Read Vaiphei ISAI 35 Bible Online

ISAI 35 - Vaiphei bible

ISAI 35

¹Gamthip leh gam gawchâk chu hung lim ta’n tin, gamkeu chu kipak in hung lûn kit ding ahi; sahei gual in,

²thupi tak in hung lûn kit intin, kipak tak ah La sa’n lim ta’n a. Lebanon lopina chu, Karmel leh Sharon lalna chu tawh, a kiang ah piak hita’n ah. LALPA lopina, I Pathian uh lalna chu mu ta’n au.

³Khutbân zawngkhâlte chu hi’hat unla, khup zawite chule hihât tau in.

⁴Lungthim dawilokte kiang ah chun: “Kihatsak inla, lau kin! Ngai in, la Pathian chu phuba la ding ah, hung kuan ding ahi’n, tizat um tak ah dit kit ding ah hung intin, nangma hun hukdok ding ahi,” tiu in.

⁵Ziaphat chuleh, mitthûmte hung vak ta’n tin, bengngong nakhang chule hung kihong ta’n a;

⁶ziaphat chuleh, kengbaite chu, sazuk gual in kichawm ta’n tin, pautheilote chunle lim tak in La hun sadok ta’n au. Gamthip ah tuite hung kikhawdok in, gamkeu ah lui luang del del ta ding ahi ngal a;

⁷piaunêl sa lut lut chu, dil hung suak ta’n tin; gam gawchâk chu tuinâk hung hita’n a; Ngei hon chênna mun chu, dawp lak hung suak ta’n tin, phâiluang leh pumpêng kek dim ta’n a.

⁸Zia tak ah chun lam tuangpi hung kithung intin, “Lamlian Thiangtho” ti hi’n a; mibuakte chun zia lamlian chu haw pua’n tiu in, Pathian mite â ding bep hita’n a. A haw tapo ngaituana bei nasa’n, gam mang pua’n au.

⁹Zia tak ah chun sakeibaknei um pua’n tin, sasialne chi, sate him him zia tak ah chun, mu phâk inle um ta pua’n au; maleh, tatsate chun zia lampi chu haw ta’n au.

¹⁰Tichun, LALPA tatsate chu, hung kile’kit intiu in, La sa kawm in Zion ah hung intiu in, a luchung un kumtuang kipakna chu khuk ta’n au; kipakna leh nopna chang ta’n tiu in, lungngaina, thûm leh mauna chu lêng mang ta’n a.