Read Vaiphei ISAI 2 Bible Online

ISAI 2 - Vaiphei bible

ISAI 2

¹Judah leh Jerusalem chung thu ah Amoz chapa Isai thugen chu:

²Tu’nung lam leh LALPA In umna tâng chu, tâng sâng pen hung hi’ntin; tâng dang zosia sâng ah chawisa’n in um ta’n a; chuleh, namtin hung kitawl lut ta’n au.

³Mipi tam tak hung khawm intin uh: “Hung un, LALPA tâng, Jakob Pathian In ah chun chia to hitiu; a lampite I zuitheina ding ua, a lampite ei hiltheina dingin,” ti’n au. Zion ah kipat in dan hung pawt intin, Jerusalem ah kipat in, LALPA thu hung pawt ding ahi ngâl a.

⁴Namtinte kikâl ah vaihawm intin, mi tam tak chung thu lêl piak in a; tichun, a chemjamteu chu, loukaina dingin sêk ta’n tiu in, a thalchangteu chule, theikung hâthianna dingin sêk ta’n au; nam khat in nam dang do-na dingin, a chemjam pan kit ta pua’n tin, kido dan le zil ta pua’n au.

⁵Aw Jakob Inkuan ah mite haw, hung unla, LALPA vâk ah hin leng dial dial tai tiu!

⁶Aw Jakob Inkuan ah mite haw, la mipiteu lampi chu la kihei mangsan ta’ngâl un. Amau chu vang Philistinte gual ah âisân thiam leh, sualam gam ah mitvaidawi thiamte ah dim, gam dang mite tawh kizop matte a hiu.

⁷A gam uh sana leh dangka’n a dim a, hausakna lam ah chun a chintawk a um puai; a gam uh sakol in a dim ah, sakol kângtalai nei tam tâkluat ti le a nei puau hi.

⁸A gam uh milim in a dim ah, a khutsuak uh, amau khutzung ma ma’n a bawlsate chu a ho ui.

⁹Tichun, mipite chu kainiam a hitau in, mi tin chu kai thâk in um ta maleu, LALPA, amau chu ngaidam kin!

¹⁰LALPA lau umna leh a lalna, lopi tak ah kipat kisêlna dingin, suangpi bêl inla, leivui lak in kisêl in.

¹¹Mi kingaisângte chu hi’niam in um intin uh, mi kisathei zosia chu hi’tawm in um in au; zia hun chuleh LALPA bep chu, choisa’n ah um ding ahi.

¹²Sepai honte LALPA chun mi chapote, kingaisângte leh mite chung ah, kichawisâng zosia chung ah, vaihawmna ding ni a tiam ta’ngâl a;

¹³ziaphat chuleh, Lebanon ah sidar thing, lian tak leh sâng takte leh, Bashan ah gangpi thingte,

¹⁴tângsâng kisa leh mualte sâng ah lian kisa zaw te,

¹⁵gâlvenbûk sâng zosia leh kul det tak takte,

¹⁶Tarshish longlian leh, a khutsuak uh mêlpha tak takte chung in, hung tung ding ahi.

¹⁷Mihing kingaisânna chu hi’niam hi’ntin, mi tin kisaktheina chu hi’tawm in um in a; ziaphat chuleh, LALPA bep chu, choisân in um ta’n a.

¹⁸Milim zosia hisiat dim dem in hung um ta’n a.

¹⁹Lei chung hilau ding ah a hung kuan phat leh, LALPA lalna a lopi ding ziak leh, a lau um ma ma ding ziakin, suangpi kawlhawm leh, lei kawhawmte ah chun tâi lut un.

²⁰Ziaphat chuleh, a ho ding ua a bawl uh, a sana leh dangka milimteu chu, bûi leh bâkte chênna ding bep in, pai mang ta’n au;

²¹lei chung hi’lau ding ah a hung phat leh, LALPA lau umna leh a lalna lopi tak ziakin, suangpi kêk kâl leh kawlpûk kâl ah chun kisêl mang ta’n au.

²²A nâk ah hattheina ziak bep a, mihing thitheite hi nusia in, bang ah pang ding a hiu em?