Read Vaiphei THIAMPUTE LEKHABU 11 Bible Online

THIAMPUTE LEKHABU 11 - Vaiphei bible

THIAMPUTE LEKHABU 11

¹LALPA chun Mosi leh Aron kiang in thu a gen a:

²Israelte kiang in zia gual hin gen un: Lei chung ah gamsate lak ah la nêk thei ding uh chu zia sate hi a hiu;

³Bang sa hitaleh a tin kikâ, kikâ theng, annêlthâi, ziate chu la nêk ding uh ahi.

⁴Ahi’n la, a tin kikâ, annêlthâi himaleu, ziate hi la nêk lo ding uh ahi: Sangawngsau chu la nêk lo ding uh ahi; annêlthâi lehle a tin kikâ lo ahiziak in la nêk lo ding uh ahi.

⁵Sakik hin annêlthâi maleh, a tin kikâ lo ahiziak in la nêk lo ding uh ahi.

⁶Bilpi hin annêlthâi maleh, a tin kikâ lo ahiziak in la nêk lo ding uh ahi.

⁷Vokcha hi a tin kika’n, kikâ theng ziang maleh, annêlthâi lo ahiziak in la nêk lo ding uh ahi.

⁸Ziate hi a sa la nêk lo ding uh, a luang uh le la sukkhak him him lo ding uh ahi; nang uh â ding ah sathianglo a hiu.

⁹Tui sung ah um ziate hi la nêk thei dingteu chu a hiu: Tui ah chêng, phulip leh tha nei, tuipi um hileh luicha um hitaleh, la nêk uh a thiang hi.

¹⁰Tuisuagiat ah umte, luipi ah umte leh tui lak ah khawsa himaleu, phulip leh tha nei lo zosia chu ki’dak um a hiu;

¹¹zia gual haw chu la ki’dak zing ding uh ahi. A sa la nêk lo ding uh ahi’n, a luang le la ki’dak ding uh ahi.

¹²Tui lak ah ganhing phulip leh tha nei lo taphot chu la ki’dak ding uh ahi.

¹³Vachate lak ah ziate hi nêk thianglo ah la ngai ding uh ahi; ziate hi thianglo hi’ntin uh, la nêk him him lo ding uh ahi: Mupi, Muvânlâi, Musane,

¹⁴Muvompi leh Muthîl leh amau chi him him;

¹⁵Va-ak leh amau chi him him;

¹⁶Vasakol, Simbu, Tuiva leh Mu chi him him;

¹⁷Simbuchânglit, Ngagâl leh Simbupi,

¹⁸Tuivakâng leh gamkeu simbu,

¹⁹Tuivapi, Tuivakengsang leh Vatuthaw leh Bâk haw hi.

²⁰Ganhing tha nei ah keng pali lamzawt zosia chu a thianglo a hiu.

²¹Himaleh, a keng pali nei, a chopna ding ua a khûp uh kithep theite chu nethei in lau.

²²Ziate lak ah la nêk thei dingteu chu: Khauphak leh amau chi him him; Khaubepi leh amau chi him him; Khuangbai chi leh Khausel kiti chi him him te hi.

²³Ahi’n, ganhing dang keng pali nei leh tha nei zosia chule a thianglo a hiu.

²⁴Zia sate ziak ah hin buak thei in lau: Kuale zia saluang sukha taphot chu nitâk lam tiang in buak in a;

²⁵kua’nle a luang uh a sukkhak pal chun, a puanteu a sawp ding uh ahi, nitâk lam tiang in a buak ding uh ahi.

²⁶Ganhing a tin kikâ theng lo leh annêlthâi lo gamsa taphot luang chu a thianglo hi’ntin; kuale zia gual ganhing sukha taphot chu a buak ngâl ding uh ahi.

