Read Vaiphei ISAI 21 Bible Online

ISAI 21 - Vaiphei bible

ISAI 21

¹Tuisuagiat ah gamthip Babulon siatna ding chungchâng ah thusuak chu: Negeb lam ah chîmpei hung hâng gual in gamkeu ah kipat in, siatna tizat um tak in a hung hi.

²Thil tizat um tak hung tung ding chu ka kiang in a gen a; dawha thûk tak ah bawlpa chun dawha’n a hun bawl ah; thil hisepa chun a hun hise malam pek hi. Aw Elam, Chia to in! Aw Media, hung ûm chimit tau in; Babulon in a hilung ngaisak zosia hun hi’bei ding ka hi tai.

³Ziaziakchun, ka kawng leh jang a na zo ta’n, numei nauvei gual in ka tai a nai; ka het theilona dingin kainiam in ka um in, ka mu theilona dingin hi’buai in ka um tai.

⁴Ka lu a hâi in, lauthawng in ka dîp a kaw tai; nitâk thimbut ka ngâkla ma ma chu, lau ah kithinna hun a chang tai.

⁵Annêkna dawkan a daw un, chutna phêk a phau in, a neu in, a dawn tau hi. Sepai hotute haw, kipan unla, la phaw’u sathaunu’ un!

⁶Zia gual hin LALPA‘n ei hun hil a: “Chia inla, gâl entha koi inla, a thilmu taphot hun puang hen.

⁷Sakol chung ah a kop kop ah chuang a mu ah, sabiltung leh sangawngsau chung ah chuang, a mu ngei ngei chun, gun chu tak in a la en hen la, hetchian gaw tei tei hen,” ti in.

⁸Gâlvêngpa chu a hung kikodok a: Aw LALPA, nitum in gâlvênbûk chung ah chun, ka dingin; jan khawvak in ka dinna mun ah chun, ka chângpang zing hi.

⁹En tiam in, zia son sakol chung chuang sepaite a hung ui; a kop kop in sakol chung chuang gâldo mite, a hun ti’n, ama’n a hun dawnhu a. Gâlvêngpa ma ma chun: Babulon chu a pûk tai! A pûk tai! A sung ah a pathian lim zosia le, lei tual ah sêgawp in a um tai, a hun ti’n.

¹⁰Aw, ka buchilsa leh jap thiansate haw, sepai honte LALPA, Israel Pathian ah kipat, ka hiatte chu la kiang un ka hun tâklang hi.

¹¹Dumah siatna ding thu chu: Seir ah kipat in mi khat in ei ko a, Gâlvêngpa, jan a bei vang tam? Gâlvêngpa, jan hi bei vang nai lo a hem?, ti’n ei hun dong a.

¹²Gâlvêngpa chun, Jingkal hiding ei tai, jan le hung hikit pai ta’n a. La nop leh hun dongkit inla, hung kit in, ti’n a dawnhu a.

¹³Gamkeu ah phâijawl siatna ding thu chu: Aw Dedan, sangawngsau hon pui a khualzin mite haw, gamkeu phâijawl ah thingbuk lak ah giak un.

¹⁴Aw, Teman gam ah chêngte haw, dangchâkte dawn ding tui piau inla, gâljamte chu nêk ding an piau in.

¹⁵Chemjam ah kipat leh chemjam jukdawsa lak ah kipat leh, thalpi kiloisa, kido’na lau um tak lak ah kipat hung taidok ahi ngâl un.

¹⁶Zia gual hin LALPA‘n ka kiang in a gen ta’ngâl a: Mi kithalawte sim dan gual ah, kum khat sung in Kedarte lopina zosia chu hung bei ta’n tin;

¹⁷Kedarte gâlkap haw thalpi um nalai chu tawm ma ma ta’n a; Israelte Pathian, LALPA chun a la ti ta ngâl a.