Read Vaiphei THIAMPUTE LEKHABU 13 Bible Online

THIAMPUTE LEKHABU 13 - Vaiphei bible

THIAMPUTE LEKHABU 13

¹LALPA chun Mosi leh Aron a kihopi ah, a kiang un:

²Mi khat in a vun ah bawk a hem, meima liam a hem, vun phual a hem, a vun ah phâk tawhbang a hem a nei chun, thiampu Aron a hem, a chapate a hem kiang in a ki-etsak ding ahi.

³Thiampu’n a vun ah natna hik chu a la en intin, a vun ah natna mun ah a mul chu a vâm ah, a natna chu vunthual sung ah lut thûk ah a het chun, phâk natna ahi: thiampu chun a etchian zaw phat leh, “Thianglo ahi,” ti a pua’n ding ahi.

⁴A vun chu a hung vâm ah, a vunthual sung ah lut thûk lo ahi ah, a natna mun mul chule a vâm lo nâk chun, zia mi chu thiampu’n ni sagi koichuam in a.

⁵Thiampu’n, a ni sagi ni chun en kit intin, a natna chu a ngai ngai ah a mu ah, a vun lak ah kijak lona ahi chun, thiampu’n ni sagi dang koichuam kit intin;

⁶ni sagi a tin ni leh thiampu’n endik kit intin, a meima chu a khik ah, a hik chule jaklona a mu chun, thiampu’n, “A thiang hi,” ti’n puang in ah: beliam mai mai ahi, a puante sawp intin, hung thiangtho ta’n a.

⁷Ahi’n la, a thianna ding ah thiampu a ki-etsak nung ah, a natna chu a vun ah mi kâi thei ah a kilat chun, thiampu a ki-etsak kit ding ahi.

⁸Thiampu’n a la en intin, a natna chu a vun ah mi kâi thei nalai ah a mu chun, thiampu’n, “Thianglo,” ti’n puang in ah: Zia chu phâk chi khat ahi ngâl a.

⁹Mi khat in phâk natna a vei chun, thiampu kiang ah pui ding ahi.

¹⁰Thiampu’n a la en intin, a vun phualna leh a mul chu a vâm ah, a vun phualna chu a keu chun;

¹¹zia chu phâk kumlui ahi. Thiampu’n a thianglo ahi ti puang intin, a chuam ah koi ngai lo ding ahi: a thianglo ahi ti hetchian ahiziak in.

¹²Ahi’n, a phâkna chu a vun ah a jak ah, a vun zosia a luchang ah kipat a keng tiang ah thiampu’n a hetthei tiang phâk in a tuam chun,

¹³thiampu chun endik kit intin; chuleh, phâk in a pum ah a tuam suak chun, zia phâkvei mi chu thiang ti ah pua’n ding ahi: A pum ah vâm suak ta chu a thiangtho ahi.

¹⁴Ahi’n la, a vun a dul het hut chun thianglo hiding ahi;

¹⁵thiampu’n a vun dul het hutna chu endik intin, thianglo ti a puan ding ahi. A vun dul het hut chu thianglo; phâk ahi ngâl a.

¹⁶Chuleh, a vun dul het hut chu a hung danglam ah, a hung vâm chun, thiampu a ki-etsak kit ding ahi;

¹⁷thiampu’n a la endik intin, a natna chu a vâm kit chun, a natna chu a thiang ahi ti a puan ding ahi: a thiangtho ahi ngâl a.

¹⁸Chuleh, a vun ah uilut dam kitna bepawn ah,

¹⁹a phual vâm a hem, a san thim a hem a hung kilat kit chun, thiampu etsak ding ahi.

²⁰Thiampu’n a la endik intin, a natna chu a sung lut ah, a mul le vâm ding kisa a kilat chun, thiampu’n a thianglo ahi ti a puan ding ahi; zia chu phâk chi khat uilut ah hung kisiam ahi.

²¹Amabo, thiampu’n a la et ah, mul vâm a mu lo ah, vunthual ah a khik deu chun, thiampu’n ni sagi koi chuam in a.

²²Ahi’n, a vun ah kikâi theina a mu chun, thiampu’n a thianglo a hi ti a puan ding ahi: phâk tak tak chu ahi.

²³Ahi’n la, a phual chu a umna kichawn lo ah, a ma a chawn lo chun, uilut ahi; thiampu’n a thiang hi ti a puan ding ahi.

²⁴Ahiloleh, taksa vun chu mei in kang hen la, a katna chu hung pawl in a san vâm thim a hem in hung vâm ta leh,

²⁵thiampu’n a et dik ding ahi. A mabe ah multe chu a vâm ah, a be’ chule vunthual sâng ah thuk zaw ding ah a mu chun, phâk natna, meikâkna kipat hung kisiam ahi. Tichun, thiampu’n a buak ahi ti a puan ding ahi. Zia chu phâk natna ahi ngâl a.

²⁶Himaleh, thiampu’n a et dik ah, a mabe ah mul chu a vâm lo ah, vunthual sâng ah thuk zaw ding ah mu a hilo ah, a mual hiau bep ahi chun, ama chu thiampu’n ni sagi koichuam hen.

²⁷Ni sagi a tin phat leh thiampu’n endik kit intin; vun ah jam jak ah a kilat chun thiampu’n a buak ahi ti a puan ding ahi. Phâk hivei ahi.

²⁸Ahi’n, a mabe’ chu a phual ngai ah a um ah, vun ah le jam jak lo, neukhat dul hiau bep ahi chun, zia chu mei kakna bepawn ahi: Thiampu’n a thiang hi ti a puan ding ahi, meikâkna bepawn mai a hi’ngâl a.

