³Ephraim ah kulpite chu bei ta’n tin, Damaska ah kipat lenggam le bei ta’n a; Suria mite lak ah a thibang sunte chu, Israel chate lopina tawhbang bep hita’n au,” sepai honte LALPA chun a tii.

⁴“Ziaphat chuleh, Jakob lopina chu kainiam hi’ntin; a thauna chu sukgawn hita’n a.

⁵Chuleh, bu-âtte’n bukung ding lai a ât ua, a khut ua buvuite a lâk khawm ua, Rephaim Phâijawl ah buchang lâk khawm a, a um gual hun chu hung tung ding ahi.

⁶Oliv ga thinpul zaw lo, pani a hem pathum a hem — a jik sang lam ah thingga, pali a hem panga a hem kilo khial, bulêp ga gual in hung um ta’n au,” Israelte LALPA Pathian in a tii.

⁷Zia ni phat chuleh, mihingte’n amau Siamtu hun ja in, Israel Mi Thiangthopa lam hun en ta’n au;

⁸amau khutsuak mâichâmte leh a khutzung un a siamte leh, a dawikhuamteu, ahiloleh a gimtui hâlna mâichâmteu chu ngaisak ta pua’n au.

⁹Zia ni phat chuleh, a khawpi detteu chu Hivte leh Amor mi te’n Israelte ziak ah a nutsianau munte gual chu hung hi’ntin, a hawm ah nutsia hita’n au.

¹⁰Nang in la hukdamna Pathian la hemil ta’n, la kisêlna Suangpi chu la he’pha ta paw’ngal a; ziaziakchun, thâichi doi um tak tak te chîng malehchin le,

¹¹a mû la tû ni ma ma’ kêsak in, la tû jing ma ma’n pâkdok ziang maleh, a ga la lâk khawm guat ni chu, lungngaina leh sukdam theilo ding ah, natna ni’n hung chang in a.

¹²Katei, mipi tam tak tuisuagiat gi gual in, a so veng vung ui! Katei, namtin kitum in, tuisânglet husa gual in a kitum ui!

¹³Namtin tuisânglet husa gual in, a kitum lut lut ui; maleh, Pathian in amau chu vau intin, busi hui in a mut mang gual in, mual lak ah del chek ah um in, chîmpei in leivui a mûtlên gual in, gamla tak ah jam mang ta’n au.

¹⁴Nitâk lam ah tizat um maleu, jingkal khawvak ma’n bei ta’n au. Ei suamte chu zia gual chun hung um intin uh, ei chomnâm gawte chung in zia gual chu hung tung in a.