Read Vaiphei ISAI 20 Bible Online

ISAI 20 - Vaiphei bible

ISAI 20

¹Assuriate lengpa Sargon in a sepai hotu lianpen, Ashdod khua do ding ah a hun sawl kum ah khan,

²Amoz chapa Isai kiang in LALPA‘n zia gual hin a hun gen a: “Chia in la, la kawng ah saidip puan chu liptha’n la, la kengtawdap khale sût in,” a hun ti’n. Tichun, a ti gual ah chun ama’nle a bawl ah, ngawnchang leh kengtawdap bei in a chia a.

³Ziaphatchun, LALPA‘n, “Ka nasêmtu Isai in, ngawnchang leh kengtawdap bei ah, Aigupta leh Ethiopia chung ah thil hung tung ding tepte’na leh, etsakna ding ah kum thum sung a vâkvel gual hin,

⁴Assuria lengpa’n, Aigupta mite chu suangkul ngak ding ah man in, Ethiopia mite chu sal in pui ta’n tiu in, a têk a khang, nîk leh puan bei leh kengtawdap bei in, Aiguptate sukmualphona dingin pui in a.

⁵Chuleh, a kinepnau Ethiopia leh a kisuanpiu Aigupta ziak ah chun, lungdong leh lungjing in um ta’n au.

⁶Zia ni phat chuleh, Philistia tuisuagiat pangjul ah chêngte chun, ‘En tiam u, Assuria lengpa a hung phat leh I bêl ua, ei hukdok ding ah I la kineppi tak uh chu aw! Bangti leu hin I suakcha thei ta diam uh?’ la ti’n au,” ti’n a gen a.