Read Vaiphei ISAI 27 Bible Online

ISAI 27 - Vaiphei bible

ISAI 27

¹Zia ni phat chuleh, LALPA chun a chemjam hiam tak, thupi tak leh hat tak chu mang in, gulpi lengthei Leviathan gulpi kikual ngiau nguau chu hun gawt intin; chuleh, tuisuagiat ah dragon chu hun that in a.

²Zia ni phat chuleh: Grep huan pha tak chung thu’n La hun sa ta’n au!

³Keima LALPA hi a enkolpa ka hi’n, chawlnga lo in tui ka buak hi. Kuama’n a hi’siat lona ding un, sun leh jan in ka vêng hi.

⁴A chung in lungnatna ka nei puai. Hampa lingnei leh khauguite ngen, a hung piandawu chun, a leng un vât tha’ng ka tin, hâl tum mai ding ka hi.

⁵Ahiloleh, a bitna ding un, ei hung bêl vânglak ziang uh hen la; Ka kikâl un kilemna hung bawl uh hen.

⁶Tu’nung leh, Jakob in zung hun tha’n tin, Israel hung hingdok kit in hung dawndok kit intin; tichun, khawvel pumpi a ga hung dim kit ta’n a.

⁷Amau jeppaite LALPA‘n a la jep pâi gual in, amau le a la jep pâi kha ta a hem? Ahiloleh, amau thattute a la thâlup sik sek gual in, amau le a that ta bek em?

⁸Amau chu nawdawna sal ah pui mang in a umsak ah, a lungnatna’n sualam thigawpi a mût mangsak tai.

⁹Zia jal ah chun Jakob mawna zosia sukthian hung hi’ntin, zia chu a gitlona zosia noimangna hita’n a; mâichâm ah suang te, suangmuat gual ah gawtbuang a hung hi’phat leh, dawikhuam leh mâichâmte â ding um ta pua’n a. Asherim zosia leh gimtui hâlna mâichâm zosia, a dial zo um ta pua’n au.

¹⁰Kulbâng ah ki-ûm khawpi chu, nutsia in um intin, chênna munte chu nutsia leh jamsan ah um in, gamthip chang ta’n a. Zia chun bawng no ta hiat hiat ta’n tin, a nop a ning ah kual in, a dua selthakte chu ne gam ta’n au.

¹¹Thingbâkte chu a hung keu phat leh, nutsia in a um un; numeite’n thingkhua dingin a mang sek tau hi. Zia namte hi hetthiamna neilote ahi ngal un; ziaziakchun, amau Siampa chun, lainatna nei ta pua’n tin, amau a la guanggalpa chun a chung un, doisakna hi’lang ta pua’n a.

¹²Zia ni phat chuleh, Euphrates luipi kipat Aigupta Wadi tiang in, buchil in hun chil in a; chun, aw Israelte haw, pakhat khat ah lâk khawm in hung um ta’n lau.

¹³Chuleh, zia ni phat chuleh, pengkul lian tak chu mût hita’n a. Ziaphat chuleh, Assuria gam ah matsua ah umte leh, Aigupta gam ah nawmang ah um zosia chu hung khawm in, Jerusalem ah tâng Thiangtho ah chun LALPA hung ho ta’n au.