²⁹Numei a hem, pawsal a hem in a luchang a hem, a khabe a hem in meima nei ta leh,

³⁰thiampu’n a meima chu endik intin, a taksa vun sâng ah thûk zaw a mu ah, a mul eng le neucha a um chun, a thianglo ahi ti a puan ding ahi: Tithak ahi’n, luchang leh khabe ah phâk um ahi.

³¹Tithak hivei chu thiampu’n en intin, vun sâng ah thûk zaw a mu lo ah, a mul vom a mu lo chun, zia tithak nei pen chu ni sagi a koichuam ding ahi.

³²Ni sagi ni chun thiampu’n endik kit intin, tithak hik chu a kichawn lo ah, a mabe ah mul eng le umlo ah, vunthual sâng ah thûk zaw lo ahi chun,

³³a mul chu metnâm ding ahi; himaleh, tithak mabe’ chu mêt lo ding ahi. Thiampu’n zia hik nei mi chu ni sagi a koichuam ding ahi.

³⁴A ni sagi ni chun thiampu’n endik kit intin; a hivei chu a vun ah chawn jak lo a hem, a vun sâng ah thûk zaw lo ah a mu chun, thiampu’n a thiang hi ti a puan ding ahi. Chun, a puante sawpsak intin, a thiangtho hung hita’n a.

³⁵Ahi’n, a thiansua nung inle a vun ah chun a hik hung kijak in kilang kit ta leh;

³⁶thiampu’n endik kit intin, a natna chu a vun ah a kijak chun, thiampu’n a mabe’ ah mul eng a hawl ngai ta pua’n tin: a thianglo ahi ngâl hi.

³⁷Ahi’n la, tithak be’ chu a ngai ngai ah a mu ah, zia sung ah chu mul vom a um chun, a natna chu a dam ta, a thiang kit tai; tichun, thiampu’n a thiang tai ti’n a puan ding ahi.

³⁸Numei a hem, pawsal a hem inle a vun ah tiphual vâm sit set a nei chun;

³⁹thiampu’n endik intin, a taksa chung ah phual chu a dup vâm thim ahi chun, a vun ah hung phualdok mai mai ahi’n, a thiang ahi.

⁴⁰Mi a sam pul in, a lu kol ta leh, zia chu a thiang ahi.

⁴¹A mai lam sam bep pul ta leh, zia chu chalkol ahi, a thiang ahi.

⁴²Mi a chalkolna a hem, a lukolna a hem ah chun san hiu hiau a hung um chun, lukol a hem, chalkol a hem ah kipat phâk hung piang ahi.

⁴³Thiampu’n endik intin; a mabe chun a san vâm thim leh a vun ah phâk tawhbang a um chun,

⁴⁴ama chu phâk ahi’n, a thianglo ahi. Thiampu’n a thianglo ahi ti a puan ding ahi; a natna chu a luchang ah um ahi.

⁴⁵Kuale phâk natna a nei chun, puansia ah kivan in, a sam thâiput in, a mûk chung lam tuam intin, “Thianglo, Thianglo,” ti’n a kiko ding ahi.

⁴⁶A natna a hung thian masangsia ama chu a thianglo hi’ntin; a chang ah giamun pawlam in a um chuam ding ahi.

⁴⁷Chun, sil leh chên, puanmalngat a hem, samul a hem ah phâk hik a um ah,

⁴⁸phanthaw a hem, ga’thaw a hem, puan malngat a hem, samul chi him him hihen la, savun hi’n, savun ah kisiam thil him him hitaleh;

⁴⁹puan ah a eng hiau a hem, a san hiau a hem a hung um ah; savun a hem, ga’thaw a hem, phanthaw a hem, savun him him ah natna hik a um chun, phâk hik ahi, thiampu’n a et dik ding ahi.

⁵⁰Thiampu’n endik intin, ni sagi koichuam ding ahi.

⁵¹Ni sagi a tin phat leh endik kit in ah. Natna hik chu sil leh chên, ga’thaw a hem, phanthaw a hem, savun ah kibawl chi leh savunte ah chun a kijak chun, phâk hîjam dik tak chu ahi’n, thianglo ahi.

⁵²Sil leh chên, ga’thaw a hem, phanthaw a hem, samul a hem, puan malngat a hem, savun chi him him a hem chu hâltum ziang ding ahi; phâk hî lengjak ahi ngâl ah: Mei ah hâltum ding ahi.

⁵³Chun, thiampu’n a et ah, a natna hik chu sil leh chên, phanthaw a hem, ga’thaw a hem, savun chi him him a hem ah kijak lo ahi chun;

⁵⁴thiampu’n zia natna hik umna puan chu sawpsak intin, ni sagi a koichuam kit ding ahi.

⁵⁵A puan sawpsa chu thiampu’n endik intin, hivei kilat dan chu a kithen lo ah, a hik chu kichawn lo maleh a thianglo ahi’n, mei ah hâl ding ahi: a sunglam hin a pawlam hiziang leh le, phâk hik sunglut ahi.

⁵⁶Thiampu’n a et kit ah, a kisawp nung ah a hik chu pha deu ah a kilat chun, a hik umna chu bang hiziang ta leh âtthak mai ding ahi;

⁵⁷ga’thaw a hem, phanthaw a hem leh savun chi him him ah natna hik a kilat nâk lai chun, a hik umna chu mei ah hâl ding ahi.

⁵⁸Chuleh, puan ga’thaw a hem, phanthaw a hem leh savun chi him him, la sawp dingteu ah kipat chu natna hik bei ta leh, a niveina ding in sawp intin, a thiangtho hita’n a, a tia.

⁵⁹Zia haw hi phâk natna, samul a hem, puan malngat a hem, ga’thaw a hem, phanthaw a hem leh savun chi bang hitaleh, a thiang leh a thianglo la hetkhen theina ding uh dante chu ahi.