Read Vaiphei ISAI 36 Bible Online

ISAI 36 - Vaiphei bible

ISAI 36

¹Lengpa Hezekiah a lal kum sawm leh li tin kum ah chun, Judah gam ah khawpi kul ah ki-ûm zosia bulu dingin, Assuria lengpa Sennakherib chu a hung kuan ah, a la zo ngâl ziang ta’n.

²Assuria lengpa chun, Rabshakeh chu Lakhish ah kipat in Jerusalem lam ah lengpa Hezekiah kiang ah chun, sepai tam tak tawh a sawl ta’n. Puansawpte Lou mun zotna lamlian ah dîl saknung, tuilâkna kiang ah chun a vading a.

³Rabshakeh tawh kiho dingin a Insung enkolpa, Hilkiah chapa Eliakim tawh, a lekha zikpa Shebna tawh, thil bangkim tepte ah pang, Asaph chapa Joah cheng chu a vachiau a.

⁴Chun, Rabshakeh chun a kiang un: Hezekiah kiang in; Leng lopi tak, Assuria lengpa chun zia gual hin a gen hi, vatiu in: Bang kisuanpi ah zia gual ah hi kimuang la hiu em?

⁵A thu ah gen thaw mai mai chu gâlbawl dan leh gâl zaw’na la ngai uh ahi em? Kua kisuanpi ei do ding ah hung kipan him him la hiu em?

⁶Ngai un, luang tiangkhut bongsa, a mang taphot khut sutliam piak ziang tawhbang, Aigupta maw la kisuanpiu? Aigupta lengpa Pharaoh chung ah kinga tapo chu, zia gual chun hi’liam in a um sek him ui.

⁷Chuleh, “LALPA ka Pathian uh suang ka hiu,” la tiu ahi chun, lengpa Hezekiah in ama biakna munsangte leh mâichâmte a phiat thâk nung ah, Judah leh Jerusalem ah chêngte kiang in, “Zia mâichâm bul bep ah hin la biak ding uh ahi,” a la ti kha hilo a hem?

⁸Tu’hin hung unla, ka pu Assuria lengpa kiang in hun genpi ing ka; a chung ah chuang ding mi la nei zaw nâk chun, sakol sang ni hun pena’ng ka.

⁹Aiguptate kângtalai leh a sakol sepaiteu kisuanpi mai mai ah, ka pu siamângte suakte lak ah a neu pen pakhat ziang hile naw kit zo ding ah kisa la hiu em?

¹⁰Zia gam hi susia ding ah do dingin, LALPA pang lo ah hung kuan ziang eisa la hiu em? LALPA chun ka kiang in, “Hang chia inla, zia gam hi susia dingin hang do in, ei ti ahi ngâl a,” ti’n a vagen a.

¹¹Ziaphatchun, Eliakim, Shebna leh Joah chun Rabshakeh kiang in: “Lungsiat tak in la suakte kiang ah hin Aramaic pau in thu gen in, zia chu ka hethei ngâl un; kulbâng chung ah mite hetthei ding Hebrai pau in vang thu gen kin,” a tiu a.

¹²Himaleh, Rabshakeh chun, “Ka pu’n zia thute hi la pu leh nang kiang bep ah gen ah, nang tawh la êk uh la nêk khawmpi ding leh, la zun uh la dawn khawmpi ding uh ngâk ah; kulbâng chung ah kitung mipite kiang ah gen lo ding ei ti lasak a hem?” ti’n a dawnhu a.

¹³Ziaphatchun, Rabshakeh chu hung dingdok in, Hebrai pau ah ngai tak in thu a gen ta’n: “Leng lopi, Assuria lengpa thugen hi a la ngai un!

¹⁴Lengpa chun zia gual hin a gen hi: Hezekiah hi kithep zawsak kiu in, ama’n hun hukdok thei ding a hipaw ngâl a.

¹⁵Hezekiah in: ‘LALPA‘n ei hukdok intin, zia khawpi hi Assuria lengpa khut ah pia lo ding ahi,’ a ti thu mang in LALPA chu hun kisuanpisak ki’hen.

¹⁶Hezekiah thugen chu taksang kiu in; Assuria lengpa chun zia gual hin a gen ta’ngâl a: Keima tawh kiholemna nei dingin hung un;

¹⁷chutileh, lengpa hi hung ing ka tin, nang uh gam tawhbang ah gampha, bu leh uain tamna, vaithum leh grep huan phatna gam ah ka hun umsak masangsia, mi tin in nangmau grep ga chiat leh la theichang gateu kinêk chiat in, nangmau tuikul chiat ah kidawn ding la hiu.

¹⁸Hezekiah in LALPA‘n ei hukdok ding ahi, a ti chun kithep zawsak kiu in. Assuria lengpa khut ah kipat a gam uh hukdaw piak thei pathian nei kua a um ua a hem?

¹⁹Hamath leh Arpad pathiante kha khoilam tung zo a hitau em? Sepharvaim pathiante khoilam ah um ahi tau em? Ziate haw hin Samaria chu ka khut ah kipat in a hukdok awm?

²⁰Zia a gamteu hi a gam ua pathiante lak ah kua pen chun ka khut ah kipat a hukdok bek ah, Jerusalem chule LALPA‘n hukdok in ah, ti la hiu em?” a ti’n.

²¹Himaleh, kuama’n a dawnhu puau ah, kam khat genle a um puau, lengpa chun, “Dawnhu kiu in,” ti ah thu a piaksa a hi’tâk ziak in.

²²Ziaphatchun, Hilkiah chapa Eliakim, lal In sung ah vaihawmpa, lekhazikpa Shebna tawh thil tepte ah pang, Joah, Asaph chapa chu a puan uh puaitel neng nung in, Hezekiah kiang in a hung un, Rabshakeh thugente chu a hung hil tau a.