Read Vaiphei ISAI 66 Bible Online

ISAI 66 - Vaiphei bible

ISAI 66

¹LALPA‘n zia gual hin a gen hi: Van chu ka lalchutpha ahi’n, lei tual hi ka keng ngakna ahi; kei â ding ah khoi tak ah In ei sak piak ding la hiu ah, ka chawldamna ding mun chule khoi tak hiding a hem?

²Zia zosia hi ka khut in a bawl ahi, zia gual tho ah chun zia thil zosia hi kei â ahi, LALPA‘n a tii. Himaleh, kingainiam ah, lungthim ah thasia ngawi ngawi leh, ka thu lau ah kithingte chu ka hawl ahi.

³Bawngchal that tapo chu mihing that gual hi’ntin; belamno kithoina ding ah lân tapo chu, uicha gawl ât tan gual hi’n a; thâiga ah kithoina bawl tapo chu, vokcha thisan ah kithawi gual hi’n a; gimtui hâl ah hetzingna ding ah thilpiak lân tapo chu, milim âng ah maljawlna don gual hi’n a. Zia gual mite chun amau bawldan bep pha a sau ah, a thil ki’dak um bawl uh chu, a lungthim un thâtnop um a sau hi.

⁴Ka ko phat leh kuama’n ei dawnhu puau ah, ka ho phat leh a kihiat losak sek un, keima mit mu ngei in thil phalo a bawl un, ka lemsak lo lam lam chu a bawl sek ziak un, a chung un sukgentheina hun tunsak ing ka tin, a lau pen uh a chung un tunsak ding ka hi.

⁵Nanghaw a thu lau ah kithing sekte haw, LALPA thugen hi a la ngai un: Ka min ziak ah nanghaw hun hua, hun pâm pai la suapiteu chun; LALPA chu chawihoi in um hen, la kipaknau ka mutheina ding un! a tiu a. Himaleh, amau a hiu chulam, mualpho tak ah um dingte chu.

⁶Ngai un, khawpi sung ah kipat in kiko thawm a so veng vung hi! Tempul ah kipat in aw a gii! LALPA‘n a mêlmate a thukna aw git ahi!

⁷Nauvei man lo in cha a hing in, a nat in a tut ma’n chapa a nei hi.

⁸Zia gual chu kua’n a he kha em? Zia gual chu kua’n a mu kha em? Gam hi ni khat thu in a piang thei em? Hat khat thu’n nam piting a piang ziang thei em? Himaleh, Zion chun nauvei a het phat phatin, a chate chu a piang ngal ui.

⁹Cha piang ziang lo dingin nauha’nâ ka hun veisak ngai em? LALPA‘n a tii. Keima, nau hun piansakpa hin, sûl chu ka khâkbit piak ah a hem? la Pathian un a tii.

¹⁰Nanghaw, Jerusalem ngainate haw, kipakpi unla, ama ziakin lim tau in; ama a la sûnte haw, lim tak in kipakpi tau in;

¹¹a nawitui chu chêp ah, thamuanna awmtâng ah lungkim tak ah la umtheina ding un; a lopina nasa tak chu chên ah, lungdam tak ah du’tawk ah la chêp theina ding un.

¹²Zia gual hin LALPA‘n a tii: Ngaitia, a chung ah vangphatna chu, lui gual in hun luan jaksak ing ka tin; namtin hausakna chu lui luanglet gual in, hung luang lut ta’n tin; nawi gual in chêp ta’n la tin, nang hun enkol ah a khut ah hun pâi in, a khup chung ah kichopsak in um ta’n la.

¹³Mi khat a nu’n a thamuan sek gual in, hun thamuan ta’ng ka; Jerusalem ah chun thamuan in um ta’n la.

¹⁴Hun mu ta’n la tin, tichun, la lungthim chu kipak ma ma ta’n a; la gûte chu hampa gual in haldok kit ta’n a; LALPA khut in a suakte a umpi zing hi ti het hi’ntin, a lungdam lona chu a mêlmate chung in tung ta’n a.

¹⁵Ngai tiam u, a lungnatna chule hachangthak tak in, meikuang sunkhum gual ah vauhil dingin, LALPA chu meikuang ah hung intin, a sakol kângtalaite chule, thigawpi gual hi’n a.

¹⁶LALPA‘n a vaihawmna chu, meikuang in vai hun hawmsak ding ahi’n, mi zosia chung in a chemjam vaihawm sak ding ahi ngal a; tichun, LALPA‘n a thâlup chu tam ma ma ding a hiu.

¹⁷Huan tincheng ah lût ah, a lailung tiang tiang ah zui lut ah, voksate leh ki’dak um tak tak, santhîm sa nasan ne ah kihithiangtho ah kithianthosak ma ma te chu, sukmangthai khawm sik sek hung hita’n au, LALPA‘n a tii.

¹⁸A lungthim ua a ngaituanau zosia leh a thilbawl zosiau chu ka he ngal a; chuleh, namtin leh pautinte pui khawm dingin ka hung kuan hi; tichun, hung khawm intiu in, ka lopina chu mu ta’n au;

¹⁹chuleh, a lak un tepte’na hun koi ing ka. Chun, a lak ua suakcha sunte chu namtin kiang in: Tarshish ah te, Put ah te leh Lud gam ah thalpi luaisa umte chu, Tubal gam leh Javan gam ah te leh, gamla tak ah thialkâl gam zosia ka lopina a la he’kha nai lo leh, a la mu kha nai lo zosiate kiang in sawl ing ka tin; tichun, ka lopina chu namtin kiang in puang jak ta’n au.

²⁰Israel chate’n LALPA In ah bêl thiangtho ah thillat ding a hun choi sek gual ua khan, Jerusalem ah ka tâng thiangtho ah chun, LALPA kiang ah lat dingin namtin lak ah kipat in la suapiteu chu, sakol chung ah te, sabiltung chung ah te leh gancha hat tak tak te chung in hun pui khawm in au.

²¹Tichun, a lak ua khenkhatte chu thiampu ah pang dingte leh, Levi chi dingte in hun têldok ing ka, LALPA chun a tii.

²²Tichun, lei thak leh van thak, ka siam dingte chu ka ma-âng ah, umzing ta ding a hiziak un; zia gual ma chun, la suan leh pâkte leh, la min chule umden ta’n a, LALPA‘n a tii.

²³Thathak ah kipat thathak kit tiang, sabbath ni kipat a sabbath ni kit tiang in, keima ei ho dingin mi zosia hung ta’n au, LALPA‘n a tii.

²⁴Chuleh, hung pawtdok intiu in, ka chung ah helte thiluang chu hung en ta’n au; a than uh la thi ta pua’n tin, a meikuang uh le mit ni um ta pua’n tin, mi zosia mu ding ah thil tizat um tak hizing ta’n au, ti in.