Read Vaiphei ISAI 62 Bible Online

ISAI 62 - Vaiphei bible

ISAI 62

¹A dik zia sûn lai gual ah a hung vâkdaw a, a hukdamna le thaumei kuang tak gual ah a hung vak masangsia chu, Zion ziakin thip hiat hiat pua’ng ka tin, Jerusalem ziakin kichawl hiat hiat thei pua’ng ka.

²Namtin in la dik zia hun mu’n tin uh, leng zosia’n le la lopina hun mu ta’n au; tichun, LALPA‘n a hun phuak piak, min thak khat ah ko hung hita’n la.

³LALPA khutpek ah chun, lopina lal lukhuk hung hita’n la tin, la Pathian khut ah chun, lengpa lal lukhuk jem in hung pang ta’n la.

⁴Nangma chu, “Azubah” ti ah ko in um ta pua’n la tin, la gam uh chule, “Shemamah” ti ah gensim in um ta pua’n tin, nang uh chu, “Hephzibah” ti hizaw ta’n la tin; la gam uh chule, “Beulah” ti hita’n a; la chung ua LALPA a lungdam tâk ziakin, la gam uh chule kichenpi kît ding ahi ngâl a.

⁵Tangval in nungakthiangtho a kichenpi gual in, la chateu in hun kichenpi intiu in, mo neitu monu chung ah a lungdam ma ma gual in, la Pathian uh la chung un kipak ma ma ta’n a.

⁶Aw Jerusalem, la kulbângte chung in, gâlvêngte ka hun koi piak hi; a sun a jan in chawl pua’n au.

⁷Jerusalem khua chu a tundin kit a, khawvel pumpi pakchat ah a siamdaw kit masang sia, nanghaw, LALPA hezing tapote chu, kimawk chawl ziang kiu inla, ama le kichawl damsak kiu in.

⁸LALPA chun a khut changlam, a khutbân thahât suang in thu a tiam hi: “La sepgimnau ga chu la mêlmateu, nêk dingin pia ta pua’ng ka tin, la grep tuiteu chule gam dang mite’n, dawn kit ta pua’n au;

⁹a tho hâtu chun ne’n tin, LALPA chawihoi intin uh, a ga lakhawmte chun mun thiangtho huang sung ah chun, hun dawn ta’n au,” ti in.

¹⁰Chia theng unla, kul kotkhak ah chun chia theng un; mipite hungna ding lampi bawl tau in; vuk dim unla, lamlian chu siamphau inla, suangtumte chu zen thiang un. Namtin in a mutheina ding un, puanlap chu khaisâng un!

¹¹Ngai un, LALPA‘n kawl kîmvêl tiang ah mite kiang in, zia thu hi a puang jak tai: Zion chanu kiang in zia gual hin gen un: “Ngai in, la hukdamna a hung tung tai; ngai in, a kipakman chu a chawi in, nasep man ah a piak ding chule, a ma-âng in a um hi,” ti in.

¹²Tichun, amau chu Mipi Thiangtho leh, LALPA Tatdawsate, hun ti ta’n tiu in; chuleh, nang chule khawpi nutsia hilo in, “Hawldaw ah um” ti hung hita’n la.