Read Vaiphei ISAI 34 Bible Online

ISAI 34 - Vaiphei bible

ISAI 34

¹Nanghaw, namtinte leh mipite haw, ei hun nai unla, ngai un! Lei leh a sung lua dim zosia’n ngai uh hen la, khawvel leh ama ah piang zosia’n le ngaitha tau hen.

²LALPA chu namtin chung in a lungna ta’n, a sepai hon zosia chung in a thangtawmna a kuangjak tai; siatna tuak dingin a tiam ta’n, thâgam dingin a pedok ta’ngal a.

³A lak ua thâlup ah umte chu paidaw hi’ntin uh, a mithi ui gim uh kikhawdok intin, mualte chu a thisan un luan khum in a.

⁴Van ah aksite zosia mangthai ta’n tin, van chule lekhabu zialthaw gual ah zial daw in um ta’n a. Van lam ah thil um zosia chu, grep dua kâu a gui ah kipat a pul ah, theichang ga hût a kung ah a pulthâk gual in, pultha zo ta’n au.

⁵Ka chemjam in van ah thil umte, a dawn kham tâk ziakin, ngai un, Edom tawh siatna tuak khawm ding ah tiam ah um, mipite chung ah vaihawm dingin, hung kuan suk ding ahi.

⁶LALPA chemjam chu thisan in a dim ah, sathau in a kijut zol ah, belam leh kêl thisan, belamchal kãl ah thaute chun a kijut zawl hi. LALPA‘n Bozrah mun ah chun, kithoina siam in, Edom gam ah chun kitha’na, huaisia tak a hung um ta’ngal a.

⁷Jangsial tawh bawngchal tuai tawh, bawngchal hatlaite chule tha’khawm hita’n au. A gam uh thisan in chap intin, a gam lei zosiau chu a thau uh tawh kichok-hel ta’n a.

⁸LALPA‘n phuba a lâk ni ding leh, Zion hukdawna ding ah thukna hun ding a guat ta’ngal a.

⁹Edom gam ah luichate chu thauman lui suak intin, a leivuite chule thauvui suak ta’n tin; tichun, a gam pumpi chu, thauman kihâl kuang gual in kuang ta’n a!

¹⁰A sun a jan in mit ni um pua’n tin, a meikhu chu kumkhua’n jam to ta’n a. A khang a khang in kuama chên theilona’n um ta’n tin, kumtuang, kumtuang in, kuama’n vahaw ta pua’n au.

¹¹Ahi’n, a gam chu muthîl leh saphute’n lua ta’n tin uh, simbu leh va-ak chêng ta’n au. A chung ah lungjinna khauzang leh, a miliante chu buaina suang chun hun delkhum ta’n a.

¹²“Lenggam A Um ta Puai,” ti min sak intiu in, a lalchapateu chule bangmalo suak zo ta’n au.

¹³A lal In uh lingbuk in jam khum ta’n tin, a kulpiteu chu zakthâi leh linggui in jam dim ta’n a. Ngei hon chên muanna mun leh, vagawlsaute chênna mun hung suak ta’n a.

¹⁴Sangak tawh sa-uak takhawm intin uh, Sakêl a lawite ko in hâm ta’n tin; zia tak ah chun, Lilith kichawl malam intin, chawldamna mun mu ta’n a.

¹⁵Zia tak ah chun, simbu’n bu sep in, a tuitha’n tin, a no keusak intin; a thalîm nuai ah chun tuitha’n, awp kêu in au; Muvânlâite chule a kop kop in hung ta ta’n au.

¹⁶LALPA lekhabu ah chun hawl unla, sim un: A lak ua khat le mang pua’n tin, a koppi ding tasam le um pua’n au. LALPA kam ah thupiak a pawt ta’n, a thagau ma ma chun a leng un hun pui khawm ding ahi ngal a.

¹⁷Amau channa dingin âi a sân ta’n, a khut in a gam ding uh khen thâk piak in, khau a zan tai; zia tak chu kumtuang in lua ta’n tiu in, a khang a khang in chêng zing ta’n au.