Read Vaiphei ISAI 55 Bible Online

ISAI 55 - Vaiphei bible

ISAI 55

¹Dangchâk zosia tui tamna lam ah hin hung un; dangka neilote le hung unla, hung kichawk in dawn un! Hung unla, uain leh bawngnawi, dangka ngai lo in, a man bei in hung kichawk tau in.

²An ah ngansia thei lo chawkna’n, bang ding ah dangka mang zo ah, bang ding ah lungkimna ding bawn, tut zo lo ding ah sêmgim la hiu em? Ka thugen hi pha tak in a la ngai unla, an pha chu hung neu inla, an tui tak ne’n kihilim tau in.

³La bil uh dawu inla, ka kiang lam ah hung un; la dam theina ding un ngai un. La kiang un kumtuang thuthung, David kiang ah ka hepina thutiam chu, hun pia ding ka hi.

⁴Ngai un, ama chu mipite â ding ah hiatpitu ding leh, mipite chung ah puitu leh thupetu hiding in, hun siam ding ka hi.

⁵Ngai un, la hetngai lo namte chu hun ko in la tiu in, LALPA la Pathian, Israelte Mithiangtho chun, a hun chawihoi tâk ziakin, nangma hun he’kha ngai lo namte chunle, hun zuan ta’n au.

⁶Mu bailam ah a um lai in LALPA chu hawl unla, a nai lai hin ko un;

⁷mi nunsia chun a siatna lampi chu haisan hen la, mi diklo chun a ngaituana phalo haisan ta hen; LALPA lam ah hung kile’kit hen, a chung ah ja’ngai in a. I Pathian kiang lam un hung kit uh hen, ama’n a la ngaidam ma ma ding ahi ngal a.

⁸Ka ngaituanate hi la ngaituanateu tawh a kibang pua’n, ka lampite chule nang uh lampite gual ahi puai, LALPA‘n a ti’ngal a.

⁹Vante khi lei sâng ah a sân zawk gual in, ka lampite chule, la lampiteu sâng in a sâng zaw’n, ka ngaituanate le, la ngaituanateu sâng in a sâng zawi.

¹⁰Van ah kipat vûk leh gawtui a zuk a, lei a chapno ah, buchi the’pa â ding ah thâichimu, a hun kêdawsak ah, nêk ding ah vaithum a pawt daw masia, a kile’kit lo gual in,

¹¹zia gual tho ah chun, ka kam ah kipat ka thu pawtdok sa chule, a thawn in kile’kit ziang pua’n tin, ka hi’guat chu hun hi’zo intin, ka sawlna lam lam ah chun, a thil hi’ding zosia chu pha tak in mualsua in a.

¹²Kipak tak in pawtdok in la tiu in, thamuang tak ah pui kit hi’n lau; la ma-âng un mual leh tângte chu, La sa’n kikodok intiu in, gamlak ah thing zosia chun, a khut uh hun bêng ta’n au.

¹³Hampa lingnei ke’na mun ah chun, châkthingte hung kekdok ta’n tin; theimi lingbuk ke’na mun ah chunle, vaisuaklu hung kek ta’n a; zia chu LALPA â ding ah kumtuang ah, tepte’na leh mêlchikna hung hita’n tin, kuama’n ziate chu vât tha ta pua’n au.