Read Vaiphei THIAMPUTE LEKHABU 10 Bible Online

THIAMPUTE LEKHABU 10 - Vaiphei bible

THIAMPUTE LEKHABU 10

¹Tu’hin, Nadab leh Abihu, Aron cha teni hin a mei luakna gêl un mei âm a luak ua, gimtui koikhum in, LALPA thupiak gual lo tak in mei thianglo a hun lân tau a.

²Tichun, LALPA ma ah kipat in mei a hung pawt ah, amau teni chu a hun kânglum ta’n, LALPA ma ah chun a thi tau a.

³Ziaphatchun, Mosi’n Aron kiang in: “LALPA‘n a la gen kha zia hi ahi: ‘Keima ei nai tapote kiang ah, thiangtho in kilang ing ka tin; tichun, mi zosiate âng ah chun, choisa’n in um ding ka hi,’ a la ti kha,” a tia. Aron in gen ding he lo in a thip tai.

⁴Mosi’n Aron paneu Uzziel chapa Mashael tawh Elzaphan a ko ah, a kiang un, “Hung kipan un, la unauteu saw mun thiangtho ah kipat in ladok unla, giamun pawlam in thakdok un,” a tia.

⁵Mosi thupiak dungzui in a hun nai ua, a puanâk chual ua man in giamun pawlam in a jawndok tau.

⁶Chun, Mosi’n Aron tawh a chapa Eleazar tawh Ithamar kiang in, “La luchang uh hawkdok kiu inla, la puanteu le bawt thêk diak kiu in; achutiloleh, thi kha’n lau: Ahiloleh, mipite chung in Pathian lungnatna hung tung kha’n ah; ahi’n, la chipi Israelte zosia chun LALPA‘n mei ah a hun hallup hi sûn thei in au.

⁷Kikhopna biakbûk ah kipat in la pawtdaw lo ding uh ahi; achutiloleh, thi kha’n lau: LALPA sathaunu’ la hita ngâl un,” a tia. Chutichun, Mosi thuhil gual ah chun a um tau a.

⁸LALPA chun Aron kiang in:

⁹“Nang leh, la chate a hem inle mipi kikhopna biakbûk sung ah la chia lai un, zu leh khamthei thil him him la dawn lo ding uh ahi; achutiloleh, thi mai ding la hiu: Zia hi la suanteu tiang ah kumtuang dan ah la nei ding uh ahi.

¹⁰A zek leh a zek lo, a thiang leh a thianglo la khendan ding uh ahi.

¹¹LALPA chun Mosi mang ah la kiang ua a dan thupiak zosia Israelte la zilsak ding uh ahi,” ti’n a gen a.

¹²Mosi chun Aron leh a chapa dam nalai, Eleazar tawh Ithamar teni kiang in, “LALPA â ding ah mei ah chângbuang thillat bângkhâite chu lau inla, mâichâm bul ah thawipanglo in neu in: Thilzek thiangtho pen ahi ngâl in;

¹³LALPA â ding ah mei ah thillat lak ah nangmau chantum leh la chate chantum ahiziak in, mun thiangtho ah la nêk ding uh ahi: Chuti gual ah bawl ding chun thupiak ah um ka hi, a tia.

¹⁴Chun, pei ah um sa awm leh a liangte chu mun thiangtho ah, nang tawh, la chapate tawh, la chanute tawh la nêk ding uh ahi: Israel suante kichamna thillat kithoina nangma leh la chate chantum ding ah guat ahi ngâl a.

¹⁵Pei ah um, sa dâk tawh a awm chu LALPA ma ah pei thillat dingin sathau tawh a hun chawi ding uh ahi; zia chu LALPA thupiak gual ngei ah, la khang zosiau ah nang tawh la chate chantum ding ah guat chu ahi,” a tia.

¹⁶Chun, Mosi’n gitlo thoina kêlcha chu gunchu tak in a vaenchian ah, a la kângtum ta’n. Chutichun, Aron chapa dam nalaite, Eleazar tawh Ithamar chung in a lungna ta’n;

¹⁷“Bang ding ah gitlo thoina sa chu mun thiangtho ah ne lo la hiu em? Zia hi thilzek pen, mipite gitlona pawmang ding ah LALPA ma ah kichamna bawl piak ding ah nanghaw a hun piak ahi ngâl a.

¹⁸A thisan chu mun thiangtho ah la hun chawi lut puau a. Thu ka hun piak gual ah khan mun thiangtho ah la nêk ngei ngei ding uh ahi,” a tia.

¹⁹Tichun, Aron in Mosi kiang in: “Ngai tia, tu’ni hin LALPA âng ah a gitlo kithoinau leh a hâlmang thillat uh a la lân tau a: Zia gual thil hi ka chung in a hung tung ta mai a! Tu’ni hin gitlo thoina chu a la ne hita leng, LALPA‘n ei pompiak thei diam?” a tia.

²⁰Mosi’n zia thu chu a het phat in a lungdam tai.