Read Vaiphei THIAMPUTE LEKHABU 14 Bible Online

THIAMPUTE LEKHABU 14 - Vaiphei bible

THIAMPUTE LEKHABU 14

²Ziate hi phâk thianna ding dan chu ahi: Ama chu thiampu kiang ah pui hi’ntin;

³giamun ah kipat chun thiampu chu pawtdok intin, thiampu chun endik in a. Phâk chu a dam tak leh,

⁴hi’thianthona dingin vacha thiang pani, sidar thing tawh, pat sandup tawh, husop mol thiampu’n laksak intin;

⁵thiampu’n vacha khat chu leibêl sung ah tui thiang chung in thâsak in a.

⁶Vacha hing nalai zawk chu, sidar thing tawh, puan sandup tawh, husop mol chu tawh hun la’n la tin, vacha kithat pen thisan, leibêl sung ah tui thiangtho tawh kihel ah chun vacha hing nalai chu a dia ding ahi.

⁷Phâk ah kipat hithiantho ding pen chu sagivei the’khum intin, a thiang tai ti puang intin, vacha hing nalai chu gamlak in a tha’suak ding ahi.

⁸Chuleh, hi’thian ah um ding pen chun a puante sawp in, a sam mêt in, kisil thiang hen. Ziazaw chuleh, giamun lam in hung in ah; ahi’n la, puanbûk pawlam ah chun ni sagi a um chuam nâk lai ding ahi.

⁹Ni sagi a tin phat leh, a lu metkol intin, a khamul leh a mit mul le a mêt thian ding ahi; a mul zosia le a mêt nâm ding ahi. Chuleh, a puante sawp in, a taksa le tui ah kisil intin; tichun, thiang ta’n a.

¹⁰Ni giat a tin phat leh belamchal pani, demna bei gêl tawh belampi khat, kum khat ah upa bep, demna bei hun kai intin; chuleh, changbuang thillat dingin chângbuang nêl pha tak ephah te’na dim khat mun sawm ah khen a mun thum, sathau kihelsa tawh sathau te’na log khat tawh a hun ken ding ahi.

¹¹Thiampu chun kikhopna biakbûk kotbul ah chun LALPA âng in a thiansak ding mi tawh a thilte chu a pia ding ahi.

¹²Thiampu’n, belamno a chal khat chu la’n tin, gitlo thoina dingin a lân ding ahi. Chun, LALPA âng ah chun sathau log khat tawh, vaithum mêk helsate chu thillat dingin a lân ding ahi.

¹³Mun thiangtho ah hâlmang thillat tawh sukkhial thillat gan a tha’nau mun ah chun belamno chu a that ding uh ahi.

¹⁴Thiampu’n sukkhial thillat thisan them khat chu la’n tin, sukthian dingpa changlam bilmong tawh, a changlam khutpi tawh, a changlam kengpite chu a nu’ ding ahi.

¹⁵Thiampu’n sathau te’na log khat lak ah kipat chun neukhat a veilam khutpek in sungdok intin;

¹⁶a khut veilam ah sathau lak ah chun a changlam khutzung dia intin, LALPA ma âng ah chun sathau chu sagivei a the’ ding ahi.

¹⁷A khut ah sathau um nalaite chu hithiantho dingpa changlam bilmong tawh, a changlam khutpi tawh, a changlam kengpi mûk chu a nu’ ding ahi.

¹⁸Thiampu’n a khut ah um nalai cheng chu sukthian dingpa luchang chu a nu’ ding ahi. Tichun, LALPA âng ah kitatna ama thasâng in thiampu’n bawl piak ta’n a:

¹⁹A buakna kipat sukthian ahi’na dingin thiampu’n a gitlo thoina thillat ding chu lân ta’n a. Ziazaw chuleh, hâlmang thillat ding chu that intin;

²⁰tichun, thiampu’n hâlmang thillat tawh, an thillatte chu mâichâm ah chun lân ta’n a. Chutia, thiampu’n ama thasâng ah tatna a bawl piak ziak ah chun, ama chu thiang ta’n a.

²¹Migenthei, zia gual chu bawl zo lo ahi chun, sukkhial thoina pei ding leh a kitatna dingin, belamno khat a hun kai ding ahi; chuleh, an thillat dingin sathau tawh helsa chângbuang nêl ephah dim khat mun sawm ah khen a mun khat tawh, sathau te’na log khat tawh,

²²vakhu pani, ahiloleh vapâl pani tawh, a nei zawk zawk; khat chu bawlkhial thoina ding hi’ntin, a khat zaw chu hâlmang thillat dingin a hun ken ding ahi.

²³Thiampu kiang ah a kihi’thianna dingin a ni giat ni chun kikhopna biakbûk kotbul ah chun LALPA ma âng in a hun choi ding ahi;

²⁴thiampu’n bawlkhial thoina ding leh sathau log khat chu keng in LALPA âng in pei thillat dingin a va pei ding ahi.

²⁵Thiampu’n bawlkhial thoina belamno chu that intin, bawlkhial thoina gan thisan chu neukhat la’n, sukthian ding mi changlam bilmong tawh, a changlam khutpi tawh, a changlam kengpi chungte chu a nu’ ding ahi.

