Read Vaiphei ISAI 28 Bible Online

ISAI 28 - Vaiphei bible

ISAI 28

¹Ephraim ah zukhamte kiletsakpi ah, pakcha lal lukhuk mêlpha ma ma, pakcha gual ah vuaitha mai ding, zungolvei ah dim phâijawl, gam phatna zosia chung ah vaihawm ah, kiletsak ma mate chung chu a gik hi!

²Ngai un, LALPA‘n mi hat tak leh, thil hi’thei tak khat thigawpi leh, gial kithua gual, tuikhanglian gual ah hat, thil tokmang zo a nei in, ama chu lei tual ah hun septha ding ahi.

³Ephraim zukhamte kiletsakpi, pakcha lal lukhuk chu a keng in chuan dên ding ahi.

⁴An tui tak takte ne ah, kivakthaute luchung ah um, mêlphatna lopi pakcha gual ah mual tha ziang chu, nipi tunma theipi ga min masa gual hung hi’ntin; a maikha taphot in a nêk zaw ziang gual hiding ahi.

⁵Zia hun chuleh, sepai honte LALPA chu, a mipi um nalai sunte â dingin, a lopinau pâkcha khî leh, a lallukhuk uh jemna hung hita’n tin;

⁶vaihawmna chutpha kichute â dingin, a dik hiattheina thagau hi’ntin; mêlma’n khawpi a bulu lai ua, kul kotkhak bul ah gâlte, a la le’naw kitte â dingin, hatna hung hi’n a.

⁷Amau hinle uain a dawn kham un, zukha kham in a hoi dong dong ui; thiampu tawh jawlneite’n le zukha a dawn kham ui. Uain dawn ziakin a ngaituanau a buai zo ta’n, zukha dawn kham ziakin a hoi dong dong tau hi; a kilâkna muu le a dik ta pua’n, a thutannau in a kisui tau hi.

⁸Dawkan zosia luak in a dim zo ta’n, a thianna mun a um ta paw’ngâl a.

⁹Hetthiamna chu kua a hil guat a, a thu chu kua kiang ah a hilchian guat a hita diam, nawichep hâi pan pante leh, nawichep lai kikaithate kiang ah maw?

¹⁰Thuhilna chung in thuhilna ma, thuhilna chung ah thuhilna ma; a tian tian ah tianto ding, zia tak ah hin neukhat, zia tak ah sawn neukhat ahi ngâl in.

¹¹Ahi, pauchuam mite leh, gam dang mite pau in zia mite kiang ah hin, LALPA‘n thu hun gen ding ahi:

¹²“Zia tak hi chawldamna mun ahi, thachawlte chu kichawldam sak un; zia tak hi kidaithâna mun ahi,” ti’n a kiang un a la gen ta maleh, a ngaisak nuam puau hi.

¹³A chiau ah a kithal pûk un, a kisegawp ah, thâng ah a awk hi; sal ah mat a hitheina ding un, a kiang ua LALPA thugen ding chu zia gual hi ahi: “Thuhilna chung ah thuhilna, thuhilna chung ah thuhilna; a tian tian ah tianto ding, a tian tian ah tianto ding; zia tak ah hin neukhat, zia tak ah sawn neukhat,” ti in.

¹⁴Ziaziakchun, nanghaw Jerusalem ah kipat, mipite chung ah vaihawm, mi musitte haw, LALPA thu hi a la ngai un.

¹⁵Nanghaw chun la, “Thi’na tawh thuthung ka siam un, Sheol tawh kihocham ka hiu; huaisia tak ah jepna hung tung maleh, ei uh chung in tung pua’n a; zuautheina chu kisêlna’n ka mang un, diklona lîmbêl ka hi’ngâl un,” la tiu a.

¹⁶Ziaziakchun, LALPA PATHIAN chun: “Ngai un, Zion ah chun, a suangphûm patna dingin suang pakhat, etchianna suang — suangphûm lûl tak khat chu ka lem in, ‘Ama ging taphot chu zakcha pua’n au!

¹⁷Vaihawmna dik chu a khauzang in mang ing ka tin, dikna chu a suangkhai in mang ding ka hi; zuautheina kisêlte chu gial in tokmang intin, a kisêlna dailîm uh chu tuisânglêt in chûm mang in ah’ ” ti’n a gen a.

¹⁸Zia phat chuleh, thi’na tawh la thuthung uh chu, bangmalo suak ta’n tin, Sheol tawh la kiho chamnau chu, bangma’n hung pang ta pua’n a; jepna hun a hung tun phat leh, zia chun hun jep pâi ta’n a.

¹⁹A hun a tun si’n leh hun jep intin, jingkal si’n leh hun pha’n tin, jan si’n leh hun pha sek in a; a thugen hetchian chu, a tizat um zaw diak hung hi’n a.

²⁰Lupna chu kithuan zanna dingin chom ta lua’n tin, puansil chu kihuina dingin neu talua’n a!

²¹LALPA chun lamdang tak ah thil a bawlna ding leh, thil lamdang takte a bawl mualsuana dingin, Perizim mual ah gual khan hung kipan intin, Gibeon guam phâi ah gual khan, hung lungna kit ding ahi. A thilbawl ah lamdang! A thil hi ah lamdang tak chu ahi’pitin theina dingin, LALPA chu Perazim tâng ah a kipat gual khan, hung kipan kit intin; Gibeon phâijawl ah a lungnat ma ma gual ah khan, hung lungna kit ding ahi ngâl a.

²²Ziaziakchun, tu’hin musit kin, achutiloleh la kolbute chu hi’det deu deu hikha’n a; sepai honte LALPA PATHIAN in lei chung pumpi, a hisiatna ding thu tawp a bawl thu ka he ta’ngâl a.

²³La nakhang uh a la dawu inla, ka thugen hi a la ngai un; ngai unla, ka thugen hi a la he tau in.

²⁴Thâi chînna ding ah lou kaipa chun, chawl lo in a kai zing ziang em? A lei kãl leh khet buang bep bep chu, a bawl zing ziang a hem?

²⁵A lou chu a kai gual zaw phat leh, lengmasel leh pathikhawm mu’ chu the’ in, gehubu a tian in a the’ a, mîm chule a chînna ding mun, loubân jul in a the’ hilo a hem?

²⁶A Pathian in a bawl ding dan dik a la hil ah, a la zilsak ahi ngâl a.

²⁷Lengmasêl chu buchilna khel khel ah chil a ngai pua’n; pathikhawm chu kângtalai gawtsak ahi diak puai; lengmasel chu molkang ah khet pul ziang thei ahi’n, pathikhawm chule tiangkang ah khet thian ziang thei ahi.

²⁸Vaithum dingin anchang chu sukbuang a hisek, ahi’n la, kuama’n a chilthaw ngai puau hi; kângtalai leh sakol a chilsak un, maleh, a gawt buang diak puai.

²⁹Zia thilte haw hile, sepai honte LALPA ah kipat hung pawt ahi; a lemguat dan in a mak ah, pilna’n le a chungchuang hi.