Read Vaiphei ISAI 3 Bible Online

ISAI 3 - Vaiphei bible

ISAI 3

¹Tu’hin, Bangkim hi’thei, sepai honte LALPA chun: Jerusalem leh Judah mipite kingakna, a nêk leh dawn, a matchâk leh, a tuinâk zosiau tawh,

²mihat leh a sepaiteu, a vaihawmteu leh jawlnei, âisân thiam leh mi kumluite,

³sawmnga pawl ah hotu leh mi ja’um, lemguat thiam leh âisân thiamte leh, mitvaidawi thiam zosia chu, ladok ding ka hi, a tii.

⁴Tichun, naupangte a lal ding un pia’ng ka tin, nausente’n a chung un vaihawm ta’n au.

⁵Mipite chu nuaisia in um intin uh, mitin kua a hem khat nuaisia ah um in, mitin a Invêngteu nuaisia in um in au; chapangte le miluite chung ah, kiletsak tak ah hung um in, mi thulimlote nasan le, mi ja’umte chung in hung kiletsak in au.

⁶Mi pakhat in a chanaupa, amau phung sung ah mi man intin: “Nang in puanâk chual bêk la nei hi; ka hotuu ah pang inla, zia thil sia kisiavum hi la thunuai ah um ta hen,” hun ti’n a.

⁷Himaleh, ama chun: “Liakhutu in pang thei pua’ng ka; ka In sung ah nêk ding leh, sil leh chên bangma ka nei puai; mipite hotu’n ei pansak kin,” hun ti’n a.

⁸A kamsuak leh a thilbawl dan uh, LALPA dodâlna leh pâmpaina ngen ahiziak in, Jerusalem chu a kisui ta’n, Judah chu a kipûk tai.

⁹A maisua mai unle a diklo dan uh a tâklang un; a gitlonau sêlmang malak sâng in, Sodom gual in a tâklang zawu hi. A chung uh a gik na e!

¹⁰Mawna neilote chun a khut sepgim gau, ne ding a hiziak un, mi vangpha ahi dan uh hil in.

¹¹Thil bawlkhialte chung a gik na e! A thil bawl khial uh tawh kigûn in, a chung un bawl thuk hiding a hiziak un, mi vangsia ahi nau e!

¹²Ka mipite haw, naupangte chu a chuanden in a pang tau in, numeite chun a chung un vai a hawm ui. Aw ka mipite haw, la puituteu in a hun pui khial tau in, la lampiteu a subuai zo tau hi.

¹³Thupi gen dingin LALPA a kipan tai; a mipite chung thu tan dingin a dingdok hi.

¹⁴LALPA‘n a mipite lak ah upate leh, lal chate chung thu vaihawm dingin a lût hi; grep huan ne zo chu nang uh la hiu a, gentheite suam gam chu, la In sung ua umte ma a hiu.

¹⁵Migentheite la gawtnawi un, ka mipite la khet gawp uh chu, bang la ti’nau ahi em? Sepai honte LALPA PATHIAN in a tii.

¹⁶LALPA‘n zia gual hin a gen hi: Zion chanute kisathei tak ah ngawng thekawi leh, mittêt sâng tak ah, kikhaw awt awt ah chia ah, a kãl uh a suan git lok lok ziak un;

¹⁷Zion chanute puitu zosia chu, LALPA‘n meimasia’n gawt intin, LALPA‘n a zamawu hawkdaw piak in ah, ti in.

¹⁸Ziaphat chuleh, LALPA‘n a kengngawng ua a telneng bûteu, a lugâknau leh a ngawng awteu,

¹⁹a bil ua bilbâ, chaucha leh a dial aw teu,

²⁰a samgâknateu, chautawnteu, kawnggâkteu, gimtui bawmteu, a hisia do-nateu,

²¹a suai namnau khutsebiteu, nâkbuteu,

²²a kipakna puanteu, a mai khû puanâk, a puanchualteu leh, a sakhau choi lai teu;

²³a kicheinau, a puan malngatteu, a dialkopteu leh a maikhûnateu zosia lâkpiak ta’ng ka, a tii.

²⁴A gimtui uh ui ta’n tin, a ngaltuamnau thasâng un khauhual; a sam uh pha tak ah het malak sâng un, a luchang uh kol intin; puan man tam lopi tak malak in, saidip puan khu’khum hita’n tin; a mêlpha thei pen ah kithuam malak sâng in, zachatna’n kithuam ta’n au.

²⁵Mipite chu chemjam ah thi’n, la galhatteu chu kidona’n thi’n au.

²⁶A kotpiteu chu lusûn in, kâ La’n awi ta’n au; hisiat dim dem ah um in, suksiatsa’n tual ah kichu ta’n au.