Read Vaiphei ISAI 56 Bible Online

ISAI 56 - Vaiphei bible

ISAI 56

¹LALPA chun zia gual hin a gen a: Thu dik in vaihawm unla, dik tak in bawl un; ka hukdamna chu hung tung pai ta’n tin, ka hukdawna chule hung kilang pai ziang ding ahi ngal a.

²Zia gual thilbawl ah, tudet zing a, sabbath ni subuak lo ah chang thiangtho a, thilphalo bawl lo ding ah kisûmte chu, mi hampha a hiu.

³Gam dang mi, LALPA hun kizoppitate chun, “LALPA‘n a mite lak ah kipat in, ei khen chuam ding ahi,” ti kiu hen la; mi kiget chunle: “Kei vang thingbul gawtek gual bep ka hi,” ti diak kiu hen.

⁴Mikiget, ka cholni chang ah, ka lung lam thilte têl ah, ka thuthung tudet mite kiang ah chun, LALPA‘n zia gual hin a gen a:

⁵Ka Insung, ka bâng in a ûm kîmvêlna sung ma ma hin, chapate leh chanute sâng ah phazaw, amau hetzingna ding pia’ng ka; kumtuang ah a min ding uh pia’ng ka tin, tichun, bangmatik in pai thâk hita pua’n a.

⁶Chun, gam dang mi, LALPA hun zawm ah, a nasêm ding leh LALPA min ngaina, a suak ding ah hung kipia, a cholni subuak lo ah chang thiangtho a, ka thuthung tudet taphot chu,

⁷amau chu ka tâng thiangtho ah pui tung ing ka tin, ka In pauchapna In ah chun, kipak tak ah um dingin siam ing ka. A hâlmang thillatteu leh a kithoinateu chu, ka mâichâm ah pom hita’n a. Ka In chu mi zosia â ding ah pauchapna In, hung hiding ahi ngal a.

⁸Paithâk ah um Israelte puikhawm kitpa, LALPA PATHIAN chun: A kiang ua puikhawmsate bân ah a dang, mi tam tak hun puikhawm nalai ding ka hi, a tingal a.

⁹Nanghaw, gamsa zosiate, gammâng ah gam sahâng zosiate haw, a ne zo dingin hung kuan un!

¹⁰Israel gâlvêngte chu mitthûm, hetna bei ngen a hiu ah; uicha pau helo leh hâm thei lo, mawk um ah lum nguai mai leh, i-mut thût gual ngen a hiu.

¹¹Uicha chu a gawlsan un, vâ chintawk a nei puau hi. Belampute’nle hiatthiamna a nei puau in; a leng un amau lawkna ding bep ngaitua in, amau lampi chiat a zui zo tau hi.

¹²Amau chun, “Hung un, uain dawn hitiu; zukha dawn vâ sêt hitiu. Jing leh tu’ni gual hi’ntin; gen gual lo ah ni lopi hiding ahi,” a tiu hi.