²⁷Keng pali nei, a kengtin kikâ ah lamzawt taphot chu, nang uh â ding ah buak hi’ntin; a luang sukha taphot chule nitâk lam tiang in a buak ding uh ahi;

²⁸a luang la taphot chunle a puan uh a sawp ding uh ahi; nitâk lam tiang in a buak ding uh ahi: Nang uh â ding ah thilbuak ahi ngâl a.

²⁹Lei chung ah a hon ah ta’ ganhing lak in ziate hi a thianglo hin ah: Bui, Tîkpi leh Tang,

³⁰Tawkêk, Awle, Tanmâm leh Thankik, amau chi te hi.

³¹Ziate hi a bok ah vâk thaw lak ah a thianglote chu a hiu; kua’nle ziate thiluang hi a sukkhak pal chun nitâk lam tiang in a buak ding uh ahi.

³²Chun, a thi chun a delkhum khâk him him chuleh a buak ngâl hi’ntin, thing ah kisiam ûm leh bêl hi hen la, nîk leh puan, savun, saidip; ahiloleh, matchâk bang hiziang ta leh, tui ah dia hi’ntin, nitâk lam tiang in a buak ding ahi: Zia gual ah chun hithiantho hi’n a.

³³Ziate lak ah khat pen pen thisa kiaklutna leibêl chu, a sung ah um zosia tawh hi’buak ahi tâk ziakin, la khet phel ding ahi.

³⁴Zia bêl sung ah tui in a sukkhak nêkthei zosia chule a buak ngâl ding ahi; zia gual ah leibêl ah tui um zosia chule a buak ta ahi.

³⁵Bang hitaleh, a luang in a delkhum taphot chu a buak ngâl hi’ntin, thukkhûk a hem, bêl suanna a hem chule a buak tai: La khet phel dim dem ding uh ahi, a leng in a buak ta’n, thil thianglo ahi tai.

³⁶Saluang in a sukkhak taphot chu a buak himaleh, tuikhuk a hem, tuikul a hem chu vang a buak lo ding ahi.

³⁷Chuleh, thâichimu a sukkhakte chule a thiang hi’n a;

³⁸ahi’n, thâichimu chu tui ah kidiasa ahi tâk chun, a saluang khoi tak pen a hem inle a delkhum khâk ahi chun, zia chu a thianglo ahi tai.

³⁹Chun, a sa la nêk uh thiang maleh, a thisa luang khoikha taphot chu, nitâk lam tiang in a buak ding uh ahi.

⁴⁰A sa ne taphot chun a puan uh a sawp ding uh hi’ntin, nitâk lam tiang in a buak ding uh ahi; chuleh, a luang pawtu chunle a puan a sawp ding ahi, nitâk lam tiang in a buak ding ahi.

⁴¹Lei chung ah a hon ah ta’ ganhing taphot chu ki’dak um a hiu ah, la nêk lo ding uh ahi.

⁴²Lei chung ah bokvâk, a keng pali ah vâk a hem, ahiloleh keng tam tak neite a hem leh a gilpi ah kithol thaw him him chu la nêk lo ding uh ahi: ziate chu ki’dak um ngen a hiu.

⁴³A bok ah vâk ganhingte him him sukha’n, la kisubuak ding uh ahi puai; amau gual ah buak dingin la kisubuak ding uh ahi puai.

⁴⁴Keima LALPA la Pathian uh ka hi’ngâl a; kisuthiangtho unla, thiangtho tak ah la um ding uh ahi: keima ka thiangtho ngâl a. Lei chung ah bokvâkte ziakin kisubuak kiu in.

⁴⁵Keima LALPA hi la Pathian uh ka hi’theina ding ah Aigupta gam ah kipat nanghaw hun puidokpa kha ka hi; keima ka thiantho gual in, la thiantho ding uh ahi.

⁴⁶Zia hi gamsa leh vachate, tui sung ah ganhing leh lei chung ah bokvâkte lak ah,

⁴⁷a thiang leh a thianglo, ganhing lak ah nêk thiang leh thianglote la hetkhen theina ding uh dan chu ahi, ti la hil diu ahi, ti’n a gen hi.