Read Vaiphei ISAI 63 Bible Online

ISAI 63 - Vaiphei bible

ISAI 63

¹Zia tak ah Bozrah puanlo ah kihuan hun sil ah, Edom gam ah kipat hung ah, puan lopi tak sil pum ah, a hatna nasa tak tawh hung saw kua a hem? “Keima, a thiamchan dan uh genlangtu leh, hukdam ding ah hat chu ka hi”.

²Bang ding ah la puan chu san ah, la sil leh chên grep sûkna khûk ah, kidia bang ziang a hem?

³Kei ngen inle grep ka sûk sek ah, mipite lak ah khat inle ei kithuapi puau hi; lungna tak in ka sûk in, hachangthak tak in ka chuanchil tai. A thisan un ka sil leh chênte a the’khum in; tichun, ka nîk leh puan zosia ka subuak ta ahi.

⁴Ka lungchang in phuba lâkna ni ding chu a gêl ten ah; chuleh, ka tatdawna kum chule a hung tung tai.

⁵Ka dâk vêl leh, kuama a panpi ding a um pua; ka bân ka jak ah, kuama a tuktâng ding a um pua, mak ka sa ma ma hi. Tichun, keima khutbân chun zaw’na ei pia ta’n, ka hachangthakna chun ei tutâng tai.

⁶Lungna ma ma in mipite chu ka chil ta’n, ka hachangthakna ka gawtnawi in; chuleh, a thisan uh lei tual in ka sungtha tai.

⁷LALPA‘n a hepina ei vukna dungzui in, LALPA pakchatna tawh, LALPA hepi ngilnei dan tak chu gen ing ka tin; chuleh, Israelte chung ah a phatna nasat dan, a ja’ngaina dungzui ah a chung ua a vuk dan tawh, a hepina ngilneina nasat dante chu gen ing ka.

⁸Amau chun, “Amau chu ka mite a hiu a, ei thêm lo ding ah ka chate chu a hiu,” a la ti tâk ziak un; tichun, ama chu a Hukdampau a hung hi tai.

⁹Sukgenthei ah a la umnau zosia a la thokpi a, a umpi zing a vansawlchâk chun a hukdok tai; a hepina leh lainat bêk ziak ah hukdok in a domsang ah; tichun, nidang lai pek ah kipat khan, a la kaibât zing hi.

¹⁰Himaleh, amau chu a la hel in, a thagau chu a la hilungngai tau hi; ziaphatchun, a mêlmau in a hung pang ta’n, ama ngei chun a le do ta ahi.

¹¹Ziaphatchun, malai ah a suakpa Mosi kha a hezing hi. Tuisuagiat lak ah kipat amau leh belam honte tawh, a belam chingteu puidokpa kha khoi lam tung zo ahi tam? A lak ua A Thagau Thiang koipa kha khoilam tung ahi tam?

¹²A khutbân lopi tak, Mosi khut changlam kitonpi zing a, kumtuang ah a minthanna ding ah, a ma-âng ua tuiliante khên tan a,

¹³tuili thûk tak pui gâlkâipa kha, khoilam tung ahi tam? Gamkeu ah sakol gual in a kisui kha puau hi.

¹⁴Phâijawl ah bawng hon a tat ua a chawldam gual un, LALPA Thagau chun chawldamna a pia’i. Tichun, la min a lopi theina dingin, la mipite chu nang in la pui zing tai.

¹⁵La chênna thiangtho leh ja’um tak, van ah kipat in hun thîl suk in en tiam in. La phatchuam ngaina leh la hatna kha, khoilam ah um ahi tam? La lungthim ah lei ngainatna leh, lei khawtuana keima ah kipat hin lâkmang ahi tai.

¹⁶Abraham in ei helo in, Israel inle ei la ngaisak lo maleh, nang chu ka Pau la hi’ngâl a. Nangma chu, Aw LALPA, ka pau la hi’n, masanglai ah kipat him ah, ei Hukdokpa chu la min ahi.

¹⁷Aw LALPA, bang ding ah la lampi ei haw khialsak a, nangma hun lau lo ding ah bang ding ah ka lungthim uh, ei suktâk piak la hem? La suakte min ziak leh, la gochan namte haw ziak hin, hung kihei kit in.

¹⁸La mipi thiangthote chun hun chomcha sung, la mun thiangtho chu a lua un; himaleh. Tu’hin ka mêlmateu chun a chuan den tau hi.

¹⁹A chung ua vai la hawm khâkna ngai lo mite leh, la min ah kiko kha ngai lo mite gual in ka um tau hi.