Read Vaiphei ISAI 44 Bible Online

ISAI 44 - Vaiphei bible

ISAI 44

¹Tu’hin, aw Jakob ka suakpa, Israel, ka mi têlchuam chun zia hi ngai un!

²Nanghaw hun siampa, sûl ah kipat hun guanggalpa leh, hun panpi zing ding LALPA chun zia gual hin a gen hi: Aw Jakob, ka suakpa lau kin la, ka hun têlchuam Jeshurun lau kin.

³Gam gawchâk chung in tui hun sungtha’ng ka tin, tâng gawchâk ah chun luichate hun luansak ding ka hi’n; la tu leh chate chung un ka thagau sungtha’ng ka tin, la suan leh pâkteu chung in, maljawlna hun sungtha ding ka hi’ngal a.

⁴Dawplak hampa gual in hung dawndok intin uh, lui pang ah hûisûm gual in hung khang tul tul in au.

⁵Mi khat in, “LALPA â ka hi,” hun ti’n tin; midang khat chu Jakob min ah ko in hung um in au; midangte chun a khutbân un: “LALPA â,” ti zik intiu in, Israel chu a nam min dingin hun mang ta’n au.

⁶Israel Lengpa, amau Hukdampa, sepai honte LALPA chun zia gual hin a gen a: Keima hi a masa pen leh a nunung pen chu ka hi; keima tilo ngal Pathian dang a um puai.

⁷Keima tawhbang kua ‘hem um? Hung kipuang uh hen la, ka âng ah hin hung kitâklang tiam uh hen. Kua ‘hem thil hung tung dingte ma sang lai ah kipat a la gendok thei? Thil hung tung dingte chu, ei vak gen piak tiam uh hen.

⁸Lau kiu inla, lauthawng him him kiu in; masang lai ah kipat khan ka hun hilsa leh, ka la puanlatsa hita lo a hem? Ka thu hiatpite la hiu! Keima tilo ngal Pathian dang a um him him em? Suangpi det dang a um puai; pakhat chale ka hepuai.

⁹Milim siamte chu bangmalo mai mai a hiu in, a thil ngaisân ma mateu chunle phatchuamna a nei puai; a hiatpituteu chunle bangma a mu puau ah, het le a hepuau hi. Tichun, mualphona bep tuak in au.

¹⁰Thilpha bawl thei lo pathian lim guanggal leh, milim siam ding chu kua a hem?

¹¹En un, milim ho zosia chu hung mualpho intiu in, a siamtute chu le mihing mai mai ahi ngal un. A leng un hung khawm in, hung pang khawm maleu; hilau ah um in, a leng un mualpho tak in um ta’n au.

¹²Thîksêkpa chun a lim ding a guanggal ah, meiâm lak ah koi in, a bân thahât tak ah chun a doi dan dan in a sêk ah; a gil a hung kial ah, a tha a hung chau in, tui a dawn lo ziakin a sawlsam tai.

¹³Themthiampa chunle a gitzanna mang in a gît ah, a nawt tuak ah, a ettuakna chun a tepte vêl a. Tichun, mihing lim gual gual ah mêlpha tak ah hun siamdok in, milim In ah tun dingin a hun siam zo tai.

¹⁴Sidar thing te chu phûk pai in, thingse thing leh gangpi thingte chu a hun la’n, ziate chu gammâng ah hawi in. Sidar thing note a phut ah, gawtui in a hun chawm tai.

¹⁵Ziaphat chuleh, thingkhua ah mat thei in a hung khanglian ah. A khenkhatte mei awi ding ah tik in a kihailum ta’n; a khenkhatte chu thukkhûk in a tik ah, an huanna’n a mang tai. Chuleh, a dang cheng chu pathian in a siam ah, a ho ta’n; pathian lim in le a siam ah, a ma-âng chun bokkhup in a ho tai.

¹⁶A thing kimkhat mei ah sêm in, a kimkhat dang chu sa emna’n a mang ah, a ne vâ sêt a. Kihailumna’n le a mang ah, “Aw, ka lum tai, meilum ka he tai!” a ti’n.

¹⁷A thing dang cheng chu pathian in a siam ah, a milim siam ma-âng ah bokkhup in a ho ta’n; a kiang in a pauchap a, “Ei hukdam in, nang ka pathian la hi’ngal a,” a ti’n.

¹⁸Amau chun bangma a hepuau ah, hettheina le a nei puau hi; khua a mu theilona ding un a mit uh a sîng un; a het theilona ding un a lungthim uh chule hithim piak a hiu.

¹⁹Khat chale, “A kimkhat thing in ka tik in, a meiâm chung in le vaithum ka kang ah, sale ka em ah, ka ne ta’n. Tu’hin a dang cheng chu ki’dak um tak in ka siam hilo a hem? Thingbong khat âng ah khiangkho mai ding ka hem?” ti ngaitua ah, hethiam leh hetna nei a um puau hi.

²⁰Vut in a kivâk un, a ngaituanau mantheilo chun a pui mang ta’n, amau la kihukdam thei lo in, “Ka khut changlam ah ei thêm chavai ding kisiam hilo ka hem?” tina châng a he him him puau hi.

²¹Aw Jakob leh Israel, zia thilte hi a la hezing un, ka suak la hi’ngal a. Nangma hi ka hun siam la hi’n, ka suak la hi; aw Israel, hun hemil him him lo ding ka hi.

²²La hi’khelnateu chu sûmpi gual in ka mût mang ta’n, la gitlona chu phâisûm gual in ka mûtthial tai; ka kiang lam ah hung kit unla, ka hun hukdok ta’ngal a.

²³Aw vante haw, La sa tau in, LALPA‘n a bawl zo tai; leimun niam pente haw, hung kikodok tau in. Aw tângsangte, gammâng leh, a sung ah thing zosiate haw, La sa’n hung kikojak tau in! LALPA‘n Jakob a hukdok ta’ngal a, Israelte lak in choisa’n in, hung um ding ahi tai.

²⁴Nang hun Tandokpa leh sûl ah kipat, hun guanggalpa LALPA chun: Keima hi LALPA, thil zosia siampa, vante kaimalpa chu keima hi ka hi’n, keima bep in lei hi ka jak pal ahi;

²⁵milepchiate subuaitu, âisân thiamte hi’ngol ah, mipilte bangmalo suaksak ah, a hetnau hi’ngolpa chu ka hi’n;

²⁶a suakpa kamsuak hi’det piak a, a tângsamte thugenlawk guitunsakpa chu ka hi. Jerusalem chung thu ah chun, “Mipi hun chênsak kit ding ka hi,” tipa leh, Judai gam ah khuate kiang ah: “Bawl thak ah um kit ding la hiu, la sung ua suksiat ah umsate kha, hun tungding kit ding ka hi,” ti’pa;

²⁷chuleh, tuili thûk tak kiang ah: “Hung kangtan inla, la lui liante chu hun sukang sik sek ding ka hi,” ti leh,

²⁸Kuras chung thu in: “Ama chu belam gual ah ei chingpa ahi’n, ka thil guanggal zosia hun bawldok ding ahi,” ti’pa leh, Jerusalem chung thu ah: “Bawl thak ah um kit ding la hi,” ti leh, tempul chung thu ah: “La suangphûmte lep thak ah um kit ding ahi,” ti’pa chu ka hi, ti’n a gen tai.