Read Vaiphei ISAI 18 Bible Online

ISAI 18 - Vaiphei bible

ISAI 18

¹Katei! Ethiopia luigâl lam, tha japgit kihiatna gam ah;

²phâiluang ah pum kisiam chung ah, Nail luipi dung ah kitawl ah, gam palai sawl sekte tak chu aw! Chia kin un, nanghaw thangko kin-gangte haw, a gam uh luiliante’n a khen uh, nam sâng leh mi tuai phate, a gamla leh a nai ah umte’n a kichâk uh, nam hat leh gal zo zingte kiang ah chun chiau in.

³Ngai un, nanghaw lei chung ah chêng zosiate haw, mualvum ah tepte’na diallap hung kikhâi ding chu en un! Pengkul a hung kimut phat leh a la ngai un!

⁴Zia gual hin LALPA‘n ka kiang in a gen ngal a: Sûnpi nilum lai tak gual leh, pawltâk khawlum lai ah jan daikia gual in, ka chênna mun ah kipat in thipbek in hun en suk ing ka.

⁵Grep ga law masang ah, a pâk a pul nung ah, a pâkte chu grep ga min a hung suak tau a; a selthakte chu chemkon in hâthiang intin; a bâkjamte chu sâttha’n a.

⁶A luang uh chu tânggam ah vachate nêk ding leh, gamsate nêk dingin nutsia hita’n au. Vachate â ding ah chun nipi sung sia nêk kham hi’ntin, gamsate â dinginle phalbi sungsia a nêk kham uh ting ta’n a.

⁷Zia hun phat chuleh, sepai honte LALPA â dingin kipakna thilpiak, mi sâng leh nal te, mi zosia tizat, a gamla leh a nai tuam ah mite, gâlhat leh guallel ngailote, luiliante’n a khenna gam ah chêngte chun, sepai honte LALPA min lamna, Zion tâng ah chun hun chawi khawm ta’n au.