Read Vaiphei ISAI 32 Bible Online

ISAI 32 - Vaiphei bible

ISAI 32

¹Ngai un, lengpa chun dikna’n vaihawm intin; lal chate’n le thudik in vaihawm ta’n au.

²Amau chu hui lak ah kisêlna, thigawpi lak ah kihumbitna hi’ntin uh, gamkeu ah luicha tui luang leh, gamkeu cholmun umlo’na suangpi lîm gual hung hita’n au.

³Ziaphat chuleh, mutheina ding mit neite mit chu, sukthim hita pua’n tin; hetna ding nakhang neite chunle ngaitha ta’n au.

⁴Mi chan-gangte ngaituana chunle, dik tak in he khen thei intin uh; mi dangawk leite chunle, kichian tak in gendok ziang thei ta’n au.

⁵Mingol chu ngaisân um kiti ta pua’n tin, michavai chule mi ja-um kiti diak ta pua’n a.

⁶Mingol chun ngolhuai tak ah thugen in, thil phalo ngen a ngaitua a. LALPA doi lo lam ngen bawl leh gen in, gilkialte an a pe ngai puau a, dangchâkte dawn dingle a pe ngai diak puau hi.

⁷Michavaite chu chavai tak ah um in, thil phalo ngen a ngaituau a; migentheite siatna ding ngaitua’n zuau a gen un, mitasamte dikna thu le a le’lam in a heimang sek ui.

⁸Himaleh, mi ja’um tapo in ja’um tak thilte a guanggal un, thil ja’um ah chun a kinga sek ui.

⁹Tho un, nanghaw nuamsa tak ah um numeite haw, nanghaw thamuang tak ah um chanute haw, ka thugen hi a la ngai un.

¹⁰Numei ngaisamte haw, kum khat zaw leh grep ga talo ah, theiga lâk khawmna a um tâk lo ding ziakin, beidong in kithing ding la hiu.

¹¹Numei nuamsate haw, kithing unla, numei ngaisamte haw, kithing in, la nîk leh puan liptha’n, saidip puan chêng un.

¹²La lou mun phateu leh grep huante a siat gam tâk ziakin, la awm uh chûm tau in;

¹³ka mite chênna mun hampa leh, ham lingnei in a chup zaw tâk ziak leh, ahi, khawpi lim tak leh, a sung ah limna Inte a se zo ta’ngal a.

¹⁴Lal In chu taisan ah um in, mipi ah dim khawpi chule, nutsia ah hung um ding ahi ngal un; tângsâng leh a chung ah gâlvênbûk chu, gammâng hung hiden ta’n tin, gam sabiltungte kipakna mun leh, belam hon tatna mun hung hita’n a;

¹⁵chung lam ah kipat Thagau but khum I hung hi masangsiau, gamkeu gam chu gampha hung suak intin, gam phatna munte chu gammâng ah ngai hung hi’n a.

¹⁶Ziaphat chuleh, gamthip ah chun, dik tak ah vaihawmna um ta’n tin, gam phatna mun ah chun dikna chêngden ta’n a.

¹⁷Dikna ziakin thamuanna um intin, dikna ziakin thamuan hiat hiatna leh, kumtuang ah taksanna um zing ta’n a.

¹⁸Ka mite chu chênna mun muang ah, bit tak ah chêng in, chawldam um tak in chêngden ta’n au.

¹⁹Chuleh, gammâng sukdai hi’ntin, tichun, khawpi chule nuaisia in um ta’n a.

²⁰Tui mun kiang nai ah thâichi chîng leh, bawngchal leh sabiltung thâjante chu, mi hampha hung hiding la hiu.