Read Vaiphei ISAI 39 Bible Online

ISAI 39 - Vaiphei bible

ISAI 39

¹Zia hun lai ah chun, Babulon Lengpa Baladan chapa Merodakh-baladan in, Hezekiah damlo thu leh a damlona kipat a dam kitna thu a la het ziakin, a kiang ah lekhathot tawh thilpiak tam tak thot in palai a sawl a.

²Hezekiah in palaite chu kipak tak in a la lop ah; tichun, a dangka, sana, gimtuite, sathau man tam takte, a gâlvan zosia tawh, a gothil koikhawmna In ah um zosia chu a leng in a la etsak a. Hezekiah lal In leh a lenggam sung ah a etsak lo bangma dang a um ta puai.

³Ziaphatchun, jawlnei Isai chu Lengpa Hezekiah kiang in a hung a, a kiang in, “Zia mite hin bang a hung gen awm? Khoi ah kipat hung a hiu em?” ti’n a dong a. Hezekiah in, “Gamla tak, Babulon gam ah kipat ei hung vethâ hung a hiu,” ti’n a dawnhu a.

⁴Isai in, “La In ah bang a hung muu em?” ti’n a dong a. Hezekiah in, “Ka In ah um zosia a mu suak ui. Ka gothil koikhawmna In ah um zosia ka etsak lo bangma a um puai,” ti’n a dawnhu a,

⁵Ziaphatchun, Isai in Hezekiah kiang in, Sepai honte LALPA thugen hi la ngai tia:

⁶“La lal In ah um zosia, la pu leh pate’n a la khol khawm uh tu’ni tiang ah umte hi, a leng ah Babulon gam lam ah puak mangna ding ni chu hung tung ngei ngei ding ahi; bang ma cha khêk hilo ding ahi, LALPA‘n a tii.

⁷La chate lak ah khenkhat le pui mang in um intin uh; tichun, a til uh get in, Babulon lengpa In ah chun nasêm in au,” ti’n a gen a.

⁸Ziaphatchun, Hezekiah in ama damsung ah gâl muang leh bit tak ah um ding ahi ti a ngaitua ziakin, Isai kiang ah chun, “LALPA thu lei hil chu a phai,” ti’n a dawnhu tai.