Read Vaiphei ISAI 26 Bible Online

ISAI 26 - Vaiphei bible

ISAI 26

¹Zia ni phat chuleh, Judah gam ah zia La hi sak hunghita’n a: Khawpi det tak I nei ui; gual zaw’na chu kulbâng leh khawpi ûmna gual in a siam hi.

²A ginnau vopdet zing mifelte chu a luttheina ding un, kul kotkhakte chu hong un.

³A lungthim nangma chung bep ah nga’n, nang bep hun taksangte ngei chu, thamuanna dik tak piak hi’n au.

⁴Bangtik lai inle LALPA chu ging in, LALPA JEHOVAH, kumtuang suangpi det tak chu, la nei ngal a.

⁵Mi kingaisângte chu kainiam in, khawpi kiletsak chu a susia ta’ngal a. Leitual tawh kikim in a kainiam a, leivui lak in a paitha tai.

⁶Migentheite leh mi vaichate keng ah tawden a, pal lumlet in um ta’n au.

⁷Midiktatte lampi chu a nâm ah, Nang Midikpa chun midikte lampi chu, la hi’ngil piak sek hi.

⁸Aw LALPA, la vaihawmna lampi chun, nangma chan bep ka la ngâk ui; la min leh la minthanna chu ka thangai pen uh ahi.

⁹Jan phat leh ka hinna’n a hun thangai sek in, ka sung ah ka thagau hin gunchu tak in a hun hawl sek hi. Lei chung ah vai la hawm phat leh, khawvel ah chêngte hin felna chu zil ding ahi ngal un.

¹⁰Mi nunsiate chu doisak hi maleu, felna a zil nuam diak puau in; dik tak ah chêngte gam ah hin, lepchia tak in a bawl sek un, LALPA ja’umna chule a mu ngai puau hi.

¹¹Aw LALPA, la khut chu la tha tai, maleh, zia chu a mu puau hi. La mite â ding ah la phatchuam ngaina hun muu hen la, mualpho tau hen. La mêlmate â ding ah meikuang chun, kâng tum ta hen.

¹²Aw LALPA, kei uh â dingin, thamuanna chu hi’det ding la hi’n; nangma’n ka thilbawl zosiau, lei sukpitin piak ta’ngal a.

¹³Aw LALPA, ka Pathian uh, nangma tilo hotu dangte’n, ka chung un vai a hawm un, maleh, nang min bep suang ing kau.

¹⁴Amau chu a thi tau ah, hing kit ta pua’n au; a thagau uh le tho’kit ta pua’n au, nang in amau chu gawt in la hi’mangthai ta’n; a hetzing theinau zosia la nuai mang ta’ngal a.

¹⁵Aw LALPA, nang in namte la hi’pung ah, namte nang in la hi’pung tai; nangma chu chawihoi in la um tai; nang in gamgi zosia la kêklian tai.

¹⁶Aw LALPA, lungdonni’n a hun hawl un, la thununna a chung ua a tun phat leh, la kiang ah pauchapna a sungtha sek ui.

¹⁷Numei nauvop, a nau suak ding kuan ah na sa talua’n, kilek lumlet ah peng peng gual in, aw LALPA, nangma ngai in ka kap ui;

¹⁸nau ka vop un, nat ka thuak ui; maleh, ka naunei uh chu hui mai ahi. Lei ah hin bangma pachanna ka nei puau in, khawvel lua ding cha khat chale ka hing puau hi.

¹⁹La mithite chu hung hing kit intin uh, a luang damsau chu hung thodok kit in au. Aw nang uh, leivui chang zo sate haw, hung hal unla, kipak in La sa tau in! La daitui chu daichîm ahi’n, kum sawtpi a la thi tate chu, lei in hun hinsak kit in a.

²⁰Hung un, ka mite haw, la pindan un lut unla, kot kikhak khum tau in! Lungnatna hun a bei masia, hun chomkhat vakisêl mang tau in.

²¹Zia lei chung ah chêngte bawsiatna gawt dingin, LALPA chu a umna kipat hung pawtdok ding ahi ngal a; lei hin a chung ah thisan kisua chu hun tâklang ta’n tin, a mi tha’lupte chu sêlgu ta pua’n a.