Read Vaiphei ISAI 59 Bible Online

ISAI 59 - Vaiphei bible

ISAI 59

¹Ngai un, LALPA khut chu, a hukdam thei lo ding ah chom talua a hipua’n, a nakhang chule a hethei lo ding ah ngong talua ahi diak puai.

²La khawlonau chu Pathian tawh la kikâl ua, daidanna’n a hung pang zaw ta’n, a mêl a lia tâk ziakin a hethei talo a hizawi.

³La khutteu chu thisan ah sukbuak a la hita’n, la khutzungteu chule khawlona sukbuak a la hi zo ta’ngal a; la mûk un zuau thu a gen tau a, la lei un nunsiatna thu ngen, a gendok ta’ngal a.

⁴Kuama a dik ah vaihawm a um ta puau a, dan dungzui ah diktat kuama a um puau; zuau ah kilepchâk la chîng un, zuau ngen la gen un, thil phalo ngen la ngaituau ah, khawlona ngen a hing hi.

⁵Thangchom tui a awpkêu un, momgâng thâng puan in a gat ui; a tui uh ne’kha taphot chu a thiu a, a tui keu kha taphot chun, thangchom ngen a hung pawtdok ui.

⁶Momgângte chu a sil leh chên un pang pua’n tin, a thilsiam un kuama kivan pua’n au. A thilbawl taphot uh khawlona ngen ahi’n, a khut un thagum sua’na ngen a um hi.

⁷A keng uh thil phalo bawl dingin a chan-gang un, bangma bawlselote thisan sua dingin a kinaw he huu ah; a ngaituanau zosia chu khawlona ngen ahi’n, manthaina leh suksiatna chu a lampiu ahi.

⁸Kichamna lampi a he’pha puau in, a tawi leh channau ah chun, vaihawmna dik a um puai. A lampiteu chu a kawi lumlet thei pen in a bawl un, zia lampi haw kha ta’ chun, thamuanna a he’pha puau hi.

⁹Ziaziakchun, vaihawmna dik ah kipat chun, ka gamla tau in, diktatna chun ei pha zo ta puai; vâk ka hawl unla, thimna bep a hizawi; vâkna hawl lai chu thim lak in ka chia tau hi.

¹⁰Mitthûm gual in bâng ka jût un, mit beite gual in ka kimai ui; thim lak ah kisui gual in, sûnchang lai tak inle ka kisui un, mi thatho takte lak in, mithi ka bang bep ui.

¹¹Savom gual in ka ngîk un, vakhu gual in ka thûm lit lit ui. Vaihawmna dik ka la ngâk un, ahi’n la, a um ta puai; hukdamna ka ngâk un, ahi’n la, keimau ah kipat in a gamla ma ma hi.

¹²La masang ah ka sukkhialnau a tam ma ma ngal a, ka gitlo’nateu chun ei hêksia zing ui. Ka bawlkhialnateu chun ei umpi zing in, ka bawsiatnateu chu ka he tau hi.

¹³LALPA kilepsan in ka la hi’khial tau in, ka Pathian uh zui lo in ka la kiheimang zo tau ah; helna thu leh mi jakda ding lam ngen ka gen un, lepchia thute ngen ka ngaituau a, lunggil tak ah kipat in zuau thute, ka hun sêkdok sek zaw tau ahi.

¹⁴Vaihawmna dik chu le’bul in a um ta’n, diktatna chu gamla tak in a ding den tai; thutakna chu khawlai tualjang in, a kipal pâi ta’n; chuleh, thudikna chun mun a nei ta puai.

¹⁵Thutakna chu a lawsam ta’n, gitlo’na kipat kiheimang taphot chu, khut thuak ding ah kipia gual a hiu. LALPA chun a la mu ta’n, vaihawmna dik a um tâk lo ziakin, a lung a dam ta puai.

¹⁶Kuama cha thudik a um puau ti a mu’n, a hung kisalâ ding khatle a umlo ziakin, lamdang a sa ma ma hi; tichun, ama khut ma ma’n zaw’na a pia’n, chuleh, ama diktatna’n a tudet tai.

¹⁷Diktatna chu awmphaw gual in a âk a, a luchung in hukdamna thîk lukhuk a khuk hi; phuba lâkna chu sil leh chên gual ah, kithuamna’n a mang a, hachang thakna chun a kithuam hi.

¹⁸A thilbawl uh tawh kigûn in dit kit in a; ama dodâlte chung ah lungnatna, a mêlmate chung ah thukna leh, tuikual gam zosia chule hun thuk kit in a.

¹⁹Tichun, tumlam ah mite chun, LALPA min hun kicha ta’n tiu in, sualam ah mite chunle, a lopina hun kicha ta’n au; luicha tuilian leh LALPA hui in a mût, gual in hung ding ahi ngal a.

²⁰Chun, Jakob Inkuan ah mi, a hi’khelnau haisante kiang ah chun, a Tan pau gual in Zion ah chun, hung ding ahi, LALPA‘n a tii.

²¹Chun, kei â dingin vang, zia hi amau tawh ka kikâl ua ka thuthung ding chu ahi, LALPA‘n a tii: Tu’ ah kipat bangtik chan inle, la chung ah ka thagau um leh, la kam ah ka thu ka koite chu la kam ah kipat pawtdok ta pua’n tin, la chate leh la suan leh pâkte kam ah kipat chunle pawtdok ta pua’n ah, ti’n LALPA chun a gen hi.