Read Vaiphei ISAI 45 Bible Online

ISAI 45 - Vaiphei bible

ISAI 45

¹LALPA chun a sathaunu’ Kuras, nam tinte tawden ah, leng leh lalte a lal puan uh lîp thâksak ding leh, a ma-âng ah kotkhakte a la hong dingin ka la guat ta’n;

²la ma lam in a la chia ing ka tin, mualte chu a la hi’cham ing ka tin, sum-eng kul kotkhakte chu hisia’n, thîktawnte chu a la âtbot piak ding ka hi.

³Keima hi LALPA, la min ah hun kopa, Israelte Pathian chu ka hi ti la hettheina dingin, thim lak ah go thil kisêlgute leh, a gûk ah go thil kisêlgute chu, hun pia ding ka hi.

⁴Ka suak Jakob leh ka mi têlchuam Israelte jal in, la min in ka hun kodok ta’n; ei helo maleu chinle, la min ka hun phuak piak tai.

⁵Keima hi LALPA chu ka hi’n, a dang kuama a um puai; keima tilo ngâl Pathian dang a um puai. Ei helo malehchin le, keima’n gâlvan in ka hun thuam in,

⁶keima hi LALPA chu ka hi’n, keima tilo ngâl kuama dang a um puai, ti hi nisuana lam ah kipat, a tumna lam tiang ah mite’n, a hettheina ding un.

⁷Vâk ka la siam ah, chuleh, thimna le ka siam ah; maljawlna leh chunggikna le ka siam ahi; keima LALPA hin zia zosia chu ka la bawl ahi.

⁸Aw vante haw, chung lam ah kipat in hung zu tau in, van dumte chunle dikna hun zuksak tau in; lei hung kihong hen la, hukdamna chu hung pawtdok ta hen; chuleh, dikna chule hun kêdaw sak ta hen; Keima LALPA hin ka la siam ahi.

⁹Nanghaw, a hun Siampa kido-pite haw, la chung uh a gik hi! Lei bêl a siampa tawh kido gual bep la hiu! Tungman chun a siampa kiang in, “Bang a hem la siam?” a ti ngai in, “La thilbawl chu a liang bei ahi,” a ti ngai em?

¹⁰A pa kiang ah, “Bang ding ah zia gual ding ahi, lei la hin a hem?” Ahilo leh, a nu kiang ah, “Bang ding ah lei la hin a hem?” tite chu a chung uh a gik hi!

¹¹LALPA, Israel Mithiangtho leh, amau Siampa chun zia gual hin a gen hi: Ka chate chungchâng thu leh, ka bawl ding leh bawl lo ding thu in, hung kikum ding la hem?

¹²Lei pumpi leh a sung ah mihingte hile ka siam ahi; keima khut ma ma’n vante khi ka jak pal a, a sung ah um zosia le ka thu um chiat a hiu.

¹³Dikna’n Kuras chu ka choktho in, a chiana ding lam zosia’ lawtin sak ding ka hi; a man leh kipak man a mu ding ziak le hilo in, ka khawpi chu tungding kit intin, ka mi saltângte chu hun thâdok ding ahi, ti’n sepai honte LALPA chun a gen hi.

¹⁴Zia gual hin LALPA‘n a gen a: Aigupta gam ah hausakna leh, Ethiopia gam ah sumkawlveina thil zosia, mi duangting tak tak Sabeante chule, la kiang ah hung intiu in, nang uh chang ta’n la tiu in, la nung uh hun zui ta’n au; thîkkol but kawm ah hung in, la mau ah hung khiangkho ta’n au. La kiang ua la jangainau don in, “Nang uh kiang bep hin Pathian a um in, kuama dang kiang in a um puai; ama tilo ngâl Pathian dang him him a um puai,” hun ti ta’n au.

¹⁵Nangma ngei chu ama leh ama kisêlgu, Pathian tak tak chu la hi; aw Israelte Pathian, Hukdampa ngei chu.

¹⁶Milim siamte chun buaina tuak in, a leng un mualpho tak leh, zakcha tak in um ta’n au.

¹⁷Israelte chu kumtuang hukdamna’n, LALPA chun a hukdam tai; kumkhua’n mualpho’na leh, buaina’n tâkbuak ta pua’n au.

¹⁸Vante Siampa, Pathian ngei chu! khawvel pumpi guanggal leh siampa, (ama’n a phudet ta’n; a thawn mai ah um ding ah siam lo in, chênna dingin a siam a.) LALPA chun, Keima hi LALPA chu ka hi’n, Keima tilo kuama dang a um puai, a ti ta’ngâl a.

¹⁹Thimna gam ah hin a gûk in bangma ka gen puai; Jakob suan leh pâkte kiang in, “Buaina lak in ei hawl un,” ka ti ngai puai. Keima LALPA hin thudik ka gen a, a dikte bep chu ka taklat sek ahi.

²⁰Namtin lak ah a suakcha sunte haw, hungkhawm unla, hung kipung khawm in, ei hun nai tiam un! A thing milimteu paw tawl tawl ah, amau hukdok theilo pathian ho zingte chu, hetna nei lo a hiu.

²¹La thuu chu tâklang unla, kidongtua sau sau tau hen! Hun sawt tak masang ah kua’n a hil tam? Ma lai ah khan kua’n a tâklang tam? Keima LALPA hi hilo ka hem? Keima tilo pathian dang a um pua’n, Pathian dik tak leh Hukdampa, Keima tilo ngâl a dang a um puai.

²²Nanghaw, kawlkil tiang ah umte haw, keima lam hun ngau inla, hukdam in um tau in! Keima bep hi Pathian ka hi’n, a dang a um puai.

²³“Khûp zosia ka ma-âng ah hung khiangkho intiu in, lei zosia le hung kitiam ta’n au,” ti’n keima ma’n thu ka la tiam ta’n, ka kam ah kipat thudik tak ka la gendawsa chu, a thawn in thumal khat le hung kile’kit lo ding ahi.

²⁴LALPA bep ah chun dikna leh hatna a um hi, ei hun ti ta’n tiu in; Keima do ding ah hil ah umte chu vang, ka kiang lam ah hung in, mualpho ta’n au.

²⁵LALPA ah chun Israel suante zosia chu, gâl zo in lopi ta’n au.