Read Vaiphei ISAI 53 Bible Online

ISAI 53 - Vaiphei bible

ISAI 53

¹Ka thu gensawn uh kua’n a taksang awm? Chuleh, kuate kiang in LALPA khutbân chu, tâklat in a um em?

²Ama chu tâng gawchâk ah thâichi no kek, zung thadok ah hung khangdok gual hi’ntin, vak etlâna ding ah mêl lat dan chuam bîk leh, za umna a nei pua’n; doichuam ahi’na ding ah mêl putdan chuam le, a nei puai.

³Mite musit leh pâmpai in a la um ta’n; mi lungngai leh natna dim ahi. Kuama’n a mitlêm ua le, a mu tâk lo leh a musit uh ahi; tichun, ei hawn le bangma I la ngai puau hi.

⁴Ama chun I hiveisiau zosia leh, I natna zosiau a la paw ta’n; ahi’n la, ei hawn Pathian in a jep, a vok pâi ah thuak gual in I ngai un.

⁵Himaleh, ei haw bawlkhialna ziak ah hiliam ah um leh, I dukdaklona ziak ua vok thidup ah um ahi ngâl a; ama gawtna thok ziak ah ei haw sukdam ah um in, ama kivok thidupna ziak ah, sukdam ah um I hi’ngâl un.

⁶I leng un belam gual in I la vâk mang zo tau ah; eimau nopna lam chiat in I la vâk mang zo tau hi; himaleh, LALPA‘n I leng ua dukdaklona zosia chu, ama chung in a nga tai.

⁷Ama chu tawden ah um in, sukgenthei in a um ta’n; maleh, kam khat ziang inle a dawnhu puai. Belam thâlup ding a kai gual un, belam a mulmetna a kidaw hiat hiat gual un, kam khat ziang le a gen puai.

⁸Thudik ah vaihawm lona ziakin, pâmpai in a la um tai. A tu’nung thu ding kua’n a gêl sâm awm? Mihingte gam ah kipat sukmanthai in a um ta’n, ka mipite bawlkhialna ziakin, ama chu khet liam ah um ahi.

⁹Ama’n kuama thuk lo in, a kam ah zuau thu gen lo maleh, mi nunsiate tawh vui khawm in a um in, mi hausa thân ah vui in a um hi.

¹⁰Himaleh, ama thokgimna chu LALPA lung lam ahi. A hinna chu gitlo thoina ding ah, la hun bawl phât leh, a suan leh pâkte hun mu ta’n tin, a damsung nite chu hisau piak hung hita’n a; ama jal in LALPA lung lam chu, sukbutin in um ta’n a.

¹¹A thokgimna kipat in vâk mu’n a; a hetna ziakin lungkimna nei ta’n a. Mi diktat, ka nasêmpa chun, mi tam tak diktatsak intin, a dukdaklo’nau zosia ama’n paw ta’n a.

¹²Ziaziakchun, miliante chantum chu pia’ng ka tin, gâlhatte tawh a gâl lâk thilte chu kihawm ta’n au; ama’n a hinkhua thi phal in a la kipedok ta’n, thil bawlkhialte lak ah simkhawm in a la um ta’ngâl a; mi tam takte gitlona chu pua’n, migilote â ding ah dot piak in a pang nalai sêt hi.