Read Vaiphei ISAI 23 Bible Online

ISAI 23 - Vaiphei bible

ISAI 23

¹Tura siatna ding thu chu: Aw nanghaw Tarshish longliante haw, kap tau in; la kulpiu chu hisiat ahi ta’ngâl a. Kupra ah kipat a hung tun un, zia thu chu a he bep ngâl a.

²Aw tuisuagiat pangjul ah chêngte haw, thip chil chel tau in! Aw Sidon ah sumkawlveite haw, tuisuagiat chung ah chia in,

³tuipi lian tak chung in a um un; la sum nâk chu Shihor bute leh, Nail lui ah bu kila khawmte chu a hiu a; namtin kiang in la kivei hi.

⁴Aw Sidon, zakcha ta’n, tuisuagiat ah kulte chun, “Nau la ka vei pua’n, nausen le ka nei diak puai; chapa la ka don ngai pua’n, chanu le ka don kha diak puai,” a tiu a.

⁵Khual thuthang chu Aigupta gam a tun phatin, Tura chung ah thil tung a het ziak un, thavai ma ma in au.

⁶Aw nanghaw, tuisuagiat pâm ah chêngte haw, patau unla, Tarshish lam in gâl kâi tau in!

⁷Zia khawpi hi maw khawpi kumlui leh la kisaktheipi ma mau. Ama keng ma ma ah gamla tak tak ah tawmang ah um chu!

⁸Zia Tura khawpi, lal tam tak siamdokpa, ama ah kiveite lalchate sua ah, ama ah punna hawlte khawvel ah mite ja pen ah tungdokpa chung ah zia gual siatna hi, kua guanggal ahi tam?

⁹Sepai honte LALPA guanggal ahi, mi lopite kisuanpi zosia bangmalo sua ding leh, lei chung zosia’n a ngaisân uh hi’mualphona dingin.

¹⁰Aw, Tarshish longliante haw, la gam lam un gâl kâi un; zia tak hi longcholna mun hita lo ding ahi.

¹¹LALPA‘n tuisuagiat chung in a khut a lâm in, lenggamte chu a kilîng tai; Kanaante kulpite chu hisiatpiak dingin thu a pia tai.

¹²Zia gual hin a gen hi: Aw, tawden ah um nungak thiangtho Sidon chanu, kipakna him him nei ta pua’n la; kipan in la, Kupra lam ah gâl kâi in, zia tak ah chunle muang in um diak pua’n la.

¹³Kaldaite gam chu vak en tia! A gam ua mipite a hiu; Assuriate a hipaw veu! Gamsate chênna ding bep in Tura chung thu a lêl ui. A gâlvenbûk dingteu a siam un, a sung ah lal Inte pheljak in, khawpi chim a sua ui.

¹⁴Aw, nanghaw Tarshish longliante haw, patau un, la kulpiteu chu hisiat zaw ahi ta’ngâl a.

¹⁵Zia hun ah kipat chun, lal pakhat dam sung hû, kum sawm sagi sung chu Tura hetmil in hung um ta’n a. Zia kum sawm sagi chu a bei phat chuleh, Tura chu nawchizuak chungchâng La ah kiphuak gual hin um ta’n a:

¹⁶Nang hetphâk ah um talo nawchizuak, la tingtang chu la’n la, khawpi sung chu hun fang tiam in! hetdaw ah la um kit theina dingin, ngainop um tak in La hun sa’n la, La tam tak hun sa ta’n.

¹⁷Kum sawm sagi a bei phat leh, LALPA‘n Tura chu hun kantha kit in a; ziaphat chuleh, a kiveina lam ah kile’kit intin, khawvel ah lenggam zosiate kiang in kizuak thâng kit ta’n a.

¹⁸A veipun leh a lawdawte chu, LALPA kiang ah lat thiantho in hung um ta’n ah; a lawknate chu koltup in khol pua’n tin, a veipunte chun LALPA tawh ah umte nêk ding leh sil leh chên pha tak tak kiningting tak in pia ta’n a.