Read Vaiphei ISAI 54 Bible Online

ISAI 54 - Vaiphei bible

ISAI 54

¹Aw, nangma cha hing ngai lo ah chîng, La hun sa’n; nangma nauvei ngai lo, La sa’n hung kikodok inla; ngai tak in hung kikodok ta’n! Pawsal neinu chate sâng in, thawmhau tak ah umnu chate chu tam zaw’n au, LALPA chun a ti ahi.

²La puan In mun chu kêk lian inla, la chênna puanjakte chu jak pal in; îtcha kin la, la khauhualte chu zopbe inla, a hênnate chule khêndet in.

³Changlam leh veilam ah, hung kikêk lian ding la hi’n, la suan leh pâkte’n namtin chung ah vaihawm in, khawpi a hawm ah nutsiasate chu, hun lua dim kit ding ahi ngal un.

⁴Lau kin, mualpho lo ding la hi’ngal a; lungthuai kin, zakcha lo ding la hi’ngal a; la khangdawng lai ah la mualphona zosia kha, hun hemil ta’n la tin, la meithâina ziak ah la zachatna zosia kha, he’pha talo ding la hi’ngal a.

⁵La pawsal chu nangma hun Siamtu kha ahi’n, a min chu sepai honte LALPA ahi ngal a. Israelte Mithiangtho, nangma hun Tanpa chu ahi’n, ama chu lei chung zosia’ Pathian ahi.

⁶LALPA chun nutsia um ji thasia, tangval lai ji nol ah um, a kokit gual in ka hun ko la hi; la Pathian in a tii.

⁷Hun chomcha sung â ding bep in ka hun nusia in; maleh, lainatna lian tak in hun pui khawm kit ding ka hi.

⁸Ka lungnatna huaisia tak ziakin, chomkhat ka hun kisêl mangsan ah; maleh, kumtuang hepina ziakin, hun lainat zing ta’ng ka, ti’n LALPA, nangma hun Tanpa chun a gen hi.

⁹Zia hi kei â ding ah Noah hun lai gual kha ahi; Noah hun ah tuilet gual kha, lei chung ah tung kit talo ding ah, thu ka la tiam gual khan; tichun, la chung ah lungna talo ding leh, hun vau talo dingin ka kitiam ta ahi.

¹⁰Tângte chu tawl mang ah um in, mualte chu lakdaw in hung um ziang maleu le, ka ngilneina chun hun nusia pua’n tin, kilemna thuthung chu lâkdaw hita pua’n a, ti’n nangma hun lainatpa, LALPA chun a ti ahi.

¹¹Aw, nang sukgenthei ah um, thigawpi’n a mût lumlet, thamuanna him him nei lo, la suangte kha a jem hoi tak in, hun siam piak ing ka tin, la In suangphûm ding chu, sapphire suang mantam in hun lep piak ing ka.

¹²La In sîpzumte chu rubi suang mantam in, siam ing ka tin, la huang kotpite chule, suang mantam te zol zol te’n siam ing ka tin, la bâng zosia chule, suang mantam chite’n hun lep piak ding ka hi.

¹³La chate zosia chu LALPA zilsakna nuai ah, hung um intiu in; tichun, la chate chu, hung hampha ma ma ding a hiu.

¹⁴Dikna ziakin phudet hi’n la tin; sukgentheina chu tawh kigamla ta’n la; lau him him talo ding la hi’ngal a. Tizat umna’nle hun gamlat ta’n a, la kiangnai ah le hung talo ding ahi ngal in.

¹⁵Kua a hem khat in kinakna a hun patdaw leh le, zia chu keima ah kipat hipua’n tin; a hun kinakpi tapo chu, nangma ziakin kipûk ngal in au.

¹⁶Ngai in, thîksêkpa’n mei mût âm ah, a doidan ah a matchâk ding sekpa chule keima siam ahi. Chuleh, zia chu hise ding ah phuba lapa chule, keima guat ahi.

¹⁷Nangma do-na ding ah matchâk kisiam zosia chu, lawting ngai pua’n tin; chuleh, vaihawmna mun ah hun nial, lei taphot chu nialtha ta’n la. Zia hi LALPA nasêmte gochan leh, keima panpi’na chu ahi, ti’n LALPA‘n a gen hi.