Read Vaiphei ISAI 41 Bible Online

ISAI 41 - Vaiphei bible

ISAI 41

¹Aw, nanghaw tuisuagiat pang ah gamte haw, thipbek in ka thugen hi a la ngai un! Namtin in a hatnau La thak chiat uh hen la; hun nai uh hen la, thu gensak un; vaihawmna chu nai ding in chia khawm hitiu.

²Sualam ah kipat gâl zotu hun choktho ah, a thilbawl ding sepsaktu chu kua a hem? Namtin a khut in a pedok in, leng leh lalte a keng in a chotchilsak in, chemjam ah sât tel in leivui a suaksak in; busi hui in a mût mang gual in, a thalpi’n a bawl in;

³a keng ah tual chuan man lo khop ah hat in a delzui ah, a delpha tai.

⁴Zia chu kua’n a bawl, kua’n a la guanggal ah, a tîl ah kipat khang tam tak hun kodokpa chu kua a hem? Keima, LALPA hi a masa pen ah umpa leh, a nunung pen ah le pang ding ka hi.

⁵Tuikual gam ah mite’n a muu ah, a lau un; kawlmong lam ah mite le a kithing ui. A hun nai un, a hung tau hi.

⁶Mitin a kipanpiu ah, mitin in: “Hangsan tak in um in,” a kitiu a.

⁷Mi them thiam chun sana bawlthiam a tîlhangsan ah; sek ah khenzol thiampa chun, sektum dompa a tîlkho ah; a so mat ah pangpa kiang in, “A pha nai,” a ti’n; tichun, tawilok thei talo dingin, thikkilna’n a kilden tau hi.

⁸Himaleh, nang Israel ka nasempa, ka gualpa Abraham suante lak ah ka têlchuam nang Jakob,

⁹lei mong lam pek ah kipat ka hun puidok a, leimun gamla pen ah kipat ka hun kodok a, la kiang in: Nang hi ka suak la hi, keima ngei in ka hun têlchuam la hi’n, hun paitha lo ding ka hi;

¹⁰lau him him kin, ka hun umpi zing hi; lung lau kin, la Pathian ka hi’ngâl a. Hun hi’hat ing ka tin, hun panpi ding ka hi; ka zaw’na khut changlam in, hun domsâng ding ka hi.

¹¹La chung ah hachang thak zosia chu, himualpho leh hi’zachat in um in au; nangma hun dâl tapo chu, bangmalo suak in mangthai in au.

¹²La chung ah siat bawlgawte hawl in la tin, maleh, mu zo ta pua’n la; nang hun do-te chu bangmalo suak in au.

¹³Keima, LALPA la Pathian in, la khut changlam ka tuzing ngâl a. La kiang ah: “Lau kin, hun panpi ding ka hi,” tipa chu keima ka hi’ngâl a.

¹⁴Nang, tangtêl tawhbang bep Jakob, nang, ganhing tawhbang bep Israel, lau him him kiu in! Hun panpi ding ka hi, LALPA‘n a tii. Nang uh Tandokpa chu Israel Mithiangtho chu ahi.

¹⁵Tu’hin, nang uh chu buhêkna khawl thak, hiam tak, a thak leh ha hiam tak nei in, hun siam ding ka hi; tângte chu hêk in la tin, hêk buang inla; mualte chule busi suaksak inla.

¹⁶Nang in amau chu thît in la tin, huipi’n thejak ta’n a. Ziaphat chuleh, LALPA ah chun kipak ta’n la tin, Israel Mithiangtho chu kisuanpi ta’n la.

¹⁷Migenthei leh chagate’n tui a hawl phat uh leh, bangma a mu ding uh umlo ah, dangchâk ziakin a lei uh chu a keu zaw tak leh; Keima LALPA hin dawnhu ing ka tin, Keima Israelte Pathian hin amau chu nusia lo ding ka hi.

¹⁸Tâng gawchâk ah chun lui lian tak tak, hun luandawsak ing ka tin, phâijawl tin ah tuinâk hun pûtsak ding ka hi; gamkeu chu dîl hung suak intin, gam gawchâk chun tuihing hung pût ta’n a.

¹⁹Gamthip ah chun sidar thingte, thinggite, mûi thingte leh, Oliv thingte hun kêdawsak ta’ng ka tin; gamkeu ah chun châk thingte, châk duanêl chite leh, thingkuang thing chite kek ta’n au;

²⁰tichun, mite’n zia chu LALPA khut in a bawl ahi ti leh, Israel Mithiangtho siamdaw ahi ti a muu ah, a het ua, a ngaituau ah, a hetchian theina ding un.

²¹LALPA, Jakob lengpa chun: La panmun chu hun gen unla, la kitiamna thuu chu hun gen him him tiam un.

²²La milim pathianteu hun keng unla, bang gual thil hung tung ding a hem, ti hung genlawk un; tichun, a hung tun phat leh, a la hethei ngâl ing kau. Masanglai ah thil a la tungsate chu, hilchian unla, bang ti’na a hem ti ei hil un.

²³Tu’nung ah thil hung tung dingte chu ei hil un; tichun, pathiante a hi’dan uh ka hettheina dingin; ka lau ua, ka tizat theina ding un, a pha hi’n, a sia hileh hun bawl un.

²⁴Nag haw hile bangma la hipuau a, la thilbawl uh le bang ma a hidiak puai; nang hun têl taphot chu ki’dak um a hiu.

²⁵Mallam ah mi khat ka choktho in, ama chu a hung ngâl in; ni sua’na lam ah kipat in ka min hun ko intin; bêlsêkpa’n lei buan a chil gual in, leng leh lalte chu hun chuanchil ding ahi.

²⁶“A gen chu a dik na e,” ti’thei dingin a lim ah kipat kua’n a la gen ta, I hettheina ding un masang ah kua’n a la gen tau ah a hem? Kuama a gendok a um puau hi, kuama’n a kitangkopi le a um pua’n, kuama la thu he’kha le a um diak puau hi.

²⁷Keima’n Zion kiang in ka la tâklang ta’n, Jerusalem kiang inle chanchinpha, tângsam ding ka piai.

²⁸Himaleh, ka et leh kuama a um ta puau in; a lak un lemguattu khatle a um puau a, ka dot leh le ei dawnhu ding a um ta puau hi.

²⁹Ngai un, kithepna mai mai a hiu; a thilbawl uh le bangmalo ahi’n, a lim kibawlteu chule hui gual ah, a ngawnchang ngen a hiu.