Read Vaiphei ISAI 46 Bible Online

ISAI 46 - Vaiphei bible

ISAI 46

¹Bêl chu a kûntha’n, Nebo chu a chutha suk ta’n; a milimteu chu gancha leh gan honte’n a puau a; zia la thil lim puak tawl tawlteu kha, gancha’n gim tak ah a puak ding bep uh, a hung hi zo tau hi.

²A chu tha suk un, a kûntha khawm tau; a puakgik ua kipat a kihukdok thei puau a, sal ah puimang in a um tau hi.

³Ka gil ah ga, keima gilpi ah piang, nanghaw Israel Inkuan lak ah a thibang sunte haw, aw Jakob Inkuan ah mite haw, ka thugen hi a la ngai unla,

⁴la têk nung ua, la samkân tiang unle, hun som ding chu Keima hi ka hi. Ka siamsa la hiu ah, hun enkol zing ding ka hi’n, hun pua’ng ka tin, hun hukdam ding ka hi.

⁵Kua tawh ei te’ ding ah, ka kibatpi ding siam ding la hiu a, ei vak te’ mawng mawng tiam un? Kua ka kibatpi a um em?

⁶A sakhau ua kipat in sana a sungdok a, dangka thîkte chu bûkna te’te chun; sana bawl mi a gawi un, a pathian ding uh a bawl piak un; ziate ma-âng ah chun a bokkhup un, a ho tau hi!

⁷A liangko ah sepdok in a puau a, a umna ding mun un a tung un, zia chun a ding den tau a; a umnau kipat in a chia chawn thei ta puau hi. Mi khat in bang gual in ko maleh, a dawnhu thei pua’n, a lungkhamnau ah kipat in a hukdok thei puai.

⁸Zia hi hezing unla, ngaitua un, nanghaw mi talêkte haw, zia chu gel zing un,

⁹nidang lai ah thiltung te kha hezing un; Keima hi Pathian chu ka hi’n, kuama dang a um paw’ngal a. Keima hi Pathian ka hi, keima tawhbang kuama dang a um puai.

¹⁰A tîl ah kipat in a tawp tiang ding ka tâklang ta’n, a hung tung nailote le tuan ah tâng ah kipat khan, ka la gen lang ta’n; “Ka thil guanggal chu guitung intin, ka lunggêl chu hung tungding ahi,” ka la ti ta’ngal a.

¹¹Sualam ah kipat in sasial ne vacha, gam gamla tak ah kipat in, ka thil guanggal bawldok ding mi chu, kodok ing ka. Ka gendawsa chu guitunsak ngei ngei ding ka hi’ngal a; ka guanggalsa chu bawldok tei tei ding ka hi.

¹²Nanghaw mi lu’lul, hukdawna ding tawh kigamlatte haw, ka thugen hi a la ngai un:

¹³Ka hukdamna chu ka hun koinai a, gamla tak in a um ta puai; ka hukdamna chun khawdâng sawt talo ding ahi. Ka lopina Israelte â dingin, ka hukdamna chu Zion ah koi ding ka hi.