Read Vaiphei ISAI 5 Bible Online

ISAI 5 - Vaiphei bible

ISAI 5

¹Ka dawi tak in a grep huan a ngainatna La sak piak ing ka: Ka dawi tak in lei phatna tâng ah grep huan khat a nei hi.

²A lei a let ah, suangchang a zen thiang a, grep keksi pha pen a phut a; huan lailung in a vênbûk a sa’n, zia chun grep sûkna ding khûk le a cho a; grep ga tam tak lâk khawm a kinem a, maleh, grep lêm ngen a ga ta mai hi.

³Tu’hin, nanghaw Jerusalem leh, Judai gam ah chêngte haw, keima leh ka grep huan chung thu hi, ei ngaitua piak tiam un.

⁴Ka grep huan â ding ah ka la bawl lo, ka bawlbe ding bang a um nalai em? Grep ga pha tak hung ga ding ah ka kineppi siat tawh, a lêm ngen a ga ta mai hi!

⁵Tu’hin, ka grep huan hi bang law ding ka hita em ti hun hil ing ka. A pal phia’ng ka tin, nêk zaw in um ta’n tin; a dâi phia’ng ka tin, tawden in hung um ta’n a.

⁶Tho hâ ta pua’ng ka tin, hâthiang talo ding ka hi’n, ling leh khauguite’n dêp ta’n a; a chung ah gua zuksak talo dingin, van sûmte thu pia ding ka hi.

⁷Sepai honte LALPA grep huan chu, Israel Inkuante a hiu a; doichuam tak ah a phute chu, Judah mite chu a hiu; a lak un vaihawmna dik kineppi ma leng, thisan sua’na ngen a um in; dikna kineppi maleng, thavai kiko thawm het ahi tai!

⁸E hei! Gam pumpi midang â ding, neuchale awt lo ah In a bân ah samat ziang ah; lou a bân ah chawkbe ah, gam lailung ah cholchên la chung a gik hi!

⁹Sepai honte LALPA‘n a kipau tiamna ka hia’i: mathei lo in, In lian leh mêlpha, tam takte hi a sung ah chêng ding um lo ah a hawm ah nutsia in hung um ding a hiu.

¹⁰Grep huan chîng sawm in bath khat khêl kihêkdok pua’n tin; buchi homer khat in ephah khat khêl ga sua pua’n a.

¹¹E he, nang uh zudawn ding ah jingkal matak ah tho ah, nitâk jan sawtpi pi zudawnna chêngthuak den sekte;

¹²tingtang, pekkhuang, lilu tawh uain limpi luaithe ah, kinoptel tak ah um sekte haw, LALPA thilbawl ngaisak lo ah, a khut nasepte en ngailote chung chu a gik hi!

¹³Ziaziakchun, hetna a nei lo ziak un, ka mipite chu sal ah pui in a um tau in; a milianteu chule gilkial in a thi tau in, mipite chule dangchâk in a keu zo tau hi.

¹⁴Ziaziakchun, Sheol gilkialna a hi’pung un, te’ theilo ding khop ah lian in a kam a ka lian tai; Jerusalem ah miliante leh, a mipite leh ama ah khawhelo khop ah husa leh, kiletsakpi zosia chu a lût suk tau hi.

¹⁵Mite chu sukniam a hitau a, mi zosia kainiam ah um in, kiletsak ah mittêt sângte chule sawt niam a hitau hi.

¹⁶Himaleh, sepai honte LALPA chu, vaihawmna dik ah chun choisa’n in a um in, Pathian Thiangtho chun, a thiantho dan dikna’n a tâklang sek hi.

¹⁷Ziaphat chuleh, belemnote’n amau gam hing, kinêk gual in ne ta’n tin uh; gam sesa ah chun belam tuaidawng leh, a note chun an vâ tak in ne ta’n au.

¹⁸E he, nanghaw zuau khauhual ah bawlsiatna kai ah, kângtalai khauhual ah kai gual ah gitlona kai zing ah,

¹⁹“Hung kinaw hen la, a bawl ding chu hun bawl kin hen la, vak kimu ngal leh aw! Israel Mithiangtho chu I hettheina ding un, a thil guanggal chu hun bawl zo kin leh,” tite haw, la chung uh a gik hi!

²⁰Thil phalo phasa’, a pha phalo sate, a vakna ding thimsak ah, a thimna ding vaksak sek ah; a thum ding khâtsak ah, a kha ding thumsakte haw, la chung uh a gik hi!

²¹Nanghaw pil kisa, hethiam kisate haw, la chung uh a gik hi!

²²Uain dawn ah mihangsan leh, zuchîk tak ah kihel dawn ngam a,

²³a thiamlote golgûkna ziak ah thiam chansak ah, bawlkhial neilote a diknau lâkpiakte haw, la chung uh a gik hi!

²⁴Sepai honte LALPA thuhilna a pom lo ziak uh leh, Israel Mithiangtho a musit tâk ziak un, meikuang in bupawl a kat tum a, mei in hamsawl a kat tum gual in, a zung uh muatden intin, a pâk lun lai uh leivui gual in leng mang in a.

²⁵Ziaziakchun, a mipite chung ah, LALPA lungnatna a kuangdok ta’n, a chung un a khut jakdok in a gawt tai; tângte a kithing un, a mithiluangteu chu, kotzing ki’dak gual in a chap zeng zung tai. Zia gual ah a um nung unle, a lung a dam naipua’n, a khut a jakdok zing nalai hi.

²⁶Gamla tak ah nam khat kona tepte’na hun bawl intin, leimong langkhat lam ah mite ko’na saisilît hun mût in a; a kinthei pen in, kin tak in, a hung taikhawm ui!

²⁷A lak ua kuama a chau leh a kisuikha le umlo in; a vuang leh a ipmu le umlo in, kawnggâk pheltha le umlo in, kengtawdap khau tan ziang le a um puau in;

²⁸a thalchangteu a hiam in, a thalpiteu chu puaikonsa um in, a sakol tinteu chu meisuang a bang in, a kângtalai kengteu chule chîmpei gual hi’n a.

²⁹A thawm uh sakeibaknei hâm a bang in, sakeibaknei note gual in a ngîk ui; a samat ding uh ngîm ah mat gual in, kipuak mang in au. Kuama’n a lâkpiak thei ta puau hi.

³⁰Zia ni chuleh, tuisuagiat gi hum hum gual in, amau haw do-na’n hamgi hum hum ta’n au. Gam chu kua’nle a vak et chun, thimna leh lungkhamna bep in dim zo ta’n a; tichun, vâk nalua chule sûmpi’n lia thim zo ta’n a.