²⁶Thiampu’n a veilam khutpêk ah chun sathau um nalai cheng chu sungtha’n tin;

²⁷a veilam khut ah sathau umte lak ah them khat chu a changlam khutzung ah la’n, LALPA âng in sagivei a the’ ding ahi.

²⁸Thil bawlkhial thoina gan thisan koina mun ah chun thiampu’n a veilam khut ah sathau um nalai cheng chu sukthian ding mi changlam bilmong, a changlam khutpi chung tawh, a changlam kengpi chung nu’ in a.

²⁹Thiampu khut ah sathau um nalai cheng chu sukthian ding mi luchang nu’ intin; tichun, LALPA âng ah kitatna bawl piak in a.

³⁰Chuleh, vakhu a hem, vapâl a hem, a nei dungzui ah a hun choi chu,

³¹bawlkhial thoina ding ah khat leh hâlmang thillat ding ah khat tawh, an thillat dingin lân in a. Thiampu’n sukthian ding mi â ding ah chun LALPA âng in kitatna bawl piak in a.

³²Zia hi kuale ama ah phâkna hik um ah, a kisukthianna ding bawl zo lo te â ding ah dan um chu ahi, ti’n a gen a.

³³Mosi leh Aron kiang in LALPA chun:

³⁴“La lua ding ua ka tiam Kanaan gam la hung tun ua, chuleh, la luana gam ua, la In sung ngei ua phâk hî ka hun lênsak phat leh;

³⁵a Inneipa chu hung in, thiampu kiang in: Zia In ah hin hipi hileh kilawm a um hi, ti’n a hung hil ding ahi.

³⁶Thiampu’n In chu a vaet dik masang in, In sung ah um zosiate hi’buak a hilona dingin, a thialdaw sak ding ahi: zia nung ah chun a In endik dingin thiampu lût in a.

³⁷Hivei chu endik intin, hî chu a inbâng vêl ah chun a mu ah, a eng a hem, a san a hem ah a kilat ah, a sunglut dan ah a kilat chun;

³⁸thiampu pawtdok intin, In chu ni sagi a khâk ding ahi.

³⁹Ni sagi a tin phat leh thiampu hung kit in, endik kit in a; hî chu bângte ah kijak ah a mu chun,

⁴⁰thiampu’n a hî umna suangte chu lâk mangsak intin, khawpi paw lam ah ki’dak buakna mun ah chun a pai dawsak ding ahi.

⁴¹In sung chu phiat thiansak intin, a phiat khawm uh leivui chule khawpi pawlam ah ki’dak buakna mun ah chun a paidok ding uh ahi.

⁴²Suang dang in theng intin uh, a jutbit kit ding uh ahi.

⁴³Suang chu lâkdaw ahi ah, In chu jutbit kit ahi’nung ah le hî chu a hung kilat kit tei tei chun,

⁴⁴thiampu chia intin vaen dik in ah; In chu a pum ah hî a kai suak ah, kikâisawn thei chi phâk ahi chun; zia In chu a thianglo ahi.

⁴⁵A In chu phel hi’ntin, a suangte, a thingjawlte leh a In van zosia chu giamun pawlam ah ki’dak paikhawmna mun ah chun a thakdaw ding uh ahi.

⁴⁶In kikhâk sung ah valut kha taphot chu nitâk lam tiang in a buak ding uh ahi;

⁴⁷In sung ah giak tapo chunle a puan uh a sawp ding uh ahi; zia In sung ah an ne taphot chunle a puan uh a sawp ding uh ahi,” a tia.

⁴⁸In chu jutbit kit ahi’nung ah thiampu’n a hung et dik kit ah, hî chu jak ah a mu lo chun, In chu a thiang tai ti a puan ding ahi: Hî chu sukdam ahi tai.

⁴⁹In sukthianna dingin vacha pani, sidar thing tawh, mawpi bâk tawh, husop mol hun la’n tin;

⁵⁰vacha khat chu leibêl sung ah tui thiang chung ah chun that intin;

⁵¹sidar thing tawh, husop mol tawh, mawpi bâk tawh, vacha hing nalai pen chu a tui tawh thisan kihel lak ah chun dia lut intin, zia thisan chun In chu sagivei a the’khum ding ahi.

⁵²Tichun, zia In thianglo chu vacha thisan tawh, tui thiang tawh, vacha hing tawh, sidar thing tawh, husop mol tawh, patsan in a suthiang ding ahi;

⁵³chuleh, vacha hing nalai chu khawpi pawlam ah chun thâdok ta’n ah; zia gual chun kitatna bawl piak intin, a In chu sukthian hita’n a.

⁵⁴Zia hi tithakna, phâkna hî sukthian dan chu ahi;

⁵⁵puan ah um hihen la, In ah um hitaleh,

⁵⁶tiphualte, tithakte, tikângte,

⁵⁷bangtik phat leh buak ah, bangtik phat leh thiang a hem ti la het khentheina ding uh chu ahi. Zia hi phâkna hî la etkol ding dan uh chu ahi, ti’n a gen a.