Read Vaiphei ISAI 7 Bible Online

ISAI 7 - Vaiphei bible

ISAI 7

¹Judai gam ah Lengpa Uzziah chapa, Jotham chapa Ahaz a lal lai in, Suria Lengpa Rezin tawh, Israel Lengpa Remaliah chapa Pekah chu Jerusalem do dingin a kuan tau ah; himaleh, a va zo puau a.

²Suria tawh Ephraimte a pang khawm ui ti David In sung mite’n a het phat un, Ahaz lungchang leh a mipite lungchang chu, hui in gamlak thing a mûtlîng gual in a kilîng tau a.

³Ziaphatchun, LALPA‘n Isai kiang in: “Nang tawh la chapa Shear-jashub chiau inla, Puansawpte lou mun zotna lampi zui unla, dil saknung jawn ah tuilâkna bul ah Ahaz valamtuau inla;

⁴a kiang in, Chingthei tak in um inla, thip hiat hiat in; zia meisel de liak liak gual bep, Rezin leh Suria tawh Remaliah chapa lungnatna huaisia takte ziak ah hi’n lau kin la, la lung thuaisak him him kin.

⁵Suria tawh, Ephraim tawh, Remaliah chapa hin la siatna ding ngaitua in,

⁶Judai gam do dingin kuan to hitiu in, Jerusalem chu sât tan in, ei uh â dingin vazo hitiu in; chuleh, Tabeel chapa hi lal in chutsak hitiu,” a tiu a;

⁷ziaziakchun, LALPA PATHIAN in zia gual hin a gen hi: A gen gual chun bawl pua’n tin uh, zia gual chun bangma hung tung pua’n a.

⁸Suria luchang chu Damaska ahi’n, Damaska luchang chu Rezin ahi. (Kum sawmguk leh nga sung in Ephraim chu sukchâkvai in um ta’n tin, mipi ti kham ding um ta pua’n au.)

⁹Ephraim luchang chu Samaria ahi’n, chuleh, Samaria luchang chu Remaliah chapa ahi kit hi. La taksan zaw lo chun, pang zo him him pua’n la, ti’n gen in, a ti’n.

¹⁰Chuleh, Ahaz kiang in LALPA‘n zia gual hin a hun gen kit a:

¹¹LALPA la Pathian kiang in tepte’na don in; la nop leh Sheol tawh bang ah thûk hi hen la, la nop leh van chan ah sâng le hi hen, ti in.

¹²Himaleh, Ahaz in: “Don pua’ng ka tin, LALPA chu patep talojen ing ka,” a tia.

¹³Ziaphatchun, Isai in: Aw David Inkuan ah mite haw, zia hi he tau in! A thi thei mihing mai mai suklunggim hi, thil mai mai in la ngai ua a hem, ka Pathian nasan suklunggim la gaw nalai sêt un?

¹⁴Ziaziakchun, LALPA ma ma chun tepte’na hun pia ding ahi. Ngai un, nungak thiangtho chun nau hun vop intin, chapa hun hing intin, a min in Immanuel ti sak hiding ahi.

¹⁵Ama chun thil sia doi lo ah, thilpha doina châng a hun hiat thei phat leh, bawngnawi khal leh khuaizu bep dawn ta’n a.

¹⁶Zia naupang chun thilsia doi lo ah, thilpha doina châng a hiat thei masang in, a lengteu la huphul ma ma gam te ni hi nutsia in um in au.

¹⁷Assuria lal ma ma, Judah ah kipat Ephraim a hung pawt daw ni ah kipat chun, LALPA chun nangma leh la mipite leh la pa Inkuan ah mite chung ah chun, zia gual hun tung kha nai lo gual chu hun tunsak ding ahi, a tii.

¹⁸Zia ni chuleh, LALPA‘n Aigupta gam ah luinâkte ah thosi um zosia tawh, Aigupta gam ah khuai um zosia chu saisilît in hun ko khawm in a.

¹⁹Tichun, hung khawm intin uh, kênliang zosia, suangpi kawlhawm zosia, lingbuk zosia leh hampa hing mun zosia ah chun chêng ta’n au.

²⁰Zia ni phat chuleh, LALPA‘n Lui lian gâl lam ah mi, Assuria lengpa’n samchem hiam a gawi chu mang in, a lujang sam ah kipat a keng tiangah a mul zosia leh a khamul natiang in hun metnâm piak ta’n a.

²¹Zia ni phat chuleh, mi pakhat in bawnglâ khat leh belam pani a vul chun,

²²a nawitui chu a tam ma ma ding ziakin, a tui ah dawn ding leh a khal ah bawl ding kidai ma ma intin, a gam ah um nalai zosia’n bawngnawi kîng leh khuaizu, niang tak in ne ta’n au.

²³Zia ni phat chuleh, grep ga tam tak tak, dangka shekel sâng tampi pi man umna munte kha hampa lingnei leh khaugui in hung jam dim ta’n a.

²⁴Zia munte chu ling leh khaugui ngen ah dim ding ahi tâk ziakin, thalpi leh thalchang chawi ah gamvâkte bep vachia ta’n au;

²⁵chuleh, tâng gam tudâl ah a kãl seknau munte kha, hampa lingnei leh khauguite huphulna ziakin, lou ah bawl lo hung suak ta’n tin; bawng hon leh belam hon thâjanna mun hung hizaw ta’n a.