Read Vaiphei ISAI 47 Bible Online

ISAI 47 - Vaiphei bible

ISAI 47

¹Babulon chanu, nungak thiangtho, hung suk inla, leivui lak in hung chu’n! Kaldai chanu, lalchutpha hilo, lei tual ah kitung in! Mi nuamsa leh tino’ ti hi talo ding la hi’ngâl a!

²Sumhêk pan inla bu hêk in, la mai khû’na puan hawk inla, la nîk leh puan sût inla, la keng hawk to inla, luiliante chu pal gâl kâi in.

³La nîk leh puan chu lîpthâk piak hi’n la tin, la zachakna mite’n mu ta’n au. Phuba chu hun la’ng ka tin, pakhat chale hawi pua’ng ka.

⁴Ei Tanpa, sepai honte LALPA chu a min ahi’n, Israelte Mi Thiangthopa chu ahi.

⁵Aw Kaldai chanu, thipbek in kitung inla, thim lak zuan in, lenggamte chung ah lengnu hi talo ding la hi’ngâl a.

⁶Ka mite chung ah lungna ka hi’n, ka gochante chu ka hi’buak zo tai; la khut in amau chu ka hun pia ta’n, ja’ngaina la la nei pua’n; têksete chu ngawngkol gik tak la puaksak tai.

⁷Nang in, “Kumtuang ah lengnu hiding ka hi,” la ti ziakin, zia thilte chu la lungthim inle la la ngaitua kha pua’n, a tawpna ding uh le la he’pha diak puai.

⁸Ziaziakchun, tu’hin ziate hi he ta’n, nang mi kinoptel leh bit kisa tak ah khawsa, la lungthim in: “Keima sâng ah lian kuama a um pua’n; meithâi gual in kichu pua’ng ka tin, ka chate le sûn pua’ng ka,” la ti’n.

⁹Himaleh, ni khat thu in, phutlo in zia thil zosia chu hun tuak ding la hi. Dawithiam leh âisân thiam bang jat nei malechin, la chate hun sûn in la tin, meithâi hung hiding la hi.

¹⁰La nunsiatna chun bit la kisa’n, “Kuama’n ei mu puai,” la ti hen. La pilna leh la hetna’n a hun pui chavai zo ta’n; tichun, la lungthim in, “Keima sâng ah lianzaw kuama dang a um puai,” la ti hen.

¹¹Himaleh, la dawi thiamna’n a zaw lo ding, la chung ah vangsiatna hung tung in a; la hi’dai theilo ding ah siatna khawk tak, la chung ah hung tung ding ahi; la hetkhol lo in, phut lo ah la chung ah manthaina hung tung ding ahi.

¹²La khangdawng lai ah kipat la bawl tâk, la âisân thiam leh dawithiamte zosia chu tuchak zing in, la hung lawtin khâk pal ah, la mêlmate la hilau thei khâk leh.

¹³Mi la kawm tamna lam in la gim tai; aksi lam ah mithiamte, van lam thil hethiamte leh, thathak si’n ah thil tung ding, genlawk theite chu tawh, hung dingdok uh hen la, la chung ah thil hung tung ding ah kipat chun, hun hukdokleu hiding a puau em!

¹⁴En in, amau bupawl gual bep a hiu, mei in a kâng tum ngâl hi. Mei thilhitheina lak ah kipat in, a kihukdok thei puau hi. Kihailumna ding meiâm um ta pua’n tin, mei awi dingle um ta pua’n a.

¹⁵La sepgim ga la chung ah tung ding chu, zia gual hi ahi: La khangdawn lai ah la khualzin khawmpite chu, amau nopna lam chiat in a vâk vêl tau a, nang hun hukdam ding kuama um ta pua’n au.