Read Vaiphei ISAI 29 Bible Online

ISAI 29 - Vaiphei bible

ISAI 29

¹A hei! Ariel, Ariel, David chênna khawpi la chung a gik hi! Kût nite chu a kithâk suak masia a kum a kum in belap hi hen.

²Ahi’n la, Ariel chu hi’lungdong ing ka tin, lusûnna leh kâna hung um in a; kei â dingin Jerusalem chu, Ariel gual hung hita’n a.

³David gual in hun ûm kîmvêl ing ka tin, nangma do-na dingin leibângte, gâlvên bûksangte hun siam khum ing ka tin, hung bulu ding ka hi.

⁴Ziaphat chuleh, lei nuai lam thûk tak ah kipat in, hung paudok inla tin, la pau git chu thûk tak ah kipat in, leivui lak ah thi ta pau git gual in hung hita’n tin; tichun, la pau git chu leivui lakah, hung gidok chiau chiau ta’n a.

⁵Himaleh, la mêlmate chu vang, leivui nêl gual bep hi’ntin uh, mi khawksak bei ah tawite chule, busi hui in a taw mang gual bep hung hita’n au. A kigin lo kâl un phutlo in, zia gual siatna chu a chung un tung intin;

⁶nangma chu vang sepai honte LALPA‘n van-gi tawh, linlîng tawh, husa nasa tak tawh, chîmpei tawh, thigawpi tawh, meipi kuang tawh kithua in, hung kantha ta’n a.

⁷Chuleh, Ariel hung do zosia, a kul dette do a, hi’lungjing ah hung pang nam zosiate chu, mang lam gual leh jan ah lunggêl gual bep in, hung um ta’n au.

⁸Zion tâng sim ding ah hung kuan, namtin lak ah mipite chu, mi gilkial in a mang lam ah an a nêk ah, a khatlaw phat leh a gilkial pha diak lo; mi dangchâk in a mang lam ah tui dawn ah, a khatlaw phat ah dang hul ah a chau zing gual ah chun, um ding a hiu.

⁹Ki-ngolsak unla, ngolden tau in, kimulosak unla, mitthûm den tau in! Dawn kham un, zu chu hilo in; hoi dong dong tau in, zukha kham chu hilo in!

¹⁰LALPA‘n i-mut thûtna thagau la chung un, a hun buntha ta’n, nang uh jawlneite, la mit uh a hun tuam piak tai; nang uh mulawk theite, la luchang uh a tuam piak tai.

¹¹Nang uh â dingin zia thil hung tung ding kilâkna zosia hi, lekhabu kichâlmat sung ah thu kijik gual bep ahi ngal a. Mi khat in zia lekhabu chu a sim thei khat kiang ah pia’n, “Hun sim tiam in,” ti leh, ama chun, “Ka sim thei puai, a kichâlmat ahi hilam,” ti ding ahi.

¹²Chuleh, zia lekhabu chu lekha simtheilote kiang ah pia kit uh hen la, a kiang un, “Hun sim tiam un,” tileu; amau chun, “Lekha ka sim thei puau,” a la ti kit ding a hiu.

¹³LALPA‘n zia gual hin a gen a: “Zia mite hin kamthiam in ei nai un, mûk thiam in ei ja’bawl un, a lungthim uh vang a gamla ma ma hi; keima ei biaknau chule, mihing thupiak dangnâl thu ah zil thiamna mai mai ahi;

¹⁴ziaziakchun, ngai un, zia mite chung ah hin, thil kidang leh mak tak, thil lamdang tak chu hun bawl nalai ding ka hi; a mi pilteu pilna chu bei ta’n tin, lem hete lem hetna chule, sêlgûk hi zo ta’n a,” ti in.

¹⁵Nang haw lemhiatna LALPA ah kipat, thûk tak ah sêlgûk ding ngaitua leh, a gûk ah thilbawlte, “Kua’n ei mu em? Kua’n ei he em?” tite haw!

¹⁶Bangkim la le’bul zo tau in! Bêlsêkpa chu tungman gual ah ngai thei ding a hia hem? A khutsuak in a siamtu kiang in, “Nang siam ka hi puai,” a ti ngai em? Ahiloleh, bêl chun bêlsêkpa kiang in, “Bangma la hepuai,” a ti ngai em?

¹⁷Sawt lo cha nung leh, Lebanon chu lou gam pha tak, a hung hi’na ding leh, lou mun phatna chu gammâng, a hung suakna ding hun chu, hita lo ding a hem?

¹⁸Zia ni phat chuleh, bengngongte chunle, lekhazial sung ah thute chu hethei ta’n tin uh; mitthûmte mit chunle, khawthim nuai leh thim lak inle, khua hun mu thei ta ding ahi.

¹⁹Mi nunnem chun LALPA ah kipat kipakna thak chang intin, mite lak ah migenthei chunle, Israel Mithiangtho ah chun lim ma ma ta’n a.

²⁰Mi khawksak beite chu bangmalo hung hi’n, mi musitte chule hi’mangthai ah um in, thil phalo bawl ding chânggu zosia leh,

²¹a kam ah thu ah mi tawh kihêkna ah, a dik zaw zawn sakte, kul kotkhak bul ah vaihawmte awkna ding siamte leh, mi thudik ah pangte dikna ah vaihawm piaklote chu, sukmang ah hung um ding a hiu.

²²Ziaziakchun, Abraham a la hukdokpa LALPA chun, Jakob Inkuante chungchâng thu zia gual hin a gen hi: Jakob chu mualpho ta pua’n tin, a mai le mual ta pua’n a.

²³A lak ua ka khutsuak a chateu chu a mu phât uh leh, ka min hi’thiangtho ta’n tiu in, Jakob Mithiangtho chu hi’thiangtho ta’n tin uh, Israel Pathian chu lau ta’n au.

²⁴Thagau ah hi’khialte chun, hun hethiam ta’n tiu in, phunchiakte chunle, zilsakna thu pom thei ta’n au, ti in.